Luno, die kriptogeldeenheidbeurs wat in Suid-Afrika ontstaan het, gaan wêreldwyd sowat 20% van sy personeel aflê in ’n poging om minder op kleinhandelbeleggers en meer op institusionele kliënte staat te maak.
Dié herstrukturering kom ondanks Luno se groei tot 16 miljoen gebruikers en weerspieël ’n breër verskuiwing in die wêreldwye kriptobedryf, waar maatskappye al hoe meer op stabieler inkomstebronne fokus.
Luno is ’n gewilde platform vir die verhandeling van kriptogeldeenhede en vir digitale beursies.
Dit stel mense in staat om digitale geldeenhede soos bitcoin en ethereum maklik te koop, te verkoop, te stoor en te stuur.
James Lanigan, uitvoerende hoof van Luno, sê die herstrukturering sal die maatskappy in staat stel om sy sake-tot-sake-onderneming uit te brei, koste te verminder en sy bedrywighede by huidige marktoestande aan te pas.
Hy wou nie sê hoeveel werknemers hul werk gaan verloor nie.
Volgens Lanigan het Luno die afgelope jaar aansienlik in outomatisering en ander operasionele verbeterings belê.
“Hierdie veranderinge beteken dat ’n kleiner en meer aangepaste organisasiestruktuur nodig is om die onderneming doeltreffend te bestuur,” sê hy.
Die herstrukturering volg te midde van voortgesette wisselvalligheid in die kriptomark.
Die prys van bitcoin, ethereum, solana en ander kriptogeldeenhede het vanjaar gedaal, wat handelsaktiwiteit onder kleinhandelbeleggers onder druk geplaas het.
Luno, met sy hoofkantoor in Londen, het in Suid-Afrika begin en bedryf sake oor Afrika en die Asies-Pasifiese streek heen.
Die maatskappy sê die nuwe strategie sal hom in staat stel om sy aanbod aan institusionele beleggers uit te brei, sy kerninfrastruktuur en regulatoriese nakoming te versterk, en terselfdertyd sy produkte vir kleinhandelkliënte verder te ontwikkel.
Een van die sleutelelemente van dié strategie is om banke, finteg-maatskappye, telekommunikasiemaatskappye en ander ondernemings in staat te stel om kriptodienste onder hul eie handelsname aan te bied.
Luno sal die onderliggende infrastruktuur, likiditeit, digitale beursies en regulatoriese nakoming verskaf.
Discovery Bank is reeds een van dié vennote, en volgens Lanigan sal nog vennootskappe later vanjaar aangekondig word.
Luno wil hom ook sterker vestig in die mark vir plaaslike vaste digitale geldeenhede in ontluikende ekonomieë.
Die maatskappy is een van die stigtersvennote van zaru, ’n vaste digitale geldeenheid wat deur die Suid-Afrikaanse rand gerugsteun word.
Sanlam, Lesaka Technologies en EasyEquities is ook stigtersvennote.
Volgens Lanigan is die plan om dié model uiteindelik ook in ander ontluikende markte bekend te stel waar plaaslike vaste digitale geldeenhede nog beperk is.
Luno wil boonop sy institusionele vereffeningsplatform gebruik om oorgrensbetalings goedkoper en eenvoudiger te maak deur digitale bate-infrastruktuur te benut.
Die herstrukturering beklemtoon hoe kriptobeurse hul sakemodelle aanpas namate inkomste uit kleinhandel minder voorspelbaar raak en groter geleenthede in institusionele finansiële dienste ontstaan.
