OORSIG | Die wêreld in ’n neutedop

2025-10-27 03:33:16

Trump vertrek na Tokio vir gesprekke oor handel, verdediging

Pres. Donald Trump het Maandag na Tokio vertrek, waar hy met Japan se keiser en Sanae Takaitsji, die nuutverkose premier, sal vergader.

Dit is deel van Trump se Asië-reis wat daarop gemik is om handelsooreenkomste, beleggings en verhoogde verdedigingsbesteding te verseker.

Sy reis sal na verwagting Donderdag in Suid-Korea afsluit met ’n beraad met Xi Jinping, Chinese leier. – Reuters

2025-10-27 03:34:19

2 bergklimmers sterf in Nepal

Twee buitelandse bergklimmers is in Nepal dood ten tyde van afsonderlike ekspedisies op die berg Ama Dablam in die Himalajas.

Hugo Lucio Colonia Lazaro (65) van Frankryk is deur ’n vallende stuk ys teen die kop getref en is verlede week per helikopter na Katmandoe geneem, het ’n amptenaar gesê.

Hong Khy Park (66) van Suid-Korea is Sondag oorlede terwyl hy die berg geklim het. Hy het saam met vyf ander geklim toe hy ineengestort het. – Reuters

2025-10-27 03:35:27

Minstens 4 dood in betogings in Kameroen

Minstens vier mense is Sondag doodgeskiet in betogings in Douala, Kameroen, ter ondersteuning van Issa Tchiroma Bakary, ’n presidentskandidaat.

Tchiroma het gevra dat kiesers betoog om te eis dat die uitslae van die presidentsverkiesing op 12 Oktober “gerespekteer” word.

Hy maak daarop aanspraak dat hy die verkiesing teen pres. Paul Biya gewen het.

Die verkiesingsuitslae word na verwagting Maandag uitgereik. – Reuters

Polisiebeamptes Sondag gedurende ’n betoging in die woonbuurt New Bell in Douala, Kameroen. Foto: Reuters

2025-10-27 04:18:20

Verwoestende orkaan Melissa op pad na Jamaika, Kuba

Orkaan Melissa het ontwikkel in ’n kategorie 4-orkaan wat op pad is na Jamaika en Kuba.

Dit sal na verwagting katastrofiese vloede, grondverskuiwings en stormvloede in die streek tot gevolg hê, het die Amerikaanse Nasionale Orkaansentrum (NHC) Sondag gesê.

Melissa veroorsaak volgehoue stormwinde van tot 220 km/h en sal na verwagting vererger op pad na Jamaika, waar dit Maandagaand of Dinsdagoggend die land behoort te bereik.

Dit sal waarskynlik Dinsdag laat die suidooste van Kuba tref. – Reuters

2025-10-27 04:19:30

Rusland skiet 34 hommeltuie af wat Moskou teiken

Rusland het oornag 34 Oekraïense hommeltuie met lugverdedigingstelsels afgeskiet ná herhaaldelike aanvalle op Moskou.

Twee van die stad se vier lughawens is weens die aanvalle tydelik gesluit, het Russiese owerhede Maandag gesê.

Die Russiese lugvaartorganisasie Rosawiatsija het gesê die Domodedowo-lughawe en die kleiner Zjoekofski-lughawe was ongeveer twee en ’n half uur lank gesluit om lugveiligheid te verseker.

Nog 24 hommeltuie is Maandag in die vroeë oggendure vernietig in die Toela-streek, wat aan Moskou grens. – Reuters

2025-10-27 04:22:07

2 Amerikaanse lugvaartuie stort neer in Suid-Chinese see

Twee lugvaartuie van die Amerikaanse vloot het Sondag in afsonderlike voorvalle kort ná mekaar in die Suid-Chinese See neergestort.

Geen sterftes is aangemeld nie.

’n MH-60R Sea Hawk-helikopter het in die waters van die Suid-Chinese See neergestort terwyl dit roetine-operasies vanaf die vliegdekskip USS Nimitz uitgevoer het, volgens die Amerikaanse vloot.

’n Halfuur later het ’n Boeing F/A-18F Super Hornet-straalvegter in die Suid-Chinese See neergestort, ook terwyl dit roetine-operasies vanaf die USS Nimitz uitgevoer het.

Al die bemanningslede van die twee tuie is veilig uit die water opgepik. – AFP

2025-10-27 05:10:38

Argentynse president se party wen middeltermyn-verkiesings

Die party van die Argentynse president, Javier Milei, het die middeltermyn- wetgewende verkiesing gewen, waar kiesers hom ’n mandaat gegee het om voort te gaan met sy radikale hersiening van die ekonomie.

Dít ondanks wydverspreide ontevredenheid oor sy besparingsmaatreëls.

Ontleders sê die groter opkoms van kiesers is ’n weerspieëling van die vrese vir hernude ekonomiese onrus indien die land Milei se besparingsbeleid oorboord gooi.

Die administrasie van pres. Donald Trump van Amerika is gekritiseer nadat hy Milei se regering met ’n stewige finansiële reddingsboei bygestaan het nadat Milei se gewildheid die laaste paar weke getaan het.

“Baie geluk aan pres. Javier Milei met sy oorwinning in Argentinië,” het Trump op sy Truth Social-platform geskryf. “Ons vertroue in hom is deur die mense van Argentinië bevestig.” – Reuters, AFP

Pres. Javier Milei van Argentinië vier Sondag sy party se oorwinning in Buenos Aires, Argentinië. Foto: Reuters

2025-10-27 05:50:42

8 000 vlugte op een dag vertraag weens VSA-regeringsluiting

Meer as 8 000 vlugte is Sondag oor Amerika heen vertraag terwyl lugverkeerbeheerders steeds gestaak het om vervoer te ontwrig terwyl ’n sluiting van die federale regering die 26ste dag binnegaan.

Sean Duffy, Amerikaanse minister van vervoer, het gesê die federale lugvaartadministrasie het Saterdag probleme met personeel verantwoordelik vir lugverkeerbeheer op 22 plekke ondervind.

Daar was Saterdag ook 5 300 vertragings. Sowat 13 000 lugverkeerbeheerders en 50 000 beamptes van die administrasie vir vervoerveiligheid moet werk al word hulle nie gedurende die regeringsluiting betaal nie. – Reuters

’n Vliegtuig styg Sondag op vanaf die Chicago O’Hare Internasionale Lughawe in Chicago, Illinois in die VSA. Foto: Reuters

2025-10-27 06:38:54

Poetin gloei oor ‘unieke kruismissiel wat niemand anders ter wêreld het’

Pres. Wladimir Poetin van Rusland het Sondag aangekondig dat ’n suksesvolle finale toets van ’n nuwe kernaangedrewe kruismissiel voltooi is.

“Die beslissende toetse is nou klaar,” het Poetin gesê.

Hy het die voorbereiding beveel van “infrastruktuur om hierdie wapen in diens van die Russiese gewapende magte te stel”.

Poetin het die missiel ’n “unieke skepping” genoem wat “niemand anders ter wêreld het nie” en gesê dit het ’n “onbeperkte reikwydte”. – AFP

2025-10-27 06:45:28

Indiese regering verwyder 50 000 mense voor tifoon tref

Die Indiese owerheid het Maandag 50 000 mense na noodlenigingskampe verskuif ’n dag voordat die sikloon Montha, wat besig is om te verhewig oor die Baai van Bengale,  die ooskus na verwagting met sterk winde en swaar reën sal tref.

Die owerheid het vakansies vir noodpersoneel gekanselleer en skole en kolleges beveel om te sluit in kusgebiede van die state Andhra Pradesh en Odisha in onderskeidelik die suide en die ooste.

Die sikloon sal waarskynlik teen Dinsdag in ’n hewige storm verander voordat dit later die dag die kus van Andhra Pradesh tref. – Reuters

2025-10-27 06:55:36

Trump kritiseer Poetin oor missieltoets, ‘moet eerder oorlog beëindig’

Pres. Donald Trump het Maandag gesê die aankondiging deur pres. Wladimir Poetin oor ’n kernaangedrewe kruismissieltoets was nie “gepas” nie.

“Hy behoort die oorlog (in Oekraïne) te beëindig. ’n Oorlog wat ’n week moes geduur het, is nou binnekort in sy vierde jaar. Dit is wat hy behoort te doen in plaas daarvan om missiele te toets,” het Trump aan joernaliste aan boord van Air Force One gesê. 

Vroeër is berig Poetin het Sondag ’n suksesvolle finale toets van ’n nuwe kernaangedrewe kruismissiel aangekondig. – AFP

Pres. Donald Trump Vrydag op Air Force One. Foto: Getty Images

2025-10-27 07:05:25

Venezuela beskou Amerikaanse oorlogskip as ‘provokasie’

Venezuela het Sondag die aankoms van ’n Amerikaanse oorlogskip in die nabygeleë Trinidad en Tobago as ’n gevaarlike “provokasie” bestempel.

Die USS Gravely, ’n antimissiel-skip, het Sondag in Port of Spain, Trinidad en Tobago, vasgemeer vir ’n vierdaagse besoek, wat gesamentlike opleiding met plaaslike verdedigingsmagte sal insluit.

Die skip se aankoms kom te midde van ’n toenemende militêre veldtog deur pres. Donald Trump teen vermeende dwelmsmokkelaars in Latyns-Amerika wat hoofsaaklik Venezolane geteiken het. – AFP

2025-10-27 07:13:14

Harris ‘wonder’ of sy nie Biden moes vra om aan verkiesingswedloop te onttrek

Kamala Harris, voormalige Amerikaanse visepresident, het haar kommer uitgespreek dat sy nie Joe Biden gevra het om aan die wedloop om die Withuis te onttrek nie.

Harris het Sondag aan die BBC gesê sy dink nou daaroor na of sy so ’n gesprek met Biden moes voer.

Biden het sy herkiesingsveldtog in Julie 2024 beëindig ná ’n rampspoedige vertoning in ’n debat teen pres. Donald Trump ’n paar weke tevore. – BBC

2025-10-27 07:19:29

Griekeland soek voort nadat migrante uit see gered is

Die Griekse owerheid het Maandag ’n soek-en-reddingsoperasie naby die eiland Lesbos van stapel gestuur nadat sewe migrante uit die see suidwes van Kaap Agrilia gered is.

Twee mense is ook gevind wat geen reaksie getoon het nie, het die kuswag gesê. Die soektog na ander vermiste mense duur voort.

Die operasie behels twee vaartuie, ’n helikopter en ’n landgebaseerde eenheid van die kuswag. – Reuters

2025-10-27 07:25:11

Afganistan, Pakistan hervat gesprekke vir langtermyn-skietstilstand

Amptenare van Afganistan en Pakistan sal Maandag in Istanbul vergader vir ’n derde dag van gesprekke nadat hulle nie daarin geslaag het om blywende vrede te bewerkstellig nie.

Die buurlande het op 19 Oktober in Doha tot ’n skietstilstand ingestem ná dae van skermuteslinge by die grens waarin tientalle mense dood is.

Die tweede ronde van gesprekke, wat deur Turkye bemiddel word, is daarop gemik om ’n langtermyn-skietstilstand te bewerkstellig. – Reuters

2025-10-27 08:12:21

VN-magte skiet sy hommeltuig in Libanon neer, sê Israel

Die Israeliese weermag het Maandag die vredesmagte van die Verenigde Nasies (Unifil) in Suid-Libanon daarvan beskuldig dat hulle ’n dag tevore een van sy hommeltuie afgeskiet het. Die hommeltuie was deel van ’n sending om intelligensie in te samel, het lt.kol. Nadav Shoshani, woordvoerder van die weermag, gesê.

“ ’n Aanvanklike ondersoek dui daarop dat Unifil-magte wat naby gestasioneer was, doelbewus op die hommeltuig losgebrand en dit afgeskiet het. Die hommeltuig se aktiwiteit het nie ’n bedreiging vir Unifil-magte ingehou nie.” – AFP

2025-10-27 08:45:18

3 wat aanvalle wou uitvoer om Covid-19 te stuit, tronkstraf opgelê

’n Hof in Hongkong het Maandag drie mense tronkstraf van tot 18 jaar opgelê vir drie komplotte om bomaanvalle in 2019 en 2020 uit te voer.

Ho Cheuk-wai (41), Lee Ka-pan (31) en Cheung Ka-chun (35) is verlede maand skuldig bevind aan sameswering om ontploffings te veroorsaak met die doel om lewe of eiendom in gevaar te stel.

Die hof het gehoor die skuldiges wou hê dat mediese werkers moet staak en dat die regering die grense moet sluit om die verspreiding van Covid-19 te bekamp. – Reuters

2025-10-27 09:09:56

Litaue gaan ballonne van smokkelaars afskiet

Inga Ruginiene, premier van Litaue, het Maandag gesê haar land gaan ballonne vol smokkelsigarette begin afskiet. Smokkelaars gebruik hierdie ballonne om die sigarette oor die grens van Belarus te smokkel en dit belemmer die land se lugverkeer.

Litaue het die Vilnius-lughawe verlede week vier keer gesluit nadat ballonne sy lugruim binnegekom het, en elke keer sy Belarus-grensposte tydelik gesluit in reaksie op die voorvalle. – Reuters

2025-10-27 09:15:30

Israeliese aanval op Hamas-lid ‘skend nie skietstilstand’ – Rubio

Marco Rubio, Amerikaanse minister van buitelandse sake, het Maandag gesê dat Washington ’n aanval wat volgens Israel op ’n lid van Hamas in die Gasastrook gemik was, nie as ’n skending van die skietstilstand beskou nie.

Israel het gesê hy het Saterdag ’n lid van Hamas aangeval wat na bewering beplan het om Israeliese troepe aan te val.

Rubio het ook gesê Israel het nie sy reg op selfverdediging prysgegee as deel van die skietstilstand met Hamas nie. – Reuters

2025-10-27 09:23:34

Melissa nou kategorie 5-orkaan, katastrofiese oorstromings verwag

Die orkaan Melissa het Maandag tot die maksimum kategorie-5 versterk, het die Amerikaanse Nasionale Orkaansentrum gesê.

Die sentrum het gewaarsku teen “katastrofiese oorstromings” in Jamaika nog voordat die storm die Karibiese eilandnasie tref.

“Vernietigende wind, stormvloede en katastrofiese oorstromings sal deur die dag en tot vanaand in Jamaika vererger.”

Vroeër is berig die orkaan Melissa het ontwikkel in ’n kategorie 4-orkaan wat op pad is na Jamaika en Kuba. – AFP

2025-10-27 10:21:16

Hef skietstilstand op, eis families van laaste gyselaars

Die families van Israeliese gyselaars het Maandag geëis dat die volgende stappe in die skietstilstand tussen Israel en Hamas opgeskort word totdat Hamas die oorblywende lyke van die res van die gyselaars terugbesorg.

“Hamas weet presies waar elkeen van die oorlede gyselaars is,” sê die Forum vir die Families van die Gyselaars en Vermistes.

“Twee weke het verloop sedert die sperdatum wat in die ooreenkoms vir die terugbesorging van al 48 gyselaars gestel is, maar 13 bly in gevangenskap.” – AFP

’n Groep aktiviste en familielede van die gyselaars hou op 18 Oktober ’n betoging op "Gyselaarsplein" in Tel Aviv, Israel, om die terugbesorging van die oorblywende lyke te eis. Foto: Getty Images/Anadolu

2025-10-27 11:12:37

Mali skort skole op oor brandstofkrisis

Mali het Maandag skool- en universiteitsklasse oor die land heen vir twee weke opgeskort weens 'n brandstoftekort.

Jama'at Nusrat al-Islam wal-Muslimin (JNIM)-militante het vroeg in September 'n blokkade op brandstofinvoere na die Wes-Afrikaland aangekondig en het sedertdien konvooie brandstoftenkwaens aangeval wat probeer om die land binne te gaan of Bamako, die hoofstad van Mali, te bereik.

Ontleders het die brandstofblokkade beskryf as deel van 'n drukveldtog deur militante groepe teen die militêre regering van Mali. – Reuters

Inwoners van Mali moes die afgelope tyd van alternatiewe vervoermiddels gebruik maak weens die brandstofkrisis. Foto: Getty Images

2025-10-27 11:19:35

Trump gaan spitsberaad van Sentraal-Asiatiese leiers aanbied

Pres. Donald Trump gaan aanstaande week 'n Sentraal-Asiatiese spitsberaad aanbied, het twee lande gesê, terwyl groot moondhede meeding om invloed in die hulpbronryke streek.

Rusland se tradisionele oorheersing in die vyf voormalige Sowjet-state word uitgedaag sedert dit Oekraïne binnegeval het, met China, die Europese Unie (EU) en die VSA wat almal hul diplomatieke en ekonomiese voetspoor in die streek probeer versterk.

