Binnenshuise blomplante bring lewe, kleur en warmte na 'n kamer en is 'n goeie teenmiddel vir koue winterdae, meen Alice Coetzee.
Wanneer die ysige winter aanbreek, durf geen gesonde tuinier dit buite nie. So hoekom bring jy nie die natuur binnenshuis met kleurryke blomplante wat help om 'n bietjie warmer te voel nie?
Blomme is goed vir die gemoed - omring jou gerus daarmee. Die voordele strek egter soveel verder. In die winter, wanneer die lug baie droog is, kan die gebrek aan humiditeit droë kele en hoes vererger. Blomme en plante voeg vog by die lug, wat goed is vir jou gesondheid, en plante se vermoë om suurstof te skep verbeter die gehalte van lug in die huis. Boonop hou binnenshuise plante wat blom baie langer as 'n gewone bos blomme.
- Knolbegonia het waarskynlik die grootste verskeidenheid blomkleure van alle binnenshuise plante en kan twee tot drie maande blom. Met hul groot, krullerige blomme is hulle 'n ideale fokuspunt vir 'n koffietafel of 'n eetkamertafel.
Hulle floreer in helder tot medium indirekte lig en 'n warm kamer. Maak spaarsamig nat omdat hulle vatbaar is vir wortelvrot. Druk jou vinger in die potmengsel en as dit nog klam is; stel die natmaak met 'n dag uit. Bemes een keer per maand met 'n vloeibare kunsmis vir blomme.
- Die kompakte, geharde en onvernietigbare Kalanchoe calandiva is die perfekte plant om helder, lewendige kleur op toonbanke, tafelblaaie en in tuiskantore te bring, en enige ander plek wat 'n bietjie kleur nodig het. Plaas hom naby 'n venster sodat hy baie energie het om te blom.
Kalanchoe calandiva is deel van die vetplantfamilie en verkies dus droë, goed gedreineerde grond. Sny dooie blomkoppe af om nuwe blomgroei aan te moedig.
- Alpeviooltjies of siklame(Cyclamen) is van die mooiste van die koel seisoen se binnenshuise blomme. Hul vlerkagtige kroonblare lyk soos dié van 'n skoenlapper wat bo die ewe mooi hartvormige silwer en groen blare sit.
Siklame sal aanhou blom as dit in 'n warm kamer met baie helder, indirekte lig gehou word. Hou die grond effens klam, maar nie sopnat nie, anders verrot die wortels. Bemes een keer per maand met 'n vloeibare kunsmis vir blomme. Verwyder dooie blomme deur die stam van die basis van die plant uit te trek. Dit sal dit aanmoedig om meer blomme te lewer.
- Met hul elegante trompetagtige blomme en welige blare straal wit varkore (Zantedeschia) so 'n positiewe energie uit dat hulle altyd welkome inwoners in 'n huis is. Gebruik dit as 'n fokuspunt as 'n lewende blommerangskikking.
Hulle hou van helder lig, 'n warm kamer en kan 'n bietjie oggendson vat. Hou die grond klam, maar moenie te veel natmaak nie. Verwyder gebruikte blomme om nuwe blomgroei aan te moedig.
- Daar is 'n vreugde in potkrisante se blomme. Vind 'n plek wat baie helder lig kry, naby vensters, op die patio of in 'n sonnige kamer. Hou die grond klam. Sou jy vergeet om dit nat te maak en die grond droog uit, plaas die pot in 'n emmer, of wasbak, met 'n paar sentimeter water daarin en laat die plant die water absorbeer.
Die verwydering van dooie blomme, stingels en blare laat die plant netjies en vars lyk en laat nuwer knoppe en stingels floreer.
- Die hartvormige "blomme" van Anthurium, in skakerings van rooi, pienk, oranje en wit, gee 'n lang, blywende kleur. Hierdie geharde plant verdra verwaarlosing en is ideaal vir mense sonder groen vingers.
Maak nat wanneer die grond droog voel. Gebruik 'n klam lap om stof en insekte van die blare te verwyder. Gereelde verwydering van dooie blomme en onooglike blare sal die plant netjies laat lyk. Anthurium hou van goeie lig, maar nie direkte sonlig nie.
