Al ooit gehoor van die GFIT? Dit klink dalk soos 'n vreemde woord uit 'n ander taal, maar dié behandeling is eintlik 'n revolusionêre nuwe velbehandeling wat so goed is dat mense hul chirurgiese behandelings laat vaar ten gunste van hierdie gesigbehandeling.
Wat is GFIT?
Groeifaktor-induksieterapie (GFIT) is 'n term om die bekendstelling van spesifieke groeifaktore in die vel te beskryf. En wat is groeifaktore?
Basies is dit boodskapperselle wat - wanneer hulle in spesifieke vorms vir verskillende funksies geïsoleer word - met jou selle praat en hulle vertel om sekere prosesse in jou liggaam te skep. Byvoorbeeld, groeifaktore vir littekens sal jou velselle vra om daardie area te genees en littekens te voorkom, terwyl groeifaktore vir haargroei daardie selle sal vra om haargroei te versnel.
Met GFIT word groeifaktore geoes, geïsoleer en dan in hul mees doelgerigte, ideale vorm gebruik. Hulle kan gebruik word vir vaginale verjonging, haargroei en in verskeie ander vorme.
Die behandeling is geskik vir 'n wye verskeidenheid veltipes en toestande, wat dit 'n veelsydige oplossing maak vir baie velsorgbehoeftes.
Voordat jy 'n GFIT-behandeling ondergaan, is dit noodsaaklik om met 'n velsorgkundige te konsulteer om te verseker dat die behandeling geskik is vir jou spesifieke behoeftes.
Probeer gerus dié behandeling
Ek het na Amy Knoetze, mediese estetiese terapeut en stigter van Pulse Dermatology and Laser in Kenridge, gegaan om te sien waaroor die bohaai gaan met die gesigbehandeling.
Stap 1: Voorbereiding van die vel
Eers het sy my vel voorberei met 'n vinnige skoonmaak en 'n verdowingsroom aangewend om die veloppervlak gevoelloos te maak.
Dit is omdat die groeifaktore in my vel met 'n "stempel" gedruk moet word vir maksimum retensie. En dit kan nogal kan seermaak.
My gesig word daarna in kleefplastiek toegedraai en ek het sowat 30 minute gewag vir die room om in werking te tree.
Stap 2: Groeifaktor-serum word aangesmeer
Die verdowingsroom is daarna afgevee en Amy het die groeifaktor-serum op my vel gesmeer. Sy het daarna die Dermastamp - 'n klein stempel met 100 klein, gesteriliseerde naalde - gebruik om die serum in my vel te prik wat 'n vorm van microneedling is.
Die klein wonde veroorsaak dat jou liggaam meer kollageen en elastien maak, wat jou vel genees en jou help om jonger te lyk, verduidelik Amy.
Volgens Amy word die groeifaktor-serum vir my vel spesifiek gebruik vir die herstel van weefsel.
Stap 3: Vel absorbeer serum
Die groeifaktor-serum is op my gesig gelaat, waarna 'n groeifaktormasker, die AQ Skin Solutions Intensive Moisturizing Repair Mask, op my gesig gesit word.
Volgens Amy is die masker so gewild dat talle terapeute dit aan die einde van hul behandelings gebruik om die resultate te maksimeer.
Ná die behandeling moet jy glad nie jou gesig was nie, asook nie 'n dag in die son beplan nie.
Amy het ook vooraf vir my gevra of ek enige afsprake ná my behandeling het, want jou gesig gaan rooi en pofferig wees.
Volgens Amy sal jou terapeut waar jy die behandeling ontvang, voorstel hoeveel behandelings jy moet ontvang.
"Ons beveel in die algemeen 'n kursus van vier GFIT-behandelings aan met tussenposes van vier weke vir intensiewe velregenerasie.
"GFIT kan ook tussen bestaande velsorgbehandelings uitgevoer word om die voordele van ander behandelings te verbeter vir optimale resultate," sê Amy.
Gloeiende vel
My vel het gegloei ná die behandeling.
Vir nasorg het ek ook 'n buisie AQ Skin Solutions Active Serum ontvang wat ek elke dag moes aansmeer. Tot op hede, omtrent twee maande later, is my vel steeds stralend en dra ek min tot geen grimering nie. En boonop het ek ook nie enige puisies gekry nie.
Die behandeling het beslis ook gehelp om die donker kringe onder my oë ligter te maak.
Beslis die moeite werd!