Volgens Kazakstan is die spitsberaad vir 6 November in Washington geskeduleer. Kirgisië het reeds aangedui dat hy die geleentheid sal bywoon. Hoofde van die ander drie state – Tadjikistan, Turkmenistan en Oesbekistan – het nog nie hul deelname bevestig nie.

Die vyf lande strek oor 'n gebied so groot soos die EU, maar is die tuiste van slegs 80 miljoen mense. – AFP

2025-10-27 11:24:33

Trump mik nie na visepresidentskap in 2028

Pres. Donald Trump het Maandag uitgesluit dat hy vir die visepresidentskap in die 2028 Amerikaanse verkiesing sal staan, 'n benadering wat sommige van sy ondersteuners geopper het om die Republikeinse president toe te laat om 'n bykomende termyn in die amp te dien.

"Ek sou toegelaat word om dit te doen," het Trump aan verslaggewers gesê aan boord van sy vliegtuig, Air Force One. Maar hy het bygevoeg: "Ek sou dit nie doen nie. Ek dink dis te oulik. Ja, ek sou dit uitsluit, want dis te oulik. Ek dink die mense sou nie daarvan hou nie. Dis te oulik. Dis nie – dit sou nie reg wees nie."

Niemand mag 'n derde keer tot die Amerikaanse presidentskap verkies word nie, ingevolge die 22ste Wysiging van die Amerikaanse Grondwet. – Reuters

2025-10-27 11:32:15

Oorlogskip onderweg...

Die Amerikaanse oorlogskip USS Gravely sal Trinidad en Tobago besoek vir gesamentlike oefeninge naby die kus van Venezuela te midde van die VSA se veldtog teen vermeende dwelmsmokkelaars in die streek. Foto: Getty Images

2025-10-27 12:01:41

Kameroen se veteraanleier wen omstrede agtste keer in verkiesing

Pres. Paul Biya van Kameroen is volgens amptelike uitslae, wat Maandag aangekondig is, vir ’n agtste termyn herkies. Biya (92) kon 53,7 % van die stemme in ‘n verkiesing inpalm.

Sedert verlede week het ondersteuners van Issa Tchiroma, wat volgens sy eie telling 54,8 % van die stemme teenoor 31,3 % vir Biya gewen het, die strate ingevaar om sy beweerde oorwinning te verdedig.

Vier mense is Sondag dood in botsings tussen veiligheidsmagte en ondersteuners van die opposisie in die ekonomiese hoofstad, Douala. Ontleders het verwag dat Biya, die wêreld se oudste dienende staatshoof, nog ’n termyn van sewe jaar sou verseker in ’n stelsel wat volgens kritici toenemend gemanipuleer word.

 Biya is slegs die tweede staatshoof wat Kameroen lei sedert onafhanklikheid in 1960 van Frankryk verkry is. – AFP

2025-10-27 12:03:26

Israel sal nie Turkse troepe duld nie

Israel sal nie die teenwoordigheid van Turkse gewapende magte in die Gasastrook aanvaar ingevolge 'n Amerikaanse plan om oorlog in die Palestynse gebied permanent te beëindig nie. So sê Gideon Saar, Israeliese minister van buitelandse sake.

Pres. Donald Trump se plan sluit 'n internasionale mag in om te help om 'n brose skietstilstand te verseker wat die afgelope maand begin het en twee jaar van oorlog tussen Israel en die Palestynse militante groep Hamas beëindig het.

Dit is egter nog onduidelik of Arabiese en ander state gereed sal wees om troepe aan die internasionale mag toe te staan. "Lande wat gewapende magte wil, of gereed is om te stuur, moet ten minste regverdig teenoor Israel wees," het Saar gesê. – Reuters

2025-10-27 12:16:56

10 in Parys verhoor vir ‘kuberteistering’ van Brigitte Macron

Tien mense staan Maandag in Parys tereg op die beweerde seksistiese kuberteistering van Brigitte Macron, in die jongste saak wat aangevuur is deur ongegronde geslagsbewerings wat jare lank teen die Franse presidentsvrou gemaak is.

Die verhoor volg nadat sy en pres. Emmanuel Macron in Julie 'n lasterregsgeding in die VSA aanhangig gemaak het in verband met 'n gerug wat aanlyn versprei is dat sy as 'n man gebore is. Agt mans en twee vroue, tussen 41 en 60 jaar oud sal in die strafhof verhoor word.

Ander hoëprofielvroue in die politieke sfeer, insluitend die voormalige Amerikaanse presidentsvrou Michelle Obama, die Amerikaanse voormalige visepres. Kamala Harris en die Nieu-Seelandse oud-premier Jacinda Ardern, was ook al die teiken van disinformasie oor hul geslag of seksualiteit. – AFP

Brigitte Macron. Foto: Getty Images

2025-10-27 12:55:57

Pous gaan Turkye, Libanon besoek

Pous Leo XIV sal later vanjaar agt dorpe en stede in Turkye en Libanon besoek, sê die Vatikaan. Dit sal Leo se eerste reis as pous buite Italië wees. Hy sal na verwagting pleidooie vir vrede oor die streek heen doen.

Leo, die eerste Amerikaanse pous, sal Turkye van 27 tot 30 November besoek en dan van 30 November tot 2 Desember in Libanon wees.

Leo se voorganger, pous Franciskus, het beplan om albei lande te besoek, maar kon nie gaan nie weens sy verswakkende gesondheid. Franciskus is op 21 April oorlede en Leo is op 8 Mei tot die nuwe pous verkies. – Reuters

2025-10-27 13:01:18

Charles onthul eerste LGBT-gedenkteken vir gewapende magte

Koning Charles van Brittanje het Maandag 'n gedenkteken onthul wat toegewy is aan lesbiese, gay, biseksuele en transgender militêre personeel. Dit is Charles se eerste amptelike betrokkenheid by die LGBT-gemeenskap.

Die staatsgefinansierde Ope Brief-gedenkteken is ontwerp om diegene wat tans as militêre personeel dien, te vereer en hulde te bring aan veterane wat geraak is deur die Britse weermag se verbod op LGBT-offisiere, wat in 2000 opgehef is, 33 jaar nadat manlike homoseksualiteit gedeeltelik in Engeland en Wallis gedekriminaliseer is.

Charles, opperbevelhebber van die Britse gewapende magte, het blomme gesit by die Nasionale Gedenkarboretum in Staffordshire. – Reuters

Brittanje se koning Charles woon die Gewapende Magte se toewydingsplegtigheid vir die  LGBT-gemeenskap by die Nasionale Gedenkarboretum in Alrewas, Staffordshire, Brittanje, by. Foto: Reuters

2025-10-27 13:15:52

Poetin beëindig plutoniumooreenkoms met VSA

Pres. Wladimir Poetin het Maandag 'n wet onderteken wat 'n plutonium-verwyderingsooreenkoms met Amerika beëindig, hoewel dit reeds verval het.

Die ooreenkoms was daarop gemik om te verhoed dat albei partye meer kernwapens bou. Die stap kom terwyl die betrekkinge tussen Poetin en pres. Donald Trump versleg. Trump het verlede week planne vir 'n vredesberaad met Poetin oor die oorlog in Oekraïne geskrap en gesê dit sou 'n "mors van tyd" gewees het.

Hy het 'n herskedulering uitgesluit tensy die Russiese leier hom laat weet het dat hy tot 'n ooreenkoms sou instem. Die plutoniumbestuur-en-verwyderingsooreenkoms, wat in 2000 onderteken en in 2010 gewysig is, het Moskou en Washington verbind om hul enorme voorrade plutonium uit die Koue Oorlog met 34 metrieke ton elk te verminder en dit eerder vir kernkrag te gebruik.

Poetin het Rusland se deelname aan die ooreenkoms reeds in 2016 opgeskort toe betrekkinge met Trump se voorganger Barack Obama verswak het. – AFP

2025-10-27 14:00:29

Groot in Japan

Pres. Donald Trump op die trappe van Air Force One nadat hy Maandag op die Haneda-lughawe in Tokio aangekom het. Foto: AFP

2025-10-27 14:11:42

Israel hef noodtoestand op vir gemeenskappe langs Gasastrook

Israel het die noodtoestand vir gebiede naby die grens met die Gasastrook opgehef, die eerste keer sedert Hamas se aanval in Oktober 2023, het Israel Katz, die minister van verdediging, Maandag aangekondig.

“Ek het besluit om die aanbeveling van die (Israeliese weermag) te aanvaar en om, vir die eerste keer sedert 7 Oktober 2023, die spesiale status op die tuisfront op te hef,” lui ’n verklaring van Katz se kantoor.

Die besluit “weerspieël die nuwe veiligheidsrealiteit in die suide van die land” en kom ná ’n skietstilstand wat op 10 Oktober in werking getree het. – AFP

2025-10-27 14:38:08

Trump gee Kanada vir eers koue skouer oor handel

Pres. Donald Trump het Maandag gesê hy gaan “vir ’n rukkie” nie met Mark Carney, Kanadese premier, vergader nie nadat Carney ’n olyftak uitgehou het om handelsonderhandelinge te hervat.

Trump het verlede week aangekondig dat hy tariewe op Kanadese goedere met ’n bykomende 10% gaan verhoog en alle handelsonderhandelinge beëindig ná ’n Kanadese teen-tariefadvertensieveldtog.

Trump het aan verslaggewers aan boord van Air Force One onderweg na Japan gesê: “Ek wil nie met hom ontmoet nie, nee. Ek gaan vir ’n rukkie nie met hom vergader nie...

“Een van die moeilikste lande om mee te onderhandel, is Kanada, al hou ek soveel van Kanada self en die mense van Kanada,” het Trump bygevoeg. – AFP

2025-10-27 15:01:17

‘My geliefde koning!’

Koning Charles van Brittanje word Maandag deur ’n lid van die publiek omhels met sy besoek aan die Lichfield-katedraal in Lichfield, Staffordshire, Engeland. Foto: Reuters

2025-10-27 15:14:03

Rusland skiet oornag 193 Oekraïense hommeltuie neer

Rusland se ministerie van verdediging het Maandag gesê hulle het oornag 193 Oekraïense hommeltuie neergeskiet, met plaaslike owerhede wat berig het dat een persoon in die aanval dood is.

Aleksandr Bogomaz, goewerneur van die grensstreek Briansk wat aan Oekraïne grens, het op Telegram gesê dat ’n minibus in die dorp Pogar getref is, wat tot die bestuurder se dood gelei en vyf passasiers beseer gelaat het.

Russiese magte het 47 hommeltuie in Briansk neergeskiet, sowel as 40 in die Moskou-streek. – AFP

2025-10-27 15:37:28

Brandstigting ontwrig hoëspoedtreinverkeer in Frankryk

Sowat 100 hoëspoedtreinritte is Maandag in Frankryk ontwrig nadat kabels aan die brand gesteek is, onder meer tussen Parys en die suide van die land, het amptenare gesê.

Daar was geen onmiddellike aanduiding oor wie vir die brandstigting verantwoordelik is nie.

Die nasionale spoorwegoperateur het gesê 16 kabels moes vervang word in ’n strook van 25 meter lank, en spoorverkeer sal waarskynlik eers Dinsdagoggend behoorlik hervat. – AFP

2025-10-27 16:00:46

Hier kom groot moeilikheid . . .

’n Satellietbeeld wys die orkaan Melissa vroeër Maandagmiddag suidoos van Jamaika. Melissa het vroeër Maandag tot die maksimum kategorie 5 versterk, sê die Amerikaanse Nasionale Orkaansentrum. Die sentrum waarsku teen “katastrofiese oorstromings” in Jamaika. Inwoners is ook aangeraai om onmiddellik skuiling te soek. Foto: RAMMB/CIRA/AFP

2025-10-27 16:18:37

Byna 1 700 vlugte vertraag op dag 27 van VSA-regeringsluiting

Meer as 1 660 vlugte is Maandag vertraag nadat meer as 8 600 vertraagde vlugte Sondag as gevolg van die afwesigheid van vlugbeheerbeamptes op dag 27 van die Amerikaanse regeringsluiting.

Die Amerikaanse Federale Lugvaartadministrasie (FAA) het Maandag gesê tekorte aan vlugbeheerders het veral vlugte in die suidooste en by die Newark-lughawe in New Jersey beïnvloed.

Tekorte aan personeel kan ook weer vlugte Maandag by die Los Angeles Internasionale Lughawe vertraag, sê die FAA. – Reuters

2025-10-27 16:36:42

Trump onthul hy het MRI-skandering ondergaan

Pres. Donald Trump het Maandag gesê hy het met ’n onlangse hospitaalbesoek ’n MRI-skandering ontvang.

Trump, wat in Junie 80 word, is al daarvan beskuldig dat hy nie deursigtig oor sy gesondheid is nie, en sy verrassingsbesoek aan ’n mediese sentrum in Washington vroeër in Oktober, sy tweede mediese ondersoek binne ’n jaar, het verdere bespiegelinge oor sy fisieke toestand aangevuur.

"Ek het ’n MRI gekry. Dit was perfek," het Trump Maandag aan verslaggewers aan boord van Air Force One gesê. "… Die dokters het gesê dit was van die beste uitslae vir die ouderdom, van die beste verslae wat hulle nog ooit gesien het."

Trump, die oudste persoon wat ooit as Amerikaanse president ingehuldig is, wou nie sê waarom hy ondersoek is nie. – AFP

Pres. Donald Trump praat verlede week met verslaggewers by die Withuis. Foto: Getty Images via AFP

2025-10-27 17:09:07

Handel: China gekant teen ‘wet van oerwoud’

Li Qiang, premier van China, het Maandag "unilateralisme" veroordeel en gesê die wêreld moenie terugkeer na "die wet van die oerwoud" wat handel aanbetref nie. Li se opmerking is 'n duidelike verwysing na die tariewe wat deur pres. Donald Trump van Amerika teen talle lande, waaronder China, ingestel is.

Hierdie tariewe het internasionale  voorsieningskettings en markte ontwrig.

Trump en sy Chinese ampsgenoot, pres. Xi Jinping, sal Donderdag in Suid-Korea vergader om te probeer om 'n ooreenkoms te bereik wat hul voortdurende handelsoorlog sal beëindig.

"Die wêreld moenie terugkeer na die wet van die oerwoud waar die sterkes die swakkes boelie nie,” het Li gesê. – Reuters

2025-10-27 17:23:47

Mexiko, VSA kom ooreen om handelsperdatum te verleng

Pres. Claudia Sheinbaum van Mexiko het Maandag gesê sy het oor die naweek met pres. Donald Trump van Amerika gepraat en dat die twee ooreengekom het om 'n dreigende handelsperdatum vir " 'n paar weke" te verleng om hangende kwessies op te los. 

Amerika het in Julie ooreengekom om 'n verhoging in tariewe op sommige Mexikaanse goedere vir 90 dae te staak terwyl die twee lande voortgaan met gesprekke wat daarop gemik is om 'n nuwe handelsooreenkoms te bereik. Daardie pouse sou vandeesweek geëindig het.

"Ek wou seker maak dat 1 November nie aanbreek sonder dat ons gekommunikeer het nie," het Sheinbaum oor die gesprek met Trump gesê. – Reuters

2025-10-27 17:32:49

Pous gaan bid by terrein van ontploffing in Beiroet

Die Vatikaan het aangekondig dat pous Leo XIV binnekort die terrein van die verwoestende ontploffing by die Beiroet-hawe in 2020 sal besoek tydens ’n reis na Libanon en Turkye. Leo onderneem binnekort sy eerste buitelandse reis as hoof van die wêreld se 1,4 miljard Katolieke.

Die toer begin op 27 November in Turkye. Hy sal op 30 November na Libanon reis en op 2 Desember by die hawe bid waar die ontploffing die lewe van meer as 220 mense geëis het. – AFP

2025-10-27 17:39:59

Trappe na stilte...

'n Vrou klim die trappe uit van die Nasionale Kunsmuseum in Washington DC wat gesluit is weens die Amerikaanse regering se sluiting.  Foto: Reuters

2025-10-27 18:07:11

14 sterf in DRK-brand

Veertien mense is Sondag in ’n verwoestende brand in Bukavu in die ooste van die Demokratiese Republiek die Kongo (DRK) dood. Twaalf van die slagoffers was kinders. Dié stad, wat onder beheer van die Rwanda-ondersteunde M23-rebelle staan, is bekend vir sy digbevolkte houthuise teen die hange van kranse.

Die brand het in die Mosala-buurt van die Kadutu-wyk ontstaan en vinnig verskeie geboue verwoes, sê plaaslike bronne. Owerhede van sowel die Suid-Kivu-streek  as die M23-rebellegroep het die dodetal bevestig, maar die oorsaak van die brand is steeds onbekend.

