Die akteur Ivan D. Lucas is Dinsdagaand in die ouderdom van 62 oorlede.
Hy het kanker gehad en het in 'n hospitaal in Johannesburg gesterf. Sy lewensmaat, die aktrise Vinette Ebrahim, was by hom.
Die akteur Royston Stoffels, 'n goeie vriend en kollega van Lucas, het die nuus aan Netwerk24 bevestig.
Lucas is veral bekend vir sy toneelwerk en sy hoofrol saam met Ebrahim in Athol Fugard se bekroonde toneelstuk Boesman en Lena.
Hy was ook in groot rolprente soos Leon Schuster se Sweet 'n Short en 'n bekende gesig in die gewilde sepie Madam & Eve.
Huldeblyke het ingestroom op sosiale media vir die "geweldig talentvolle" kunstenaar wat 'n groot verbeeldingskrag gehad het.
Lucas is in Kaapstad gebore en het aan die Athlone High School gematrikuleer voordat hy drama aan die Universiteit van Kaapstad gaan studeer het.
Hy het ook kitaar gespeel en graag musiek gemaak, en het ook geskryf.
Lucas het nie kinders gehad nie en word oorleef deur Ebrahim en drie susters.
Hy word Saterdag in Johannesburg veras.
* Volg Netwerk24 vir meer oor die storie.
