Ervaar jy krapperigheid, pyn, rooiheid of 'n afskeiding in jou oë? Voel jy voortdurend die behoefte om hulle soggens of ná lang ure agter jou skootrekenaar te vryf? Dan het jy dalk droë-oog-sindroom.
Droë-oog-sindroom, of DES soos dit algemeen bekend staan, word veroorsaak deur 'n chroniese gebrek aan voldoende smering en vog op die oppervlak van die oog. Adele Camarena, eienaar en direkteur by Spectacle World, sê ons oë het voortdurend trane nodig om hulle te voed en te smeer.
"Droë-oog-sindroom word meestal veroorsaak deur onvoldoende of swak kwaliteit trane en of swak gewoontes om jou oë te knip terwyl jy voor digitale skerms is. Dit kan jou lewenskwaliteit beïnvloed," sê Camarena.
Baie mense ly aan droë-oog-sindroom, 'n progressiewe toestand, sonder om te besef dat dit hul oë permanent kan beskadig.
"Dit is belangrik om behandeling te kry voordat simptome vererger tot die punt dat dit die kornea benadeel. Hidrasie is noodsaaklik vir jou oë. Sonder voldoende vog word hulle droog en ongemaklik," voeg sy by.
Trane hou jou oë vogtig, spoel vuiligheid weg en help om bakteriële infeksies te voorkom. Camarena sê dat dit ook gebeur wanneer jy nie huil nie.
"Trane bestaan uit 'n buitenste olierige laag, 'n middelste waterige laag, en 'n binneste laag wat slym bevat.
"Wanneer jou liggaam aanvoel dat jou oë nie klam genoeg is nie, probeer dit om dit te herstel deur trane te produseer. Soos jy ouer word, produseer jy minder trane, en hulle het dalk nie die optimale balans van water, olie en slym nie. Sommige medikasie, insluitend antihistamiene, betablokkers, antidepressante, pynstillers, aknee-behandelings en geboortebeperking kan lei tot verminderde traanproduksie."
Dikwels is droë-oog-sindroom net deel van die natuurlike verouderingsproses, met 'n geskatte een uit drie mense ouer as 65 wat droë-oog-sindroom ervaar. Enigiemand van enige ouderdom kan egter geraak word.
Dit is meer algemeen by vroue as mans - aangesien vroue meer geneig is om droë oë te ontwikkel as gevolg van hormonale veranderinge, soos swangerskap, die gebruik van orale voorbehoedmiddels of menopouse.
Behandel dit só
Wenke om DES te behandel, sluit in die gebruik van kunsmatige trane deur die dag, knip jou oë wanneer jy jou rekenaar gebruik, lees of videospeletjies speel, neem 'n blaaskans ten minste elke uur, die gebruik van 'n lugbevogtiger om die lug klam te hou, en meer.
"Ons het gevind dat 'n warm kompres wat jy in die mikrogolf verhit, uiters doeltreffend is om droë-oog-sindroom te behandel. Voorskrif-oogdruppels of salf wat traanproduksie verhoog en die neem van 'n omega-3-vetsuuraanvulling maak ook 'n enorme verskil. Dit is raadsaam om die oogdruppels op die buitehoek van die oog te gebruik, en nie aan die binnekant soos wat algemeen gedink word nie," sê Camarena.
Faktore wat verband hou met droë-oog-sindroom
'n Aantal faktore kan jou risiko vir droë oë verhoog. Dit sluit in:
- Rekenaargebruik: Wanneer ons by 'n rekenaar werk of 'n slimfoon of ander draagbare digitale toestel gebruik, is ons geneig om ons oë minder volledig en minder gereeld te knip, wat lei tot groter traanverdamping en verhoogde risiko van droë-oog-simptome.
- Veroudering: Droë-oog-sindroom kan op enige ouderdom voorkom, maar dit word later in die lewe al hoe meer algemeen, veral ná 50.Menopouse: Post-menopousale vroue loop 'n groter risiko om droë oë te kry as mans van dieselfde ouderdom.
- Binne-omgewing: Lugversorging, plafonwaaiers en gedwonge lugverhittingstelsels kan almal binnenshuise humiditeit verminder en/of traanverdamping verhaas, wat droë-oog-simptome veroorsaak.
- Buitelug-omgewing: Droë klimaat en droë of winderige toestande verhoog die risiko's vir droë oë.
- Gereelde vlieg: Die lug in die kajuite van vliegtuie is uiters droog en kan tot droë-oogprobleme lei, veral onder mense wat gereeld vlieg.
- Rook: Benewens droë oë, is rook gekoppel aan ernstige oogprobleme, insluitend makulêre degenerasie en katarakte.
- Ekstra bron: National Eye Institute