Volgens Maitre Adolphe Bandeke, 'n voormalige beskermingskoördineerder, is só ’n tragedie nie ongewoon nie en word dit vererger deur onwettige elektrisiteitsverbindings, huise wat naby aan mekaar gebou is en die afwesigheid van brandbestryders. – AFP

2025-10-27 18:10:03

Hamas sal oorskot van gyselaar oorhandig

Lede van Hamas se gewapende vleuel gaan die oorskot van ‘n gyselaar wat hulle Maandag in die Gasastrook gevind het, aan Israel oorhandig. Die vind en oorhandiging van die oorskot van gyselaars in Gasa is een van die struikelblokke vir pres. Donald Trump se vredesplan.

Die oorskot van 13 gestorwe gyselaars is steeds in Gasa, met Hamas wat sê dit is moeilik om die oorskot op te spoor in die puin wat deur gevegte agtergelaat is. 

'n Woordvoerder van die Israeliese regering het Sondag gesê die Palestynse militante groep weet waar die lyke is. – Reuters

2025-10-27 18:20:23

Pous lei mis

Pous Leo XIV lei ’n mis vir die begin van die akademiese jaar ter geleentheid van die Jubileum van die Wêreld van Onderwys by die Sint Petrus-basilika in die Vatikaanstad. Foto: Reuters

2025-10-27 18:27:12

Koning Charles gespot oor sy broer

Koning Charles van Brittanje is Maandag deur 'n betoger gespot oor sy broer prins Andrew se bande met die oorlede seksoortreder Jeffrey Epstein terwyl hy koninklike aanhangers tydens 'n besoek aan 'n katedraal in Brittanje gegroet het.

"Hoe lank weet jy al van Andrew en Epstein?" het die man geskree terwyl die monarg buite die Lichfield-katedraal in die noordweste van Engeland naby Birmingham rondgeloop het.

Hoewel Andrew (65) vandeesmaand gesê het dat hy nie meer sy titel as hertog van York  sal gebruik nie ná jare lange ondersoeke na sy optrede en sy verbintenis met Epstein, het vrae oor die prins – en wat die koningshuis van die gebeure geweet het – sedertdien toegeneem. – Reuters

2025-10-27 19:00:33

‘Nee, asseblief, julle!’

Agente van die Amerikaanse agentskap vir immigrasie- en doeane-afdwinging (ICE) neem Maandag ’n immigrant in hegtenis buite ’n immigrasiehof in Manhattan, New York.  Foto: Reuters

2025-10-27 19:09:50

Ivoorkus-president verkies tot 4de termyn, teenstanders kon nie deelneem

Pres. Alassane Ouattara (83) van die Ivoorkus is tot ’n vierde termyn verkies met ’n oorweldigende 89,77% in ’n verkiesing waaraan sy twee grootste teenstanders nie kon deelneem nie, het die land se verkiesingskommissie Maandag gesê.

Die entrepreneur Jean-Louis Billon was tweede met 3,09% van die stemme, het die kommissie se president aangekondig.

Die stempersentasie was 50,10%. – AFP

2025-10-27 19:37:04

Malta besnoei belasting vir dié ouers om geboortesyfer te verhoog

Malta het Maandag belastingverlagings aangekondig vir ouers van twee of meer kinders as deel van ’n regeringspoging om die eiland se lae inheemse geboortesyfer teen te werk.

Die geboortesyfer is die "grootste uitdaging" wat die land in die gesig staar, het Clyde Caruana, minister van finansies, aan die parlement gesê. Malta het in 2023 die laagste geboortesyfer in die Europese Unie gehad.

Caruana het aangekondig dat ouers van twee of meer kinders vanaf 2026 elkeen nie inkomstebelasting sal betaal op die eerste sowat R371 000 van hul inkomste nie. Teen 2028 sal dit tot sowat R500 000 per persoon styg. Die belastingverlagings sal van krag bly totdat die kinders 23 jaar oud is. – Reuters

2025-10-27 20:06:09

Na waters wat heilig is

Hindoe-gelowiges bid Maandag tot die Songod ter geleentheid van die Chhath Puja-fees op die oewer van die Brahmaputrarivier in Guwahati in die noordooste van Indië. Foto: AFP

2025-10-27 20:14:20

Orkaan Melissa haal winde van tot 282 km/h, versterk tot kategorie 5

Die orkaan Melissa, op koers om Jamaika later Maandag of vroeg Dinsdag te tref, het teen Maandagaand winde van tot 282 km/h gehaal.

Melissa het vroeër Maandag tot die maksimum kategorie 5 versterk, sê die Amerikaanse Nasionale Orkaansentrum. Die sentrum waarsku teen katastrofiese winde en oorstromings in Jamaika in wat moontlik die grootste storm tot nog toe kan wees.

Volgens die sentrum sal Melissa die ooste van Kuba dalk Dinsdagnag tref, en die Bahamas en die Turks- en Caicos-eilande teen Woensdag.

Ure nadat hy verpligte ontruimings vir dele van suidelike Jamaika beveel het, het Andrew Holness, premier van Jamaika, buitelandse hulp versoek en gewaarsku oor skade aan huise en infrastruktuur soos brûe, paaie, hawens en lughawens. “Geen infrastruktuur in die streek kan ’n kategorie 5 (-storm) weerstaan nie.”

Ondanks waarskuwings sê sommige inwoners hulle is huiwerig om hul huise te verlaat uit vrees vir plundering. – Reuters

’n Satellietfoto wys die orkaan Melissa vroeër Maandag suidoos van Jamaika. Melissa het tot die maksimum kategorie 5 versterk, sê die Amerikaanse Nasionale Orkaansentrum. Foto: RAMMB/CIRA/AFP

2025-10-27 20:36:41

Twee broers sterf in Israeliese aanval in Libanon

Twee broers is Maandag dood in ’n Israeliese aanval in suidelike Libanon, wat die totale dodetal van sulke aanvalle sedert Donderdag op 13 te staan bring, sê amptenare.

Israel se lugmag het die laaste paar dae sy lugaanvalle verskerp en gesê hy teiken lede van die Iran gesteunde Hezbollah en sy infrastruktuur, ondanks ’n skietstilstandooreenkoms met Libanon wat in November 2024 bereik is.

Libanon se gesondheidsdepartement sê in ’n verklaring die twee broers is in die dorp Al-Baijad in die Tire-distrik dood. – AFP

2025-10-28 03:46:07

Trump loof nuwe Japannese premier

Pres. Donald Trump het Dinsdag in Tokio Sanae Takaitsji, Japan se eerste vroulike premier, geprys.

Trump het Sanae se belofte verwelkom om ’n militêre opbou te versnel en ooreenkomste oor handel en kritieke minerale te onderteken. Die nuwe premier sal na verwagting ook ’n pakket van Amerikaanse beleggings aanbied.

Takaitsji, ’n noue bondgenoot van Trump se vriend en gholfmaat, die oorlede Japannese leier Sjinzo Abe, het ook gesê sy sal Trump vir die Nobelprys vir vrede benoem, sê Karoline Leavitt, woordvoerder van die Withuis. – Reuters

Pres. Donald Trump en Sanae Takaitsji, premier van Japan, Dinsdag in Tokio, Japan. Foto: Getty Images

2025-10-28 04:00:30

Poetin oor Noord-Korea: Alle verloop volgens plan

Pres. Wladimir Poetin van Rusland het in gesprekke met Choe Son-hui, leier van buitelandse sake van Noord-Korea, gevra om aan haar land se leier te sê “alles verloop volgens plan” in bilaterale betrekkinge.

Die twee het Maandag in Rusland vergader. Poetin en Kim Jong-un, Noord-Korea se leier, het verlede jaar ’n strategiese-vennootskapsverdrag gesluit.

“Ons het gepraat oor besonderhede van ons betrekkinge en vooruitsigte vir ontwikkeling,” het Poetin aan Choe gesê, met verwysing na vorige gesprekke met Kim. – Reuters

2025-10-28 04:13:03

Prokureurs vra vermindering van Bolsonaro se tronkstraf

Prokureurs vir oudpres. Jair Bolsonaro van Brasilië het Maandag sy appèlaansoek ingedien om sy tronkstraf van 27 jaar te verminder.

Bolsonaro is verlede maand aan vyf aanklagte skuldig bevind wat met die beplanning van ’n staatsgreep verband hou om ná die verkiesing in 2022 aan die bewind te bly.

Bolsonaro se prokureurs versoek ’n hersiening van dele van die skuldigbevinding, insluitend die tronkstraf. Die mosie dui nie aan hoeveel van ’n vermindering in tronkstraf Bolsonaro se prokureurs versoek het nie.

Bolsonaro ontken skuld. – Reuters

2025-10-28 04:29:42

Verhoor begin van man wat glo oudpremier van Japan doodskiet

’n Man wat daarvan beskuldig word dat hy Sjinzo Abe (67), voormalige premier van Japan, doodgeskiet het, se verhoor sal Dinsdag begin.

Tetsoeja Jamagami (45) is in Julie 2022 in hegtenis geneem nadat hy na bewering met ’n tuisgemaakte geweer op Abe op ’n verkiesingsaamtrek geskiet het.

Jamagami het Abe, die land se langs dienende premier, vir die bevordering van die Verenigingskerk kwalik geneem. Jamagami koester 'n wrok teen hierdie godsdienstige groep nadat sy ma sowat 100 miljoen jen daaraan geskenk het. – Reuters

2025-10-28 05:09:42

Israel ontvang oorskot van gyselaar uit Gasa

Israel het Maandag gesê die Rooi Kruis het die lyk van nog ’n gyselaar uit die Gasastrook aan die Israeliese weermag oorhandig. Dit sal beteken dat die oorskot van 12 gyselaars steeds in die Gasastrook is.

Hamas sê dit is moeilik om die oorskot in die puin op te spoor wat deur die gevegte gelaat is. – Reuters

2025-10-28 05:19:05

Nog 'n VN-personeellid deur Hoethi’s aangehou

Nog ’n personeellid van die Verenigde Nasies (VN) word deur die Hoethi’s in Jemen aangehou.

Die jongste aanhouding kom nadat Hoethi-veiligheidsmagte Sondag verskeie kantore van die VN in Sanaa, Jemen, binnegegaan het, sê Stéphane Dujarric, woordvoerder van die VN se sekretaris-generaal.

Hy sê verder die Hoethi’s het internettegnologie en kommunikasietoerusting en -bates gekonfiskeer.

Minstens 59 VN-personeellede word deur die Hoethi’s aangehou, sommige al jare lank. – Reuters

2025-10-28 05:32:35

Minstens 16 dood in busongeluk in Bolivië

Minstens 16 mense is Maandagoggend dood en 32 beseer nadat ’n bus sowat 300 m teen 'n helling in Sentraal-Bolivië afgerol het.

Die ongeluk het in Morochata plaasgevind, ongeveer twee en ’n half uur van die stad Cochabamba af.

Kol. Fernando Aragon, adjunkdirekteur van die Cochabamba-vervoerdepartement, het die dodetal aan verslaggewers bevestig. Hy beskryf die ongeluk as “een van die mees komplekse gevalle" aangesien dit ’n bus vol passasiers behels wat in ’n moeilik bereikbare gebied neergestort het. – AFP

2025-10-28 06:13:40

Aardbewing tref weer Turkse dorp

’n Aardbewing van 6,1 het die dorp Sindirgi in die weste van Turkye Maandag laat getref.

Die aardbewing het om 22:48 plaaslike tyd plaasgevind en is tot in Istanboel en Izmir gevoel, sê die owerhede.

Daar was geen onmiddellike berigte van slagoffers nie. Drie geboue en ’n winkel het ineengestort, wat ná die vorige aardbewing op 10 Augustus verlate gelaat is. In dié aardbewing, ook van 6,1, is een persoon dood en tientalle beseer. – AFP

2025-10-28 06:31:14

2 dood in ontploffing by Australiese myn

Twee werkers is Dinsdag dood en een beseer in ’n ondergrondse ontploffing by ’n silwer-, sink- en loodmyn in Nieu-Suid-Wallis, Australië.

Die voorval het in die afgeleë myndorp Cobar, sowat 700 km noordwes van Sydney, plaasgevind.

Die polisie sê ’n man in sy 60’s en ’n vrou in haar 20’s is dood, terwyl ’n tweede vrou in haar 20’s inderhaas na die hospitaal geneem is vir geringe beserings en skok. Die slagoffers is nog nie amptelik uitgeken nie en die oorsaak van die ontploffing is nog nie aangedui nie. – Reuters

2025-10-28 06:54:45

3 militante in besette Wesoewer doodgeskiet

Israeliese veiligheidsmagte het Dinsdag drie Palestynse militante in die besette Wesoewer doodgemaak.

Die magte het op die militante geskiet wat aanvalle in die gebied van die Jenin-vlugtelingkamp beplan het, volgens die Israeliese polisie en weermag.

Daar was geen onmiddellike kommentaar van Palestynse amptenare nie. – Reuters

2025-10-28 07:34:56

Man beken skuld vir moord op Japan se langsdienende premier

Die man wat daarvan beskuldig word dat hy Sjinzo Abe (67), voormalige premier van Japan, doodgeskiet het, het Dinsdag skuld beken.

Vroeër is berig Tetsoeja Jamagami (45) is in Julie 2022 in hegtenis geneem nadat hy na bewering met ’n tuisgemaakte geweer op Abe op ’n verkiesingsaamtrek geskiet het.

Abe was die land se langsdienende premier.

“Dit is waar dat ek dit gedoen het,” het Jamagami, wat kalm voorgekom het, aan die hof gesê, het die openbare uitsaaier NHK berig. – Reuters

Sjinzo Abe, wyle voormalige premier van Japan, praat op ’n mediakonferensie in Tokio, Japan, op 28 Augustus 2020. Foto: Getty Images/Pool

2025-10-28 07:42:57

Gesprekke tussen Afganistan, Pakistan eindig sonder ooreenkoms

Gesprekke tussen Afganistan en Pakistan in Istanbul om ’n langtermyn-skietstilstand te beding, het sonder ’n oplossing geëindig, het twee bronne Dinsdag gesê.

Die gesprekke het ten doel gehad om blywende vrede tussen die buurlande te bereik nadat tientalle mense onlangs langs hul grens dood is.

Albei lande het ingestem tot ’n skietstilstand wat op 19 Oktober in Doha bemiddel is.

Elkeen blameer die ander vir die mislukking om ’n langtermynoplossing te bereik. – Reuters

2025-10-28 07:55:46

Musk stel Grokipedia bekend weens Wikipedia se ‘ideologiese vooroordeel’

Elon Musk se maatskappy xAI het Maandag Grokipedia bekend gestel om mee te ding met die aanlyn ensiklopedie Wikipedia, wat hy van ideologiese vooroordeel beskuldig.

Die webwerf, wat weergawe 0.1 genoem word, het teen Maandagaand meer as 885 000 artikels gehad.

“Die doel van Grok (xAI se kletsbot) en Grokipedia.com is die waarheid, die hele waarheid en niks anders as die waarheid nie,” het Musk gesê. – AFP

2025-10-28 08:49:28

Meer as 2 000 burgerlikes glo binne 2 dae deur RSF in Soedan tereggestel

Bondgenote van die Soedannese weermag, die Gesamentlike Magte, het die paramilitêre Blitsondersteuningsmag (RSF) daarvan beskuldig dat hy “meer as 2 000 ongewapende burgerlikes tereggestel het”.

Die magte beweer die teregstellings is uitgevoer sedert die RSF Sondag beheer oor die stad El-Fasjer in die weste geneem het namate kommerwekkende gerugte van gruweldade na vore kom.

“Die meeste van die slagoffers is vroue, kinders en bejaardes,” het die Gesamentlike Magte Dinsdag gesê. – AFP

2025-10-28 08:55:39

Ligte vliegtuig met 12 aan boord stort neer in Kenia

’n Ligte vliegtuig wat vanaf Kenia se kus onderweg was, het Dinsdag neergestort, en daar word gevrees dat al 12 mense aan boord dood is, volgens die land se lugvaartowerheid.

Die ligte vliegtuig was op pad na Kichwa Tembo, ’n private vliegveld in die Maasai Mara Nasionale Park, toe dit omstreeks 05:30 plaaslike tyd neergestort het.

Die lugvaartowerheid het geen verdere besonderhede verskaf nie.

Regeringsagentskappe is reeds op die toneel om die oorsaak van die ongeluk vas te stel. – AFP

2025-10-28 09:09:15

Duisende ontruim weens rekordhoeveelheid reën in Viëtnam

Duisende mense in Viëtnam het hul huise ontruim nadat ’n rekordhoeveelheid reën van meer as 1 m binne 24 uur die sentrale stad Hoee oorstroom het.

