Hierdie trourok-style gaan gewild wees in 2018. Wat is jou gunsteling?
1. Koebaai, trourok
Dit kom dalk al 'n paar jaar, maar 2018 is beslis die jaar van die broekpak! Dis nie meer net die brawe bruide wat 'n broekpak bo 'n rok verkies nie, dit word nou as 'n sjiek en stylvolle opsie vir enige moderne bruid beskou.
2. Handskoene en moue
Ná 'n lang afwesigheid is handskoene vanjaar terug op die loopplanke. Rokke het ook detail wat die fokus op die arms plaas. Wees veral op die uitkyk vir interessante kant- of groot uitklokmoue!
3. Strikke op die skouers
Groot strikke en sagte, lang chiffon-fraiings lei ook die aandag na die skouers en skep 'n romantiese gevoel.
4. Skouermantel
Byna elke internasionale ontwerper het vanjaar 'n skouermantel in hul reeks ingesluit. Die skouermantel is die nuwe sluier, en dit is ideaal vir 'n wintertroue of meer konserwatiewe voorkoms.
5. Kort voor, lank agter
Soomlyne wat korter is voor is nie 'n nuwe styl nie, maar volgens Glamour gaan dit weer gewild wees in 2018. Dis al by 'n hele paar modeweke gesien.
6. Groot strik agter
In Engels word dit "butt bows" genoem, maar ons sukkel nog om 'n aanvaarbare woord daarvoor in Afrikaans te vind! Trourokke het 'n lae rug met 'n groot strik - 'n romantiese weergawe van die 1980's se rokke.
7. Verwyderbare romp
Trourokke met 'n verwyderbare romp is 'n praktiese oplossing - en baie gewild op Pinterest! Bruide dra 'n volromp vir die seremonie en verwyder dit vir die onthaal, vir 'n meer informele voorkoms.
Nog trends om dop te hou
Trourokke met pêrels of vere gaan weer gewild raak. Dink aan sagte vere op die romp en fyn pêrels op die bostuk.
Swart afwerkings en aksente op trourokke, soos 'n swart band om jou middel te beklemtoon, word toenemend gesien.
In 2017 was strooimeisierokke met blommotiewe gewild, en nou word dit ook op trourokke gebruik. Dink aan 'n wit volromp met 'n bostuk met blomme.\