Drie meetstasies in die stad het reënval van 1 m tot 1,7 m in ’n tydperk van 24 uur van Sondag tot Maandag aangeteken, het die ministerie van omgewingsake gesê.

Die vorige rekord binne 24 uur was 0,99 m in 1999 ook in Hoee. Foto: AFP

’n Lugfoto Maandag wys vloedwater wat die Keiserlike Stad in Hoee oorstroom. Foto: AFP

2025-10-28 09:27:37

Inwoners gewaarsku oor erns van orkaan Melissa

Amptenare in Jamaika het die publiek aangemoedig om na hoërliggende gebiede en skuilings te gaan voordat die orkaan Melissa Dinsdag tref.

Die kategorie 5-storm, wat die eiland se ergste tot nog toe kan wees, beweeg deur die Karibiese Eilande en het tot drie sterftes in Jamaika, drie in Haïti en een in die Dominikaanse Republiek gelei.

Die Amerikaanse Nasionale Orkaansentrum berig dat Melissa Maandag laat 240 km van Kingston af was, en ’n maksimum windspoed van 280 km/h bereik het. – AFP

2025-10-28 09:56:11

Oekraïne benodig finansiële steun van 2 tot 3 j. vir oorlog

Pres. Wolodimir Zelenski van Oekraïne sê die land benodig finansiële steun van Europa om nog twee of drie jaar teen Russiese magte te kan veg.

“Ek het vir die Europese leiers gesê dat ons nie dekades gaan veg nie, maar hulle moet wys dat hulle geruime tyd stabiele finansiële steun aan Oekraïne sal kan bied.”

Kijif is grootliks afhanklik van militêre en finansiële steun van bondgenote in die buiteland in sy oorlog teen Rusland. – AFP

2025-10-28 10:37:11

Orkaan Melissa ‘storm van die eeu vir Jamaika’

Die Wêreldmeteorologiese Organisasie (WMO) sê dat hy Dinsdag ’n katastrofiese situasie in Jamaika verwag namate die orkaan Melissa aan land kom met winde van meer as 300 km/h, kitsvloede en grondverskuiwings in die ergste storm wat die eiland hierdie eeu tref.

“Dit is ’n katastrofiese situasie wat in Jamaika verwag word,” het Anne-Claire Fontan, die WMO se spesialis in tropiese siklone, op ’n mediakonferensie in Genève gesê.

“Vir Jamaika sal dit beslis die storm van die eeu wees.” – Reuters

2025-10-28 10:59:23

Kirk-beskuldigde mag weens ‘vooroordeel’ gewone klere in hof dra

’n Regter in Utah het Maandag beslis dat die vermeende moordenaar van die Amerikaanse aktivis Charlie Kirk (31) gedurende sy verhoor gewone klere pleks van tronkklere mag dra, weens kommer oor vooroordeel van die jurie.

Tyler Robinson (22) word daarvan aangekla dat hy Kirk op 10 September tydens ’n openbare geleentheid op ’n universiteitskampus in Utah doodgeskiet het.

Hy kan die doodstraf opgelê word as hy skuldig bevind word. – AFP

2025-10-28 11:14:44

Beslissende optrede teen Hamas gevra

’n Israeliese groep wat ’n veldtog voer vir die vrylating van gyselaars wat in die Gasastrook aangehou word, het Dinsdag die owerhede versoek om "beslissend" teen Hamas op te tree. Die groep glo dat slegs die gedeeltelike oorskot van ’n Israeliese gevangene terugbesorg is.

Die Gyselaars en Vermiste Families Forum sê die gedeeltelike oorskot van ’n gyselaar wat Maandag kragtens ’n skietstilstand deur Hamas terugbesorg is, behoort aan ’n oorlede gevangene wat reeds twee jaar gelede deur die weermag herwin is.

"In die lig van Hamas se ernstige verbreking van die ooreenkoms gisteraand, kan en mag die Israeliese regering dit nie ignoreer nie. Daar moet beslissend teen hierdie oortredings opgetree word," sê die Israeliese groep. – AFP

2025-10-28 11:21:43

Oekraïners hoef nie bekommerd te wees oor energiebehoeftes, sê Zelenski

Pres. Wolodimir Zelenski sê dat Oekraïne die geld bekom het om 70% van die aardgas wat die land hierdie winter benodig, te koop en dat die Oekraïense regering die res van die finansiering sal dek.

Zelenski wil Oekraïners gerusstel dat daar hierdie winter in hul energiebehoeftes voorsien sal word nadat Rusland aanvalle op energie-aanlegte in sy oorlog in Oekraïne verskerp het.

Warm weersomstandighede het volgens Zelenski ook die land ’n hupstoot gegee deur dit toe te laat om die verhitting van woonstelle in stede te vertraag, waardeur groot hoeveelhede gas bespaar is. – Reuters

2025-10-28 11:27:11

14 000 poste by Amazon besnoei

Die Amerikaanse aanlyn kleinhandelreus Amazon het Dinsdag gesê dat hy 14 000 poste gaan afskaf om sy bedrywighede te stroomlyn terwyl hy in kunsmatige intelligensie (KI) belê.

Amazon het nie aangedui waar die besnoeiings sou plaasvind nie. Amazon sê die besnoeiings is ’n "voortsetting" van sy pogings "om selfs sterker te word deur burokrasie verder te verminder, lae te verwyder en hulpbronne te verskuif”.

“Dit is die belangrikste vir Amazon om in ons kliënte se huidige en toekomstige behoeftes te voorsien,” lui ’n verklaring. – AFP

2025-10-28 11:37:01

Toustaan by moordverhoor

’n Lugfoto wys hoe mense in ’n ry staan vir sitplekke in ’n hof in Nara, Japan, waar die moordsaak van Shinzo Abe, voormalige premier van Japan, aangehoor word. Tetsoeja Jamagami word van die moord in 2022 op Abe aangekla. Foto: Getty Images

2025-10-28 12:08:18

Dogter van Brigitte Macron getuig

Tiphaine Auziere, dogter van Brigitte Macron, Frankryk se eerste dame, sal Dinsdag in die hof getuig in haar verhoor oor ongegronde geslagsbewerings.

Die verhoor, wat in Parys aan die gang is, kom nadat Brigitte, die vrou van pres. Emmanuel Macron, ’n lastergeding aanhangig gemaak het ná valse bewerings dat sy eintlik as ’n man gebore is. Tien mense word van laster aanlyn beskuldig. – AFP

2025-10-28 12:29:38

Britse aktrise Prunella Scales sterf

Die Britse aktrise Prunella Scales, veral bekend vir haar rol as Sybil in die Britse teleivisekomedie Fawlty Towers, is op 93-jarige ouderdom oorlede, het haar familie Dinsdag gesê. Scales is Maandag "vreedsaam tuis in Londen" oorlede, het haar seuns, Samuel en Joseph, gesê.

"Sy het die dag voor haar dood nog na Fawlty Towers gekyk," sê haar seuns in ’n verklaring op X.

Vaskulêre demensie is in 2013 by Scales gediagnoseer, maar sy het etlike jare aangehou werk, insluitend saam met haar man, Timothy West, ook ’n akteur. – AFP

’n Argieffoto van 2006 van die Britse aktrise Prunella Scales. Foto: Getty Images

2025-10-28 13:03:58

Styging van medisynepryse in Brittanje ‘onvermydelik’

Die Britse regering berei voor om die "onvermydelike" styging in die koste van sommige medisyne te hanteer ná gesprekke  met die VSA oor pryse en tariewe in die farmaseutiese sektor, sê Patrick Vallance, Britse minister van wetenskap.

Pres. Donald Trump het druk op Europa geplaas om meer vir Amerikaanse medisyne te betaal terwyl groot farmaseutiese maatskappye beleggings in Brittanje gestaak het, met verwysing na 'n moeilike bedryfsomgewing.

Vallance erken Brittanje se nasionale gesondheidsdiens moet 'n tendens van dalende besteding aan medisyne omkeer. Voortgesette gesprekke met Amerika sal beteken dat die koste van sekere medisyne sal styg. "Ek dink dat 'n mate van prysverhoging onvermydelik is," het hy gesê. – Reuters

2025-10-28 13:12:53

Russiese musikant skuldig oor sy weermag ‘in onguns bring’

'n 18-jarige Russiese straatmusikant wat vroeër vandeesmaand tot byna twee weke tronkstraf gevonnis is vir die speel van 'n verbode anti-Kremlin-liedjie, is Dinsdag daaraan skuldig bevind dat sy die Russiese weermag "in onguns gebring het" en 'n boete van 30 000 roebel opgelê.

Diana Loginowa, 'n musiekstudent wat onder die naam Naoko saam met haar orkes Stoptime optree, is op 15 Oktober in hegtenis geneem nadat haar uitvoering van die gewilde liedjie "Swan Lake Cooperative" deur die Russiese rapper Noize MC, wat verbied is, op Russiese sosialemediaplatforms versprei is.

Loginowa het tronkstraf van 13 dae uitgedien vir die reël van 'n onbeplande byeenkoms. Twee van haar orkesmaats het ook kort tronkstraf uitgedien. – Reuters

2025-10-28 13:17:08

Trump kritiseer Fed-voorsitter, wil hom vervang

Pres. Donald Trump het Dinsdag gesê daar is 'n lang lys van mense wat die leisels van die Federale Reserweraad (Fed) kan oorneem. Hy het die huidige voorsitter, Jerome Powell, wie se termyn in Mei eindig, gekritiseer.

"Ons het ’n onbevoegde hoof van die Federale Reserweraad. Ons het ’n swak Fed-man, maar hy sal oor ’n paar maande uit wees en dan gaan ons iemand nuut kry," het Trump aan sakelui in Tokio gesê ten tyde van sy weeklange besoek aan Asië.

Trump se kritiek teenoor Powell gaan oor die Fed se hantering van rentekoerse. Trump verkies laer rentekoerse omdat dit ekonomiese groei aanmoedig, maar die Fed is bedoel om onafhanklik te wees van politieke invloed. – Reuters

2025-10-28 13:21:10

Soektog na oorlede gyselaars

Mense werk by 'n terrein in Chan Joenis in die suide van die Gasastrook, waar soektogte aan die gang is na oorlede gyselaars wat deur Hamas ontvoer is in die aanval op Israel op 7 Oktober 2023. Dit te midde van 'n skietstilstand tussen Israel en Hamas. Foto: Reuters

2025-10-28 14:00:51

14 sterf in VSA-aanvalle op 3 ‘dwelmbote’

’n Reeks aanvalle deur Amerikaanse magte op drie beweerde dwelmbote in die oostelike Stille Oseaan het die lewe van14 vermeende dwelmhandelaars geëis. Een het oorleef, het Pete Hegseth, Amerika se minister van oorlog, Dinsdag gesê.

Hegseth het in ’n plasing op X gesê Mexikaanse owerhede het die soek-en-reddingsoperasie vir die enkele oorlewende oorgeneem ná die drie aanvalle Maandag. – Reuters

2025-10-28 14:32:16

Apple se markwaarde nou ook meer as $4 000 miljard

Apple het Dinsdag vir die eerste keer ’n markwaarde van $4 000 miljard oortref, die derde groot tegnologiemaatskappy wat dié mylpaal bereik.

Dit kom te midde van ’n sterk vraag na Apple se nuutste iPhone-modelle, wat vrese oor sy stadige vordering in die KI-wedloop verlig het.

Apple se aandele het sedert die nuwe bekendstellings op 9 September in ’n merkwaardige ommekeer met sowat 13% gestyg.

Nvidia en Microsoft se markwaarde is ook meer as $4 000 miljard. Nvidia is tans aan die voorpunt met ’n markwaarde van meer as $4 500 miljard. – Reuters

2025-10-28 14:42:15

Die kaptein is aan boord

Pres. Donald Trump Dinsdag aan boord van die Amerikaanse vliegdekskip USS George Washington met sy besoek aan die Amerikaanse vloot se basis in Jokosoeka, Japan. Foto: Reuters

2025-10-28 15:02:41

Kameroen-opposisie verwerp president se oorwinning

Kameroen se opposisieleiers het die uitslag van vandeesweek se presidentsverkiesing, wat pres. Paul Biya se termyn met nog sewe jaar verleng, verwerp en gesê die uitslae weerspieël nie die wil van die mense nie.

Biya (92) is Maandag tot wenner van die betwiste verkiesing verklaar met meer as 53% van die stemme. Dit het gewelddadige betogings in verskeie stede ontketen.

Issa Tchiroma Bakary, Biya se hoofopponent, het vroeër gesê hy het gewen en gewaarsku dat hy geen ander uitslag sal aanvaar nie.

Sy ondersteuners het die strate ingevaar, met onlustepolisie gebots en paaie in die kommersiële hoofstad, Douala, met brandende bande en puin versper. – Reuters

2025-10-28 15:32:54

Ecuador wil militêre basis op Galápagos-eilande vestig

Pres. Daniel Noboa van Ecuador, noue Amerikaanse bondgenoot, het Dinsdag gesê sy regering kan ’n buitelandse militêre basis op die Galápagos-eilande vestig.

Die argipel van vulkaniese eilande is die tuiste van ’n verskeidenheid plant- en dierspesies waarvan baie nêrens anders gevind word nie.

Noboa het gesê dat Baltra, ’n klein eiland in die argipel, gebruik kan word om dwelm- en brandstofsmokkelary sowel as onwettige visvang te bekamp. – AFP

2025-10-28 15:42:18

Oop oë omgestamp

’n Mediese ordonnans van die polisie versorg Dinsdag ’n vrou wat mediese hulp benodig nadat federale agente haar tydens ’n betoging in Portland, Amerika, omgestamp het. Foto: Reuters

2025-10-28 16:01:34

20 sterf in operasie teen dwelms in Rio de Janeiro

Minstens 18 verdagtes en twee polisiebeamptes is Dinsdag dood in ’n enorme dwelmklopjag in Rio de Janeiro, het die Brasiliaanse owerheid gesê.

“Tot nou toe het ons 56 mense in hegtenis geneem, en 18 misdadigers is geneutraliseer,” het Claudio Castro, die goewerneur van die staat Rio, op ’n mediakonferensie gesê.

Hy het die operasie, waarin 2 500 wetstoepassers op ’n vermeende dwelmsmokkelnetwerk in ’n favela in Rio toegeslaan het, as die “grootste in die geskiedenis” van die staat beskryf. – AFP, Reuters

2025-10-28 16:32:45

Netanyahu beveel onmiddellike aanvalle op Gasastrook

Benjamin Netanyahu, die Israeliese premier, het Dinsdag die weermag opdrag gegee om intense aanvalle op die Gasastrook uit te voer nadat hy Hamas daarvan beskuldig het dat hulle die skietstilstand geskend het.

“Ná konsultasies het premier Netanyahu die weermag opdrag gegee om onmiddellik kragtige aanvalle in die Gasastrook uit te voer,” lui ’n verklaring van sy kantoor.

Dit kom kort nadat Hamas glo slegs die gedeeltelike oorskot van ’n Israeliese gyselaar aan Israel terugbesorg het. – AFP

2025-10-28 16:50:34

Hamas staak gyselaar-oorhandiging weens Israliese ‘skendings’

Hamas se gewapende vleuel het gesê hy stel die oorhandiging uit van die oorskot van nog ’n gyselaar wat vir Dinsdagaand geskeduleer was ná wat hulle “skendings” van die skietstilstand deur Israel noem.

Hamas se aankondiging het gekom enkele minute nadat Benjamin Netanyahu, die Israeliese premier, sy weermag opdrag gegee het om intense aanvalle op die Gasastrook uit te voer en die militante groep daarvan beskuldig het dat hulle die wapenstilstandsooreenkoms verbreek het. – AFP

2025-10-28 16:51:50

Hopelik vrede in ons tyd

Pous Leo XIV (middel) woon Dinsdag in die Colosseum in Rome, Italië, ’n intergeloofbyeenkoms by om vir vrede te bid. Foto: Reuters

2025-10-28 17:09:34

Klimaatsverandering sal nie tot einde van mensdom lei, meen Bill Gates

“Klimaatsverandering sal nie tot die mensdom se ondergang lei nie,” sê die miljardêr-filantroop Bill Gates.

Deur op wêreldwye siektes en armoede te fokus, sal arm mense beter voorberei vir ’n warmer aarde, skryf Gates in ’n brief. Die brief, gepubliseer voor die COP30-klimaatberaad in Brasilië, beklemtoon die belang van klimaatsaanpassing en menslike ontwikkeling. Gates erken kritiek oor sy eie koolstofvoetspoor, maar benadruk ook dat hoewel klimaatsverandering wel “ernstige” gevolge het, mense sal voortgaan om te floreer.

Sy “drie waarhede oor klimaat” sluit in dat klimaatsverandering nie die beskawing sal beëindig nie, temperatuur nie die beste maatstaf van vooruitgang is nie en dat gesondheid en voorspoed die beste beskerming bied teen klimaatsversteuring. Gates glo tegnologie sal toekomstige oplossings bring. – AFP

Bill Gates Foto: Getty Images

2025-10-28 17:16:40

Netanyahu beveel ‘kragtige aanvalle’ ná Hamas glo ‘skietstilstand verbreek’

Benjamin Netanyahu, premier van Israel, het die weermag beveel om kragtige aanvalle in die Gasastrook uit te voer, het hy Dinsdag gesê nadat hy die militante groep Hamas daarvan beskuldig het dat hy die skietstilstand in die Palestynse gebied verbreek het.

’n Verklaring van Netanyahu se kantoor het nie ’n spesifieke rede vir die beplande aanvalle gegee nie.

Hamas het die skietstilstand verbreek deur ’n aanval op Israeliese magte in ’n gebied onder Israeliese beheer uit te voer, sê ’n Israeliese militêre beampte. “Dis nog ’n blatante verbreking van die skietstilstand.” – Reuters

2025-10-28 17:25:02

Orkaan Melissa tref Jamaika met winde van 295 km/h

Die orkaan Melissa het Jamaika Dinsdag getref met woeste winde en stortreën.

Volgens kenners is dit die kragtigste storm tot nog toe wat die eiland getref het. Waarskuwings oor rampspoedige oorstromings en lewensgevaarlike toestande is vroeër uitgereik.

Die maksimum volgehoue windsnelheid van die storm was 295 km/h. Kategorie 5-orkane is die hoogste op die Saffir-Simpson-skaal en dui orkaanwinde aan van sterker as 252 km/h. Dis genoeg om geboue te beskadig, bome te ontwortel en grootskaalse verwoesting te saai.

Jamaika lê in die orkaangordel van die Atlantiese Oseaan en hoewel orkane gereeld voorkom, is ’n kategorie 5-storm seldsaam en besonder gevaarlik. – AFP

2025-10-28 17:59:30

Orkaan-skade in Jamaika

Die takke van ontwortelde bome versper ’n pad in Gordon Town, Jamaika, nadat die orkaan Melissa die gebied getref het.

Foto: Reuters

2025-10-28 18:06:12

Israel voer minstens drie lugaanvalle op Gasastrook uit, sê agentskap

Israel het Dinsdag minstens drie lugaanvalle op die Gasastrook uitgevoer kort nadat Benjamin Netanyahu, premier van Israel, sy weermag beveel het om nuwe aanvalle uit te voer, sê die burgerlike beskermingsagentskap in die Gasastrook.

“Die besettingsmag bombardeer nou die Gasastrook met minstens drie lugaanvalle, ondanks die skietstilstandooreenkoms,” sê Mahmoed Bassal, woordvoerder van die agentskap.

Getuies het ook bevestig dat hulle die ontploffings gehoor het. Die jongste aanvalle volg kort op Netanyahu se bevel vir “kragtige” nuwe optrede ná bewerings van die verbreking van die skietstilstand deur Hamas. – AFP

2025-10-28 18:15:05

Gasa-lugaanvalle: Hamas het Israeliese soldate aangeval, sê minister

Hamas het Israeliese troepe aangeval, ondanks ’n skietstilstand in die Gasastrook, sê Israel Katz, dié land se minister van verdediging.

Volgens Katz sal Hamas ’n hoë prys daarvoor betaal. “Die terreurorganisasie Hamas sal ’n swaar prys betaal vir die aanval op Israeliese soldate in die Gasastrook en die verbreking van die ooreenkoms om die oorskot van die gyselaars terug te besorg.”

Benjamin Netanyahu, premier van Israel, het vroeër die weermag beveel om aanvalle op die Gasastrook uit te voer nadat hy Hamas daarvan beskuldig het dat die groep die Amerikaans bemiddelde skietstilstand verbreek het. – AFP

2025-10-28 18:27:31

Skynskietgeveg

Lede van Duitsland se gewapende magte neem deel aan oefeninge naby München in Duitsland. Foto: Getty Images

2025-10-28 18:37:45

Gasa-aanvalle: Hamas wou glo oorskot van Israeliese gyselaar terugbesorg

Israeliese vegvliegtuie het Dinsdag aanvalle op ’n gebied naby die Al-Sjifa-hospitaal, die grootste operasionele hospitaal in die noorde van die Gasastrook, uitgevoer.

Die aanvalle is die jongste geweld in ’n brose drie weke oue skietstilstand en het gevolg op ’n verklaring van Benjamin Netanyahu, premier van Israel, se kantoor dat hy onmiddellike aanvalle beveel het.

Hamas het vroeër gesê hy hou by die skietstilstand se bepalings en beskuldig Netanyahu daarvan dat hy verskonings soek om van Israel se verpligtinge af te wyk.

Hamas wou Dinsdag die oorskot van ’n vermiste gyselaar oorhandig wat in ’n tonnel in die Gasastrook gevind is, maar het die oorhandiging uitgestel weens Israel se beweerde verbrekings van die skietstilstand. – Reuters

2025-10-28 19:01:37

Dodetal in dwelmklopjag in Rio styg tot 64

’n Enorme dwelmklopjag in Rio de Janeiro, Brasilië, het luidens die jongste syfers wat deur ’n plaaslike veiligheidsbron verskaf is, die lewe van minstens 64 mense geëis.

Volgens ’n bron van die Rio-staat se veiligheidsdienste sluit die dodetal vier polisiebeamptes in. Vroeër is die dodetal as 20 aangedui, onder wie twee polisiebeamptes.

Tientalle vermeende lede van ’n dwelmsmokkelnetwerk is ook in hegtenis geneem.

Claudio Castro, die goewerneur van die staat Rio, het vroeër op ’n mediakonferensie gesê die operasie, waarin 2 500 wetstoepassers op ’n vermeende dwelmsmokkelnetwerk in ’n favela in Rio toegeslaan het, is die “grootste in die geskiedenis” van die staat. – AFP

Polisiebeamptes bewaak Dinsdag vermeende lede van ’n dwelmsmokkelnetwerk wat in hegtenis geneem is in operasie in ’n favela in Rio de Janeiro, Brasilië. Foto: AFP

2025-10-28 19:33:38

Hamas ontken hy val Israeliese soldate aan

Hamas het Dinsdagaand verantwoordelikheid ontken vir ’n aanval op Israeliese soldate in die stad Rafah in die suide van die Gasastrook wat Israel genoop het om hernude aanvalle uit te voer.

Die militante Palestynse groep het ook in ’n verklaring gesê hy is steeds verbind tot die Amerikaans bemiddelde skietstilstand-ooreenkoms in die Gasastrook.

Vroeër Dinsdag het Israeliese media berig oor ’n skietgeveg tussen Israeliese magte en Hamas-vegters in Rafah. Israel se weermag het nie op ’n versoek om kommentaar oor die berigte gereageer nie. – Reuters

2025-10-28 19:43:19

Trane voor die storm

’n Vrou huil Dinsdag terwyl inwoners per bus uit die strandoord Playa Siboney, naby Santiago de Cuba, Kuba, na veiligheid gebring word in afwagting op die aankoms van orkaan Melissa. Die orkaan sou laat Dinsdagaand die oostelike punt van Kuba tref. Foto: AFP

2025-10-28 20:02:28

Trump moet druk op Xi laai oor steun aan Rusland – Zelenski

Pres. Wolodimir Zelenski van Oekraïne het die Amerikaanse president aangemoedig om druk op pres. Xi Jinping van China uit te oefen om sy ondersteuning aan Rusland in te perk wanneer die twee supermoonthede se leiers later vandeesweek vergader.

“Ek dink dit kan een van (pres. Donald Trump se) sterk stappe wees, veral as China gereed is om invoer te verminder ná hierdie beslissende sanksies,” het Zelenski Dinsdag aan joernaliste gesê.

Trump het verlede week sanksies teen twee groot Russiese oliemaatskappye ingestel en dring by kopers van Russiese olie en gas – spesifiek China en Indië – aan om hul aankope te verminder. – AFP

2025-10-28 20:20:50

Skietstilstand in Gasastrook hou, sê Vance

Visepres. JD Vance van Amerika het Dinsdag gesê die skietstilstand in die Gasastrook hou ten spyte van Israel se aanvalle op die stad Gasa en sowel Israel as Hamas wat mekaar van skendings beskuldig.

“Die skietstilstand hou. Dit beteken nie dat daar nie klein skermutselings hier en daar gaan wees nie,” het Vance aan verslaggewers gesê.

“Ons weet dat Hamas, of iemand anders in Gasa, Israeliese soldate aangeval het. Ons verwag dat Israel gaan reageer, maar ek dink die president (Trump) se vrede gaan bly staan, ten spyte daarvan.” – Reuters

2025-10-28 20:35:33

‘Klasgeld moet val!’

’n Student in Lissabon, Portugal, skree Dinsdag slagspreuke tydens ’n betoging teen ’n voorgestelde verhoging in klasgelde in die regering se 2026-begroting. Foto: Reuters

2025-10-29 03:31:32

Orkaan Melissa tref Jamaika, beweeg nou na Kuba

Orkaan Melissa het ’n pad van verwoesting deur Jamaika geskeur nadat dit Dinsdag as een van die kragtigste orkane tot nog toe die land bereik het.

Die orkaan het die eilandnasie met wrede winde en stortreën geteister voordat dit na Kuba voortgestorm het.

Die omvang van Melissa se skade in Jamaika was nog nie duidelik nie omdat ’n omvattende assessering dae kan neem.

Op sy hoogtepunt het die storm hewige volgehoue winde van 300 km/h gehad. 

Onmiddellike besonderhede rakende sterftes of beserings was nie beskikbaar nie. – Reuters

’n Man pas beeste op aan die kuslyn van Santiago de Cuba, Kuba, voor orkaan Melissa toeslaan. Foto: Reuters

2025-10-29 03:50:51

9 dood, 5 vermis ná rekordvolume reën in Viëtnam

Minstens nege mense is dood en vyf word vermis in Sentraal-Viëtnam weens vloede wat deur ’n rekordvolume reën veroorsaak is, het die regering se rampbestuursagentskap Woensdag gesê.

Meer as 103 000 huise is oorstroom, meestal in Hwê en Hoi An.

Duisende mense in Viëtnam het die laaste paar dae hul huise ontruim nadat reën van meer as 1 meter diep binne 24 uur tussen Sondag en Maandag die stad Hwê oorstroom het. – Reuters

2025-10-29 03:58:07

Trump land in Suid-Korea, handelsooreenkoms hoog op agenda

Pres. Donald Trump het Woensdag in Suid-Korea geland vir die laaste deel van sy besoek aan Asië.

Trump, wat uit Tokio aangekom het, sal na verwagting op ’n spitsberaad uitvoerende hoofde toespreek.

Die hoofitem op Woensdag se agenda sal die onopgeloste handelsooreenkoms tussen Amerika en Suid-Korea wees.

Trump sal Donderdag met Xi Jinping, leier van China, samesprekings voer, en die vooruitsig van die gesprekke het reeds wêreldmarkte versterk. – Reuters

2025-10-29 04:08:04

Indië gaan 500 uit Thailand repatrieer wat vlug ná kuberbedrog in Mianmar

Indië beplan om ’n vliegtuig te stuur om nagenoeg 500 van sy burgers te repatrieer wat oor die grens na Thailand gevlug het ná ’n militêre klopjag op ’n berugte sentrum in Mianmar waar aanlyn bedrog gepleeg word.

Die klopjagte in die KK Park-kompleks het ’n groot getal mense, meestal buitelandse burgers wat daar gewerk het, na die Thaise grensdorp Mae Sot gedryf.

Meer as 1 500 mense uit 28 lande het gevlug en is nou in Thailand. – Reuters

2025-10-29 04:21:10

18 dooies in Libië gevind ná migrante se boot omslaan

Die lyke van minstens 18 migrante wat omgekom het toe hul boot wes van Tripoli,  die Libiese hoofstad, omgeslaan het, is gevind, terwyl meer as 90 oorlewendes gered is.

’n Organisasie in Sabratha, ’n kusdorp sowat 76 km wes van Tripoli, het gesê hulle het Maandag laat ’n verslag van die boot ontvang en ’n reddingsoperasie tot vroeg Dinsdagoggend uitgevoer.

Die dooies is aan die kus naby die hawe van Soerman gevind. – Reuters

2025-10-29 04:32:27

Amerika waarsku burgers om Mali onmiddellik te verlaat

Amerika het sy burgers in Mali Dinsdag aangeraai om die land onmiddellik met kommersiële vlugte te verlaat.

Dit kom terwyl die regering van Mali onder toenemende druk is van militante met Al-Kaïda-bande.

Die militante het vroeg in September met ’n blokkade van brandstofinvoer na die land begin.

Hulle het sedertdien konvooie brandstoftenkwaens aangeval wat die land probeer binnegaan het om Bamako, die hoofstad, te bereik.

Die lughawe in Bamako bly oop en Amerikaners word weens die risiko van “terreuraanvalle langs nasionale snelweë” gemaan om kommersiële vlugte te haal eerder as om padlangs na buurlande te reis. – Reuters

2025-10-29 05:26:59

Stembusse open in Tanzanië, hoof-opposisielede verbied, in tronk

Stembusse het Woensdag sonder hoof-opposisielede geopen in Tanzanië se verkiesings nadat hulle óf tronk toe gestuur is óf verbied is om deel te neem.

Menseregtegroepe het dit as ’n “golf van terreur” bestempel. Pres. Samia Suluhu Hassan (65) is vasbeslote om haar posisie te verstewig met ’n oortuigende oorwinning wat kritici binne haar eie party sal stilmaak, sê ontleders.

Sy is in 2021 van vise-president bevorder ná die dood van haar ystervuis-voorganger, John Magufuli, maar het teenkanting ervaar as die land se eerste vroueleier. – AFP

Pres. Samia Suluhu Hassan van Tanzanië. Getty Images/NurPhoto

2025-10-29 05:33:19

5 vrywilligers in Soedan dood terwyl hulle kos versprei

Die Internasionale Federasie van Rooi Kruis- en Rooi Halfmaanverenigings (IFRC) het Dinsdag gesê vyf van sy vrywilligers in Soedan is dood en drie word vermis.

Die vyf vrywilligers is op 27 Oktober in die stad Bara dood terwyl hulle kos versprei en amptelike baadjies gedra het.

Die IFRC het geen besonderhede verskaf oor hoe hulle gesterf het nie.

Soedan se paramilitêre Blitsondersteuningsmag (RSF), wat sedert April 2023 in ’n burgeroorlog met die Soedannese weermag gewikkel is, het Bara vroeër vandeesweek oorgeneem. – Reuters

2025-10-29 05:40:12

‘Buitelander’ in Londen vas wat 1 doodsteek, 2 beseer

Die Britse polisie het ’n buitelander in hegtenis geneem in verband met die dood van ’n 49-jarige man wat Dinsdag doodgesteek is en twee mense wat beseer is in ’n aanval in Wes-Londen.

Die Britse media het berig dat die verdagte ’n Afgaanse burger is, terwyl die ministerie van binnelandse sake slegs bevestig het dat hy ’n buitelander is wat sedert 2022 wettig in Brittanje woon.

Benewens die slagoffer wat op die toneel dood is, is ’n man (45) ernstig gewond en het ’n seun (14) beserings opgedoen wat nie lewensgevaarlik is nie.

Die polisie beskou nie die aanval as ’n terroriste-voorval nie. – AFP

2025-10-29 06:21:17

22 kinders sterf in Gasa-aanvalle in ‘skending van skietstilstand’

Minstens 50 mense, onder wie 22 kinders, is dood in tientalle aanvalle deur Israel op die Gasastrook, het die Gasastrook se burgerlike verdedigingsagentskap Woensdag gesê.

Ongeveer 200 mense is gewond “in ’n duidelike en flagrante skending van die skietstilstand”, het Mahmoed Bassal, woordvoerder van die agentskap, gesê.

Die Israeliese weermag het Woensdag gesê dat een van sy soldate in die Gasastrook dood is tydens die skietstilstand met Hamas.

Die soldaat het Dinsdag in gevegte in die suide van die Gasastrook omgekom, volgens die weermag. – AFP

Palestyne werk Woensdag om die lyk van Fathi Oweida onder die puin uit te haal van ’n huis wat in ’n Israeliese aanval in die stad Gasa getref is. Foto: Reuters

2025-10-29 06:54:15

Buitengewoon swaar sneeuval keer toeriste in Everest

Die Nepalese en Chinese kante van die Everest-streek was Woensdag vir toeriste gesluit weens buitengewoon swaar sneeuval.

’n Helikopter het neergestort terwyl probeer is om gestrande stappers te red.

Die streek rondom die berg Everest, wat deur duisende stappers en klimmers besoek word, is sedert Maandag met sneeu bedek nadat ’n sikloon vanaf die Baai van Bengale oor Indië heen verwoesting gesaai het.

Dit het ’n tweede vlaag van erge sneeuval in die Himalajas vandeesmaand ingelui. – Reuters

2025-10-29 07:22:31

Ethiopiër gedeporteer nadat hy per ongeluk uit Britse tronk vrygelaat is

Brittanje sê ’n Ethiopiese asielsoeker wat verkeerdelik uit die tronk vrygelaat is, het Woensdag in Ethiopië aangekom nadat amptenare hom gedeporteer het.

Hadush Gerberslasie Kebatu (38) is in September tronkstraf van 12 maande opgelê vir die seksuele aanranding van ’n 14-jarige meisie en ’n vrou.

Amptenare het hom op 24 Oktober per ongeluk uit die tronk vrygelaat. Hy is drie dae later opgespoor.

Sy inhegtenisneming in Julie het maande lange anti-immigrasiebetogings ontketen. – Reuters

2025-10-29 07:34:16

Stemlokale open in Nederland, alle oë op vertoning van verregses

Stemlokale het Woensdag geopen in die Nederlandse verkiesing, wat as ’n aanduiding van die sterkte van Europa se verregses beskou word.

Alle oë is op die vertoning van Geert Wilders, leier van die verregse PVV-party.

Opnames dui daarop dat die uitslag van die blitsverkiesing te naby is om te voorspel, met Wilders wat drie ander partye van die gematigdes of linkse vleuel net-net afweer.

Wilders sal waarskynlik nie die premier word nie, ongeag die uitslag. – AFP

Geert Wilders Foto: Getty Images/BSR Agency

2025-10-29 08:11:25

Orkaan Melissa tref Kuba

Die orkaan Melissa het vroeg Woensdagoggend in Kuba aan land gekom nadat dit ’n pad van verwoesting deur Jamaika gebaan het.

“Die uiters gevaarlike orkaan Melissa kom aan land aan die suidkus van die ooste van Kuba,” het die Nasionale Orkaansentrum (NHC) gesê.

Ten spyte daarvan dat dit tot ’n kategorie 3-storm verswak het, het Melissa die provinsie Santiago de Cuba getref met maksimum volgehoue windsnelhede van ongeveer 195 km/h. – AFP

2025-10-29 08:32:35

Pakistanse minister dreig om Taliban in Afganistan ‘uit te wis’

Khawaja Asif, minister van verdediging van Pakistan, het Woensdag gedreig om die regerende Taliban in die naburige Afganistan “uit te wis”.

Dit is ’n dramatiese eskalasie van retoriek ná die ineenstorting van gesprekke oor ’n blywende vrede tussen die lande.

“Pakistan hoef nie eens ’n fraksie van sy volle arsenaal te gebruik om die Taliban-regime heeltemal uit te wis en hulle terug te stoot na die grotte om weg te kruip nie,” het Asif gesê. – Reuters

2025-10-29 08:39:42

Israel 'stel skietstilstand in Gasastrook weer in' ná aanvalle

Die Israeliese weermag (IDF) het Woensdag die skietstilstand in die Gasastrook heringestel nadat hulle sedert die vorige dag ’n reeks aanvalle op tientalle militante teikens uitgevoer het.

“Ná ’n reeks aanvalle waarin tientalle terreurteikens en terroriste aangeval is, het die IDF begin met die hernieude afdwinging van die skietstilstand in reaksie op Hamas se oortredings,” het die IDF gesê. – AFP

2025-10-29 09:16:28

Junta nooi internasionale media na Mianmar vir verkiesing

Internasionale media sal toegelaat word om Mianmar se komende verkiesing deur die junta te dek, het die verkiesingsowerheid Woensdag gesê.

Mianmar se junta het “die medialandskap verpletter” met sensuur en intimidasie sedert die staatsgreep in 2021 wat ’n burgeroorlog ontketen het, sê Verslaggewers Sonder Grense.

Plaaslike joernaliste het onder onderdrukking gebuk gegaan terwyl buitelandse media die land verlaat het.

AFP is die enigste internasionale nuusagentskap wat ’n volledige binnelandse buro onderhou. – AFP

2025-10-29 09:23:49

Minstens 101 dood weens lugaanvalle in Gasastrook

Gasa se burgerlike verdedigingsagentskap en hospitale het Woensdag gesê dat ’n reeks Israeliese aanvalle meer as 100 mense oor die Palestynse gebied heen dood gelaat het.

“Minstens 101 sterfgevalle is na hospitale gebring, insluitend 35 kinders,” het Mahmoed Bassal, woordvoerder van die agentskap, gesê.

Die dodetal is bevestig deur ’n AFP-telling van verslae van gesondheidsorgwerkers by vyf hospitale in die Gasastrook wat die oorledenes en gewondes ontvang het.

’n Vroeëre telling het aangedui minstens 50 mense is dood. – AFP

2025-10-29 09:49:10

Aktiviste teen pres. Donald Trump hou ’n reusebanier met sy gesig vas terwyl hulle deelneem aan ’n saamtrek teen Trump se besoek aan Suid-Korea vir die leiersberaad van die Asies-Pasifiese forum vir ekonomiese samewerking (Apec) in Gyeongju, Suid-Korea. Trump het Woensdagoggend in Suid-Korea aangekom. Foto: Reuters

2025-10-29 10:22:31

Koshulp vir byna 42 m. verval Saterdag weens regeringsluiting in VSA

Byna 42 miljoen mense gaan voedselhulp verloor weens die tweede langste Amerikaanse federale regeringsluiting, terwyl Demokrate en Republikeine in die kongres mekaar vir die sluiting blameer.

Geen party het tekens getoon dat hulle hul standpunt gaan verander nie dae voordat finansiering vir die aanvullende voedingsbystandsprogram, ook bekend as voedselkoepons, van Saterdag af verval.

Die Amerikaanse departement van landbou het verlede week besluit om nie geld uit ’n noodfonds te onttrek om vir ’n deel van November se voordele te betaal nie. – Reuters

Federale werkers staan Maandag tou om kospakkies by die Newark Liberty Internasionale Lughawe in New Jersey te ontvang. Foto: Getty Images/AFP

2025-10-29 10:46:26

Amerika bereik handelsooreenkoms met Suid-Korea

Suid-Korea en Amerika het ’n breë handelsooreenkoms bereik wat beleggings en skeepsbou dek, het Kim Yong-beom, presidensiële assistent van die regering in Seoel, Woensdag gesê.

Die ooreenkoms dek ook die besonderhede van tariewe wat Amerika teen Suid-Korea ingestel het.

“Suid-Korea se finansiële beleggingspakket vir Amerika van $350 miljard, bestaan uit $200 miljard in kontantbeleggings en $150 miljard in skeepsbou-samewerking.”

Trump, wat Woensdagoggend in Suid-Korea aangekom het, het bevestig dat ’n ooreenkoms bereik is. – AFP, Reuters

2025-10-29 11:03:46

VSA verminder soldate in Europa

Die Noord-Atlantiese Verdragsorganisasie (Navo) sê dat hy vooraf ingelig is oor Amerika se planne om sommige van sy troepe wat op die oostelike flank van die alliansie ontplooi is, te verminder.

Die skuif word as ’n “aanpassing” en “niks ongewoons nie” beskryf. Washington se verbintenis tot die alliansie bly “duidelik” en sy teenwoordigheid in Europa aansienlik, het ’n Navo-amptenaar Woensdag gesê.

“Selfs met hierdie aanpassing bly Amerika se magsposisie in Europa groter as wat dit in baie jare was, met baie meer Amerikaanse magte op die vasteland as voor 2022,” sê die amptenaar.

Daar is verwag dat die VSA die onttrekking van troepe in Europa sal aankondig ná ’n hersiening van sy militêre ontplooiings wêreldwyd, maar geen skuif is nog amptelik bekend gemaak nie. – AFP

’n Argieffoto wys Amerikaanse soldate van Navo se multinasionale gevegsgroep naby Mokren, noordwes van Bulgarye. Foto: AFP

2025-10-29 11:12:33

Russiese magte berei voor om Pokrofsk te beset

Russiese soldate is naby daaraan om die oostelike Oekraïense stad Pokrofsk te beset nadat klein groepies hoogs mobiele Russiese eenhede die stad omsingel en toe binnegedring het.

Pokrofsk is ’n pad- en spoorwegsentrum in die oostelike Donetsk-streek van Oekraïne met ’n bevolking van sowat 60 000 mense. Die meeste mense het reeds uit die stad gevlug.

Alle kinders is verwyder en min burgerlikes bly oor. Die stad lê op ’n sleutelroete wat deur die Oekraïense weermag gebruik word. – Reuters

2025-10-29 11:21:17

MSF moet bedrywighede in Libië opskort

Die mediese liefdadigheidsorganisasie Dokters Sonder Grense (MSF) sê dat hy beveel is om Libië teen 9 November te verlaat. Dit volg nadat MSF reeds in Maart gedwing is om sy bedrywighede op te skort.

“Geen rede is gegee om ons uitsetting te regverdig nie,” het Steve Purbrick, wat MSF se programme in Libië lei, in ’n verklaring gesê.

MSF is ’n internasionale humanitêre organisasie wat wêreldwyd mediese sorg bied aan mense in nood, dikwels in konflik- of rampgebiede. MSF is aktief in Libië, ’n land wat sedert 2011 deur ’n burgeroorlog en politieke onstabiliteit geteister word. – AFP

2025-10-29 12:03:15

Duitse minister betreur lugaanvalle in Gasastrook

Johann Wadephul, Duitse minister van buitelandse sake, het Woensdag sy “diepe kommer” uitgespreek ná die dodelikste aand van bombardering in die Gasastrook sedert ’n Amerikaans bemiddelde skietstilstand vroeër vandeesmaand in werking getree het.

Meer as 100 mense, insluitend minstens 35 kinders, is volgens die burgerlike beskermingsagentskap en mediese bronne by vyf hospitale dood. Wadephul het Israel versoek om militêre selfbeheersing toe te pas om verdere lyding te voorkom.

Die Israeliese weermag het lugaanvalle uitgevoer nadat ’n soldaat gesterf het, en aangekondig dat die implementering van die skietstilstand hernu word.

Wadephul het Hamas ook gevra om sy deel van die ooreenkoms na te kom deur wapens neer te lê en die oorskot van gestorwe gyselaars te oorhandig. – AFP

2025-10-29 12:08:11

Rusland toets ‘nuwe kategorie vergeldingswapen’

Pres. Wladimir Poetin het Woensdag gesê dat Rusland ’n Poseidon-kernkrag-supertorpedo getoets het en dat dit ’n groot sukses was.

Amerikaanse en Russiese amptenare het albei Poseidon as ’n nuwe kategorie vergeldingswapen beskryf, wat radioaktiewe oseaangolwe kan veroorsaak om kusstede onbewoonbaar te maak.

Poetin het aan soldate wat in die Oekraïne-oorlog gewond is, gesê dat die toets Dinsdag plaasgevind het. Hy het die toets as ’n “reusesukses” beskryf. – Reuters

2025-10-29 12:13:26

Rits rond

Pres. Donald Trump groet met sy aankoms op die Gimhae- internasionale lughawe in Busan, Suid-Korea. Trump het die afgelope week Maleisië en Japan besoek. Foto: Getty Images

2025-10-29 12:20:59

België ondersoek hommeltuie bokant weermagbasis

Die Belgiese owerhede het ’n formele ondersoek begin nadat verskeie hommeltuie twee nagte agtereenvolgens oor ’n militêre basis in Marche-en-Famenne, in die suidooste van die land, opgemerk is.

Theo Francken, minister van verdediging, het in ’n plasing op X verduidelik dat die barakke se wagte Sondag, sowel as Dinsdag, verskeie hommeltuie oor sleutelgebiede opgemerk het. Volgens ’n bron naby die ondersoek is sowat vyf hommeltuie Saterdag en twee ander Dinsdag waargeneem.

“Dit was nie amateurs nie, maar bekwame hommeltuigvlieëniers,” het Francken gewaarsku. Die polisie en intelligensiediens ondersoek die voorvalle.

Ander lande van die Noord-Atlantiese Verdragsorganisasie (Navo) handhaaf ook verhoogde waaksaamheid ná soortgelyke voorvalle op militêre basisse en lughawens oor Europa heen. – Reuters

2025-10-29 13:14:50

Melissa saai verwoesting in Kuba

Pres. Miguel Diaz-Canel van Kuba sê Orkaan Melissa het “omvattende skade” aangerig nadat die storm oornag die suidelike kusgebied getref het.

“Dit was ’n baie moeilike oggend gewees,” het Diaz-Canel in ’n plasing op sosiale media geskryf. Volgens hom het die orkaan verwoesting gesaai. Diaz-Canel het ’n beroep op mense gedoen om nie hul waaksaamheid te verslap soos wat die orkaan oor die gebied beweeg.

Mense moet onmiddellik op rampmaatreëls reageer en beskutting soek, aangesien die orkaan steeds gevaar inhou. – AFP

2025-10-29 13:28:25

Yanks bou hommeltuie met missiele vir skepe

Lockheed Martin, ’n Amerikaanse vervaardigingsmaatskappy, het Woensdag aangekondig dat hy $50 miljoen gaan belê om hommeltuie met missiele toe te rus wat aan boord van skepe vervoer kan word.

Die plan vorm deel van die Pentagon se poging om China se groeiende vlootmag in die Stille Oseaan teen te werk en lesse toe te pas wat geleer is uit Oekraïne se effektiewe gebruik van plofstofbelaaide seehommeltuie teen Russiese oorlogskepe in die Swart See.

Die hommeltuie sal die eerste keer in 2026 ter water getoets word, sê die maatskappy. – Reuters

2025-10-29 13:40:55

Orkaan: Brittanje stuur noodhulp van R62 miljoen na Karibiese Eilande

Brittanje het Woensdag aangekondig dat hy 2,5 miljoen pond (ongeveer R62 miljoen) in noodhulpbefondsing beskikbaar gestel om die Karibiese streek te help herstel ná die verwoesting van Orkaan Melissa, met gefokusde bystand aan Jamaika.

Die hulppakket sluit die vinnige verskaffing van tydelike skuilings, waterfilters en komberse in. Die orkaan het Woensdag vroeg Kuba getref, slegs ure nadat dit groot skade in Jamaika aangerig het. Dit is die sterkste storm wat die eiland nog ooit getref het. – Reuters

2025-10-29 13:45:19

Pad van verwoesting

Inwoners loop verby puin nadat Orkaan Melissa die gebied van Santiago de Cuba in Kuba getref het. Foto: AFP

2025-10-29 14:01:34

Nvidia word wêreld se eerste $5 000 miljard-maatskappy

Die kunsmatige-intelligensie-maatskappy Nvidia het Woensdag die eerste maatskappy ter wêreld geword met ’n markwaarde van $5 000 miljard.

Die Kalifornië-gebaseerde maatskappy se aandeelprys het met 4,91% gestyg tot $210,90 teen die opening van handel op Wall Street, wat Nvidia se markwaarde oor die $5 000 miljard-drumpel gestoot het. – AFP

2025-10-29 14:19:40

Orkaan Melissa-oorstromings eis 10 lewens in Haïti

Minstens 10 mense in Haïti is dood in oorstromings wat veroorsaak is deur orkaan Melissa, het plaaslike owerhede Woensdag gesê.

Die La Digue-rivier, in die kusdorpie Petit-Goave, het sy walle oorstroom en verskeie mense meegesleur.

Volgens die dorp se burgemeester en die hoof van ’n plaaslike hospitaal is meer as tien liggame reeds gevind, terwyl die soektog na vermistes voortduur. – AFP

2025-10-29 14:33:17

Rekordverhoging in Duitsland se minimumloon

Die Duitse regering het ’n verhoging in die minimumloon tot 14,60 euro (sowat R290) per uur goedgekeur, die grootste verhoging sedert die land tien jaar gelede ’n minimumloon ingestel het.

Die verhoging sal in twee fases plaasvind: van die huidige 12,82 euro tot 13,90 euro aan die begin van volgende jaar, en dan weer tot 14,60 euro per uur op 1 Januarie 2027.

Die algemene minimumloon in Suid-Afrika is R28,79 per uur. – AFP

2025-10-29 14:47:04

Onderonsie oor olywe

’n Israeliese setlaar stry Woensdag met ’n Palestynse boer nadat hy sy olyfoes probeer ontwrig het in ’n boord naby die Palestynse dorpie Silwad, noordoos van Ramallah in die Israelies besette Wesoewer. Foto: Reuters

2025-10-29 15:02:45

Vrede in Oekraïne binne ’n jaar – Poetin se gesant

Kirill Dmitriev, die spesiale gesant van die Russiese president, Wladimir Poetin, het by ’n beleggingskonferensie in Saoedi-Arabië gesê dat die oorlog in Oekraïne binne ’n jaar sal eindig.

Dmitriev het hierdie stelling gemaak ná vergaderings met Amerikaanse amptenare verlede naweek.

"Ons is seker dat ons op die pad na vrede is, en as vredemakers moet ons dit laat gebeur," het Dmitriev gesê.

Gevra of vrede in Oekraïne binne ’n jaar moontlik is, het Dmitriev gesê: "Ek glo so."

Terwyl hy in Amerika was, het Dmitriev gesê dat Rusland en Amerika naby is aan ’n "diplomatieke oplossing" vir die oorlog. – Reuters

2025-10-29 15:26:34

460 mense glo in Soedanse hospitaal doodgemaak

Die Wêreldgesondheidsorganisasie (WGO) het Woensdag gesê hy is hewig ontsteld oor berigte dat meer as 460 mense in ’n hospitaal in die Soedanse stad El-Fasjer, wat onlangs deur paramilitêre magte oorgeneem is, doodgemaak is.

Dié stad in Soedan se Darfoer-streek is Sondag ná ’n beleg wat 18 maande geduur het deur die paramilitêre Blitsondersteuningsmag (RSF) ingeneem.

“Die WGO is geskok en hewig ontsteld oor berigte van die tragiese dood van meer as 460 pasiënte en hul metgeselle by die Saoedi-kraaminrigting in El-Fasjer in Soedan,” het Tedros Adhanom Ghebreyesus, die WGO-hoof, op X gesê. – AFP

’n Skermgreep uit ’n video wat Soedan se paramilitêre Blitsondersteuningsmag (RSF) op 26 Oktober vrygestel het kort nadat hulle beheer oor El-Fasjer geneem het. Foto: AFP

2025-10-29 15:41:00

Minder soldate in Europa nie ‘onttrekking’ – VSA

’n Vermindering van Amerikaanse troepe aan Navo se oostelike flank is nie ’n Amerikaanse onttrekking uit Europa nie en sal nie die veiligheidsomgewing daar verander nie, het die Amerikaanse weermag Woensdag gesê.

“Dit is nie ’n Amerikaanse onttrekking uit Europa of ’n teken van ’n verminderde verbintenis tot Navo nie,” het die weermag gesê.

“Inteendeel, dit is ’n positiewe teken van verhoogde Europese vermoë en verantwoordelikheid.” – AFP

2025-10-29 16:01:18

132 glo in polisieklopjagte in Rio de Janeiro dood

Minstens 132 mense is in Dinsdag se polisieklopjagte op Rio de Janeiro se dwelmhandelaars dood, het die openbare verdediger se kantoor, wat regshulp aan armes verskaf, Woensdag gesê.

Dit is meer as dubbel die huidige amptelike dodetal.

Claudio Castro, goewerneur van die Rio-deelstaat, het die dodetal Woensdag op sowat 60 geraam, maar gewaarsku dat die dodetal waarskynlik hoër is aangesien lyke steeds nog na die lykshuis gebring word. – AFP

2025-10-29 16:21:32

Polisie het slagoffer van sinagoge-aanval in Manchester doodgeskiet

Een van die twee mans wat vroeër dié maand in ’n aanval op ’n sinagoge in Manchester dood is, het gesterf weens ’n skoot wat deur ’n polisiebeampte afgevuur  is, is Woensdag in ’n geregtelike ondersoek getuig.

Adrian Daulby (53) is dood weens ’n skietwond aan die bors. Die ander slagoffer, Melvin Cravitz (66), is deur die aanvaller met ’n mes doodgesteek.

Die hoof van die polisie in die Manchester-gebied het getuig Daulby is in die bors getref terwyl hy aan die ander kant van ’n deur geskuil het toe ’n polisiebeampte wat op die situasie gereageer het, verskeie skote afgevuur het. – AFP

2025-10-29 16:31:54

Dankie tog vir immigrante

’n Man loop Woensdag verby ’n advertensiebord waarop die sangeres Dua Lipa pryk. Dit is deel van die “Thank God For Immigrants”-veldtog deur die aktivistegroep Everyone Hates Elon. Dié groep vier immigrant-ikone van die Britse kultuur. Dua Lipa se ouers is Albaniese immigrante van Kosovo. Foto: Reuters

2025-10-29 16:47:15

Israel val wapenopslagplek in Gasastrook aan

Die Israeliese weermag het Woensdag gesê hy het ’n geteikende aanval op ’n wapenopslagplek in die Beit Lahia-gebied in die noorde van die Gasastrook uitgevoer.

Die weermag het vroeër Woensdag gesê hy het weer begin om die bepalings van die Gasa-skietstilstand af te dwing ná ’n reeks aanvalle op die enklawe in reaksie op beweerde Hamas-skendings daarvan. – Reuters

2025-10-29 17:17:10

Frankryk pas verkragtingswet aan: Geen toestemming, geen seks

Frankryk het Woensdag sy verkragtingswetgewing verander om duidelik die belangrikheid van toestemming te beklemtoon.

Die wetswysiging, nou meer in pas met ander Europese lande, volg ná die ontsteltenis oor die Gisèle Pelicot-massaverkragtingsaak. Tot nou toe het die Franse wet vereis dat aanklaers moes bewys die daad is deur geweld, dwang of dreigemente gepleeg sonder spesifieke verwysing na toestemming. Dié tekortkoming het dit uitdagend gemaak om vervolgings te laat slaag.

Die nuwe wet beklemtoon nou dat toestemming noodsaaklik is vir wettige seksuele omgang. Pelicot se voormalige man, Dominique, het verlede jaar skuld beken in die hof nadat hy haar herhaaldelik bedwelm en tientalle mans gereël het om haar te verkrag terwyl sy bewusteloos was. – Reuters

2025-10-29 17:26:08

Louvre-diefstal: Twee vasgetrek, juweliersware steeds spoorloos

Twee mans wat weens die diefstal van juweliersware by die Louvre-museum in Parys, Frankryk, in hegtenis geneem is, gaan nou aangekla word van diefstal en misdadige sameswering.

Hulle het die aanklagte deels erken, sê Laure Beccuau, aanklaer. Die verdagtes sal in die hof verskyn met die oog op formele aanklagte van georganiseerde diefstal, wat tot 15 jaar tronkstraf kan lei, en misdadige sameswering, waarvoor ’n verdere 10 jaar tronkstraf opgelê kan word. Die gesteelde juweliersware wat op 19 Oktober verdwyn het, is volgens Beccuau nog nie teruggevind nie.

Die Louvre in Parys is internasionaal bekend as die wêreld se grootste kunsmuseum, die tuiste van meesterstukke soos Leonardo da Vinci se Mona Lisa. – AFP

2025-10-29 17:36:50

Israel slaan glo toe op wapenopslagplek in Gasastrook

Die Israeliese weermag sê hy het Woensdag ’n wapenopslagplek in die Gasastrook aangeval. Dit volg ure ná die dodelikste nag van bomaanvalle in die Gasastrook sedert die begin van ’n skietstilstand. Israel waarsku hy sal voortgaan om oënskynlike bedreigings uit die weg te ruim.

’n Presisie-aanval is op ’n terrein in die Beit Lahia-gebied in die noorde van die Gasastrook uitgevoer waar Israel sê wapens geberg is vir “ ’n dreigende terreuraanval”.

Israeliese soldate is steeds ontplooi “in ooreenstemming met die skietstilstandooreenkoms en sal voortgaan om enige onmiddellike bedreiging te verwyder”, lui ’n verklaring van die Israeliese weermag. – AFP

2025-10-29 17:43:11

Stormskade

’n Huis is onder water in St. Elizabeth, Jamaika, weens die orkaan Melissa. Foto: Reuters

2025-10-29 18:14:23

Spanje moet lesse leer uit verlede jaar se vloede, sê koning

Spanje moet die oorsake van verlede jaar se verwoestende vloede deeglik ondersoek om waardevolle lesse daaruit te leer, sê koning Felipe VI.

Sy oproep kom te midde van fel kritiek oor die Spaanse owerhede se hantering van die dodelikste natuurramp in dekades.

“Dis noodsaaklik om die oorsake en omstandighede van die tragedie verder te ontleed om só die nodige lesse met deeglikheid en kalmte te leer en ons vermoë te verbeter om toekomstige groot katastrofes die hoof te bied,” het die koning by ’n staatsherdenking vir vloedslagoffers gesê. – AFP

2025-10-29 18:26:45

Aanklaers geskors weens opmerking oor 6 Januarie-‘opstokers’

Die Amerikaanse departement van justisie het Woensdag twee aanklaers op verlof geplaas ure nadat hulle na ondersteuners van pres. Donald Trump wat die Amerikaanse kongresgebou op 6 Januarie 2021 bestorm het, in ’n vonnisopleggingsmemorandum as “ ’n skare opstokers” verwys het.

Samuel White en Carlos Valdivia is op administratiewe verlof geplaas ’n dag voor die vonnisoplegging van Taylor Taranto. Taranto is skuldig bevind aan ’n vuurwapen-aanklag nadat hy in Junie 2023 gewapen na oudpres. Barack Obama se huis gery het, kort nadat Trump beweer het dat hy Obama se adres aanlyn geplaas het.

Taranto is in die woonbuurt deur die Amerikaanse geheimediens in hegtenis geneem. – Reuters

2025-10-29 18:37:08

Fed gee groen lig vir nog rentekoersverlaging

Die Amerikaanse federale reserwebank (Fed) het Woensdag sy tweede agtereenvolgende rentekoersverlaging van ’n kwart persentasiepunt aangekondig om die sukkelende arbeidsmark te ondersteun. Die besluit, geneem te midde van verdeelde menings onder beleidmakers, het die sentrale bank se uitleenkoers tot tussen 3,75% en 4% verlaag.

10 lede het die verlaging gesteun, terwyl twee daarteen beswaar aangeteken het. Goew. Stephen Miran het ’n groter halfpersentasiepunt-verlaging verkies en Jeff Schmid, president van die federale reserwebank in die stad Kansas, is teen enige verandering gekant.

Die verlaging is bedoel om die Amerikaanse ekonomie ’n hupstoot te gee, veral omdat ondernemings steeds onder die impak van pres. Donald Trump se invoertariewe gebuk gaan. – Reuters

2025-10-29 18:41:58

Skalkse glimlag

Visepres. JD Vance en sy vrou, Usha, gaan aan boord van ’n vliegtuig in Maryland vir ’n reis om ’n Turning Point USA-geleentheid saam met Charlie Kirk se weduwee, Erika, in Mississippi by te woon. Foto: Reuters

2025-10-29 19:05:39

Orkaan se verwoesting in Jamaika ‘ongekend’

Die orkaan Melissa het ’n vlak van verwoesting gesaai wat nog nooit tevore in Jamaika ervaar is nie, het die Verenigde Nasies se koördineerder in die land Woensdag gesê.

“Daar was geweldige, ongekende verwoesting van infrastruktuur, eiendom, paaie en netwerkverbinding,” het Dennis Zulu op ’n perskonferensie gesê.

“Ons het mense in skuilings oor die land heen en op die oomblik toon voorlopige assesserings dat die land verwoes is op ’n vlak wat nog nooit tevore ervaar is nie.” – AFP

Camilla Powell (27) en haar dogter Destiny Ellington (5) Woensdag buite hul huis in Alligator Pond, Jamaika, nadat orkaan Melissa van Jamaika af aanbeweeg het. Foto: Reuters

2025-10-29 19:37:43

VN-hoof, president geskok oor dodetal in Rio-klopjagte

António Guterres, sekretaris-generaal van die Verenigde Nasies, is “diep besorg” oor die dodetal ná ’n polisieklopjag op dwelmbendes in Rio de Janeiro, Brasilië, het sy woordvoerder Woensdag gesê.

Meer as 100 mense is dood toe sowat 2 500 wetstoepassers op ’n dwelmsmokkelnetwerk in ’n favela toegeslaan het.

“Hy (Guterres) benadruk dat die gebruik van geweld in polisieoperasies in ooreenstemming moet wees met internasionale menseregte en standaarde, en versoek dat die owerhede dit ondersoek,” het Stéphane Dujarric aan verslaggewers gesê.

Op sy beurt is pres. Luiz Inacio Lula da Silva van Brasilië “met afgryse gevul” oor die dodetal, het een van sy ministers gesê. – AFP

2025-10-29 20:05:55

Orkaan Melissa se skade ‘hartverskeurend’ – koning Charles

Die verwoesting wat deur orkaan Melissa veroorsaak is, is ’n “hartverskeurende” herinnering aan die nodigheid om die “balans” in die natuur te herstel, het koning Charles van Brittanje Woensdag gesê.

In ’n boodskap op sosiale media het die koning gesê hy en koningin Camilla is “diep hartseer om die katastrofiese skade te sien wat deur die felheid van Melissa in Jamaika en oor die Karibiese gebied heen veroorsaak is”.

“Hierdie aaklige, rekordbrekende storm herinner ons aan die toenemende dringende behoefte om die balans en harmonie in die natuur te herstel, ter wille van almal wie se lewe en bestaansmiddele deur die hartverskeurende ramp verwoes is,” het hy gesê. – AFP

’n Bed wat in oorstromings weggespoel het Woensdag buite die dorp San Miguel de Parada in Kuba nadat orkaan Melissa die eiland getref het. Foto: AFP

2025-10-29 20:23:10

Sentristiese D66-party voor in Nederlandse verkiesing – peiling

Nederlandse kiesers het oënskynlik die verregse leier Geert Wilders verwerp ten gunste van ’n sentristiese party, wys ’n uitgangspeiling ná Woensdag se skielike verkiesing.

Die D66-party sal luidens die Ipsos-peiling na verwagting 27 van die 150 setels in die parlement wen. Dit is twee meer as dié van Wilders en sy Vryheidsparty.

Stemdagpeilings in Nederland gee gewoonlik ’n akkurate weergawe van die parlementêre samestelling, maar die setels kan verander namate die stemme getel word. – AFP

2025-10-29 20:32:18

‘Local’ is lekker in Londen

Dansers van die Suid-Afrikaanse Joburg Ballet Woensdag tydens ’n fotosessie voor die geselskap se debuutoptrede Vrydag in die Royal Opera House se Linbury-teater in Londen. Foto: Reuters

2025-10-30 03:35:53

Nog 660 siek weens vermoedelike voedselvergiftiging in Indonesië

Die owerhede in Indonesië ondersoek vandeesweek voedselvergiftiging waarby meer as 660 kinders in die provinsie Yogyakarta betrokke is.

Dit volg nadat die kinders maaltye geëet het wat berei is as deel van pres. Prabowo Subianto se gratis skoolmaaltydprogram.

Die kinders het by twee afsonderlike skole siek geword.

Die program, wat in Januarie van stapel gestuur is, was ’n belangrike belofte van Subianto se verkiesingsveldtog, maar teen Woensdag het sowat 15 000 kinders reeds siek geword, toon data van ’n plaaslike nieregeringsorganisasie. – Reuters

2025-10-30 03:43:11

Trump gee opdrag dat VSA se kernwapens getoets word

Pres. Donald Trump het Donderdag gesê hy het die departement van verdediging opdrag gegee om onmiddellik die toets van kernwapens op ’n “gelyke grondslag” met ander kernmoondhede te hervat.

“As gevolg van ander lande se toetsprogramme, het ek die departement opdrag gegee om ons kernwapens op ’n gelyke grondslag te begin toets. Daardie proses sal onmiddellik begin,” het Trump op Truth Social gesê.

“Rusland is tweede en China is ’n verre derde, maar sal binne vyf jaar gelyk wees.” – Reuters

2025-10-30 03:57:13

Hewige verwoesting weens die orkaan Melissa

Die orkaan Melissa het Woensdag deur die noordelike Karibiese Eilande getrek nadat dit Kuba se tweede grootste stad verwoes, honderde landelike gemeenskappe geïsoleer en verwoesting in Jamaika veroorsaak het.

Minstens 25 mense is in Haïti dood.

Melissa het Jamaika Dinsdag getref as ’n kategorie 5-orkaan en die sterkste orkaan ooit wat sy kus direk getref het.

Teen 20:00 plaaslike tyd Woensdag was Melissa ’n kategorie 1-orkaan wat wind, reën en stormvloede meegebring het terwyl dit noordoos deur die Bahamas-argipel beweeg het. – Reuters

Oorstroomde huise Woensdag in die Howard Acres-woonbuurt in St. Elizabeth, Jamaika, nadat die orkaan Melissa getref het. Foto: AFP

2025-10-30 04:09:37

4 dood in Amerikaanse aanval op boot in Stille Oseaan

Die Amerikaanse weermag het Woensdag vier mans in die ooste van die Stille Oseaan doodgemaak in ’n aanval op ’n vaartuig wat glo dwelms gesmokkel het, het Pete Hegseth, Amerikaanse minister van oorlog, gesê.

“Hierdie vaartuig, soos al die ander, was volgens ons intelligensie betrokke by onwettige dwelmsmokkelary. Dit het langs ’n bekende dwelmsmokkelroete gevaar en dwelmmiddels vervoer,” het Hegseth op X gesê.

Hegseth se plasing het ’n kort videogreep ingesluit van ’n boot in die water wat getref word en ontplof. – Reuters

2025-10-30 04:23:32

Amerikaanse senatore soek sterk reaksie van Trump oor gruwels in Soedan

Republikeinse en Demokratiese senatore het ’n sterk reaksie van pres. Donald Trump se administrasie versoek nadat die paramilitêre Blitsondersteuningsmag (RSF) ’n nuwe gebied in Soedan beset het en na bewering burgerlikes aangeval het.

Die Wêreldgesondheidsorganisasie (WGO) het Woensdag gesê hy is hewig ontsteld oor berigte dat meer as 460 mense in ’n hospitaal in die stad El-Fasjer doodgemaak is.

’n Republikeinse senator het ’n beroep op Amerika gedoen om die RSF amptelik tot ’n buitelandse terroriste-organisasie te verklaar. – Reuters

2025-10-30 04:52:06

Trump, Xi vergader blitsig, maar nog geen kommentaar

Kritieke gesprekke tussen pres. Donald Trump en pres. Xi Jinping van China is Donderdag in minder as twee ure afgehandel sonder enige onmiddellike openbare kommentaar van enige van die leiers oor of vordering rakende die handelsoorlog gemaak is.

Trump is daarna direk na Air Force One in Busan, Suid-Korea, ná sy eerste persoonlike vergadering in ses jaar met Xi. Trump het gewaai en sy hand in die lug gepomp toe hy aan boord van die vliegtuig geklim het. Die straler het minute later opgestyg. – AFP

Pres. Donald Trump en pres. Xi Jinping van China Donderdag by die Gimhae- internasionale lughawe in Busan, Suid-Korea. Foto: Reuters

2025-10-30 05:11:15

Jong Australiese krieketspeler dood ná bal hom in nek tref

Australiese krieket is Donderdag geruk deur die dood van ’n tienerspeler wat in ’n oefening by sy klub in Melbourne deur ’n bal getref is.

Ben Austin (17) is Dinsdag hoog in die nek getref deur ’n bal terwyl hy in die nette by die Ferntree Gully-krieketklub gekolf het, het die beheerliggaam Cricket Victoria (CV) gesê.

Hy is hospitaal toe gehaas en op ’n lewensondersteuningstelsel geplaas, maar is Woensdag oorlede. – Reuters

2025-10-30 06:20:02

Staatsamptenare, studente beveel om tuis te bly ná betogings

Die owerhede in Tanzanië het Donderdag staatsamptenare en studente opdrag gegee om tuis te bly.

Dit volg een dag ná ’n algemene verkiesing wat deur gewelddadige betogings geruk is en daartoe gelei het dat die polisie ’n aandklokreël in Dar es Salaam ingestel het.

Betogers het Woensdag ten tyde van die stemmery die strate van Dar es Salaam en verskeie ander stede ingevaar weens woede oor die uitsluiting van pres. Samia Suluhu Hassan se twee grootste teenstanders. – Reuters

2025-10-30 06:26:24

Trump tevrede met ooreenkoms met China

Pres. Donald Trump het Donderdag se vergadering met pres. Xi Jinping van China ’n “groot sukses” genoem.

Die twee lande het ’n ooreenkoms bereik om tariewe wat verband hou met fentaniel te verlaag en die voorraad van kritieke seldsame aardmetale aan die gang te hou.

“Ek het gedink dit was ’n wonderlike vergadering,” het Trump gesê.

Trump het gesê die ooreenkoms behels onder meer dat China onmiddellik “geweldige hoeveelhede sojabone en ander landbouprodukte” koop.

Daar was geen onmiddellike kommentaar van die Chinese regering nie. – AFP

2025-10-30 06:47:50

11 gewond in Russiese aanvalle op Oekraïne

Elf mense is oornag gewond in Russiese hommeltuig- en missielaanvalle in Oekraïne en ’n groot deel van die land is sonder krag gelaat, het die owerhede Donderdag gesê.

Residensiële geboue is ook getref. Ses kinders van drie tot ses jaar oud is onder die gewondes.

Switlana Grintsjoek, Oekraïne se minister van energie, het gesê “Rusland het weereens ’n massiewe missiel- en hommeltuigaanval op Oekraïne se energie-infrastruktuur geloods”. – AFP

Polisieondersoekers inspekteer die puin by die terrein van ’n koshuisgebou wat erg beskadig is in Russiese aanvalle op Zaporizjzjia, Oekraïne. Foto: Reuters

2025-10-30 07:11:12

3de verdagte in Louvre-rooftog vas

’n Derde verdagte is in hegtenis geneem in verband met die Louvre-rooftog in Parys, het die Franse TV-stasie BFM Donderdag berig.

Die inhegtenisneming het laat Woensdag plaasgevind en die man word daarvan verdink dat hy op die misdaadtoneel teenwoordig was toe die rooftog plaasgevind het.

Vier diewe het op 19 Oktober kosbare juwele uit die Louvre se Apollo-galery gesteel.

Twee mans wat verlede naweek in hegtenis geneem is, het hul betrokkenheid by die rooftog “gedeeltelik erken”, het die aanklaer Woensdag gesê.

Die juweliersware is nog nie opgespoor nie. – Reuters

’n Smarag-en-diamant-halssnoer wat Napoleon aan sy vrou, keiserin Marie Louise, gegee het, is in die rooftog by die Louvre-museum in Parys gebuit. Foto: AFP

2025-10-30 08:07:25

Xi bevestig ‘konsensus’ is in vergadering met Trump bereik

Pres. Xi Jinping van China het bevestig die land het konsensus met Amerika bereik oor ekonomiese en handelskwessies.

Trump en Xi het vir die eerste keer sedert 2019 in Busan, Suid-Korea, vergader terwyl hul twee lande steeds in ’n hewige handelsoorlog vasgevang is.

Xi het Donderdag aan Trump gesê dat die twee lande “positiewe interaksies op die streeks- en internasionale verhoog moet hê”, het die Chinese staatsnuusagentskap Xinhua berig.

Vroeër is berig Trump het die vergadering met Xi ’n “groot sukses” genoem. – AFP

2025-10-30 08:12:01

Geweerskote, traangas afgevuur gedurende hernude betogings in Tanzanië

Die polisie in Tanzanië se hoofstad, Dar es Salaam, het Donderdag geweerskote en traangas afgevuur om betogers uiteen te jaag.

Protesoptogte het Woensdag in Dar es Salaam en verskeie ander stede uitgebreek gedurende die algemene verkiesing, met betogers wat woedend was oor die uitsluiting van pres. Samia Suluhu Hassan se twee grootste uitdagers, asook wat hulle sê toenemende onderdrukking van regeringskritici is.

Die polisie het ’n oornag-aandklokreël in Dar es Salaam gelas. – Reuters

2025-10-30 08:23:13

Trump-Xi-vergadering: Tariewe op fentaniel gehalveer

Pres. Donald Trump sê tariewe op Chinese invoer sal van 57% tot 47% verminder word deur die koers van tariewe wat verband hou met handel in fentaniel tot 10% te halveer.

Pres. Xi Jinping van China sal “baie hard werk om die vloei” van fentaniel, ’n dodelike sintetiese opioïed wat die hoofoorsaak van Amerikaanse oordosissterftes is, te stop, het Trump gesê.

Die tarief is verminder “omdat ek glo hulle doen werklik kragtige stappe”. – Reuters

2025-10-30 08:59:55

Gesprekke oor Chinese aankope van Amerikaanse energie in pyplyn, sê Trump

Pres. Donald Trump sê amptenare van Washington en Beijing sal vergader om ’n moontlike energie-ooreenkoms tussen die twee lande te bespreek.

“China... het ooreengekom dat hy die proses sal begin om Amerikaanse energie te koop,” het Trump op Truth Social gesê ná gesprekke met Xi Jinping, president van China

“Ons onderskeie spanne oor energie sal vergader om te sien of so ’n ooreenkoms uitgewerk kan word,” het Trump bygevoeg. – Reuters

2025-10-30 09:12:16

Verregses dalk uitgesluit van nuwe regering in Nederland

Dit lyk asof Nederland se volgende regering die verregses sal uitsluit, en deur ’n openlik gay minister gelei kan word ná verkiesings waarin Geert Wilders se verregse Vryheidsparty steun verloor en steun vir die gematigde party D66 toegeneem het.

Met 98% van die stemme getel, was D66 en Wilders se party Donderdag vroeg gelykop, met albei wat na verwagting 26 setels in die laerhuis sal inneem.

Alle groot hoofstroompartye het die moontlikheid uitgesluit om saam met Wilders te regeer nadat hy die vorige koalisie omvergewerp het. – Reuters

2025-10-30 09:24:47

Ouers, hul 2 kinders dood toe gebou in Turkye ineenstort

Twee kinders en hul ouers is dood toe ’n gebou in ’n dorp naby Istanbul in Turkye ineengestort het, het die owerhede Donderdag gesê.

’n Metro-tonnel word gegrawe naby die woongebou van sewe verdiepings in Gebze, ongeveer 60 km oos van Istanbul, en na berig word, is die owerhede gewaarsku dat die gebou kraak.

Honderde reddingswerkers het deur die puin gegrawe en die lyke van die twee kinders is Woensdag ontdek. Dié van hul ouers is Donderdag met dagbreek gevind. – AFP

2025-10-30 09:37:46

Taiwan nie in vergadering tussen Trump, Xi bespreek

Pres. Donald Trump sê Taiwan het nooit in sy gesprekke met pres. Xi Jinping van China ter sprake gekom nie.

Sommige kenners het vrese uitgespreek dat Trump toegewings oor Taiwan kan maak.

Amerikaanse wetgewing vereis dat Washington Taiwan die middele moet gee om homself te verdedig.

Sedert hy vroeër vanjaar aan die bewind gekom het, het Trump gehuiwer oor sy posisie oor Taiwan wat demokratiese regeer word, maar China sê dit is sy grondgebied. – Reuters

2025-10-30 10:00:11

China, VSA gaan saamwerk vir vrede in Oekraïne – Trump

Pres. Donald Trump sê Amerika en China het ooreengekom om meer saam te werk om ’n einde aan die oorlog in Oekraïne te bring.

China sê hy is ’n neutrale party in die konflik, maar Kijif en Westerse regerings beskuldig Beijing lank daarvan dat dit politieke en ekonomiese steun aan Moskou bied.

Trump sê die onderwerp het “baie sterk” tydens sy gesprekke met pres. Xi Jinping van China na vore gekom. – AFP

Pres. Donald Trump Donderdag op Air Force One tydens sy vertrek uit Busan, Suid-Korea, ná sy vergadering met pres. Xi Jinping van China. Foto: AFP

2025-10-30 10:15:48

VN-hoof vra onmiddellike einde aan vyandelikhede in Soedan

António Guterres, hoof van die Verenigde Nasies (VN), het Donderdag ’n onmiddellike einde aan die militêre eskalasie in Soedan geëis.

Dit kom ná berigte dat meer as 460 mense deur die paramilitêre Blitsondersteuningsmag (RSF) by ’n kraamhospitaal doodgeskiet is.

Guterres sê in ’n verklaring hy is baie bekommerd oor die eskalasie in El-Fasjer en het gevra vir “ ’n onmiddellike einde aan die beleg en vyandelikhede”.

Internasionale moondhede sukkel al maande om ’n einde te maak aan die gevegte tussen die RSF en die weermag, wat sedert April 2023 woed. – AFP

’n Ontheemde vrou rus Dinsdag in die Darfoer-streek nadat sy uit El-Fasjer gevlug het toe die paramilitêre Blitsondersteuningsmag die stad oorgeneem het. Foto: AFP

2025-10-30 11:20:21

Nuwe uitvoerende hoof by Puma hersien strategie

Arthur Hoeld, Puma se nuwe uitvoerende hoof, het Donderdag sy plan uiteengesit om die Duitse sportdraghandelaar om te keer.

Hoeld sê Puma moet minder afslag gee, sy bemarking verbeter en sy produkreeks verklein. Planne is ook aangekondig om 900 korporatiewe poste by Puma te besnoei.

Puma se markwaarde het sedert die begin van die jaar gehalveer ná ’n afname in belangstelling in sy Panther-handelsmerk-tekkies en -sweetpakke.

Hoeld, voorheen verkoopshoof by Adidas, is in Julie as uitvoerende hoof aangestel. – Reuters

2025-10-30 11:29:22

Munisipale werker sterf in Israeliese aanval in Suid-Libanon

Nadat die Israeliese weermag Donderdag ’n munisipale werker doodgemaak het toe hulle ’n inval in die suide van Libanon gedoen het, het Joseph Aoun, die Libanese president, sy weermag beveel om sulke invalle teë te staan.

Israel het die voorval bevestig en gesê Israeliese soldate het teen Hezbollah-infrastruktuur opgetree toe ’n “verdagte” geskiet is.

Ten spyte van ’n skietstilstand in November 2024 met die Libanese militante groep is Israeliese soldate steeds in vyf gebiede in die suide van Libanon ontplooi en voer Israel gereeld lugaanvalle uit. – AFP

2025-10-30 11:37:10

Rusland sê hy toets nie regstreeks kernwapens

Rusland het Donderdag probeer om spanning met die VSA oor die toets van kernwapens te ontlont nadat pres. Donald Trump ná twee toetse van nuwe Russiese kernwapenstelsels laat blyk hy hy wil sy eie kerntoetse uitvoer.

Die Kremlin sê die toetsing van die Boerewestnik-kruismissiel en die Poseidon-onderwaterhommeltuig behels nie regstreekse toetse van kernwapens nie.

Al twee lande handhaaf ’n de facto-moratorium op die toetsing van kernplofkoppe, hoewel Rusland gereeld militêre oefeninge doen wat stelsels behels wat sulke wapens kan dra. – AFP

2025-10-30 11:48:38

Koebaai, Ooste!

Pres. Donald Trump klim uit ’n ampsmotor in Gyeongju in Suid-Korea ná sy samesprekings met pres. Xi Jinping van China terwyl ’n lid van die Amerikaanse geheimediens toekyk. Trump het Donderdag na Washington teruggekeer ná afloop van sy week lange toer in Asië. Foto: Getty Images

2025-10-30 12:01:45

Suid-Korea, Japan versterk betrekkinge

Pres. Lee Jae Myung van Suid-Korea het Donderdag aan Sanae Takaitsji, premier van Japan, gesê dit is belangriker as ooit tevore om hul lande se bilaterale betrekkinge te versterk omdat hulle baie gemeen het in die huidige handelsomgewing.

Lee se kommentaar volg op sy eerste vergadering met Takaitsji tydens die Asiaties-Pasifiese Ekonomiese Samewerkingsbyeenkoms sedert Takaitsji Japan se nuwe leier geword het.

Takaitsji het ook gesê dat die “toekomsgerigte” ontwikkeling van betrekkinge albei lande sal bevoordeel en dat samewerking tussen Japan, Suid-Korea en die VSA belangriker word. – Reuters

2025-10-30 12:12:52

Sarkozy ontvang besoeker in tronk

Oudpres. Nicolas Sarkozy van Frankryk is in die tronk deur Gérald Darmanin, minister van justisie, besoek, sê ’n bron.

Darmanin het Sarkozy Woensdagaand in die La Santé-gevangenis in Parys in die teenwoordigheid van die tronk se direkteur ontmoet en die voormalige staatshoof se veiligheidsreëlings bespreek, sê die bron.

Voordat Sarkozy opgesluit is weens misdadige sameswering, het Darmanin gesê hy is van plan om hom te besoek om te verseker dat sy veiligheidsomstandighede voldoende is vir sy “uitsonderlike status”.

So ’n besoek is deur die Franse publiek gekritiseer omdat dit die onafhanklikheid van landdroste kan ondermyn. – AFP

2025-10-30 12:25:36

Blink toekoms wink vir Amerikaanse sojaboon-boere

Scott Bessent, Amerikaanse minister van finansies, sê China het ingestem om 12 miljoen metrieke ton Amerikaanse sojabone gedurende die huidige seisoen tot Januarie aan te koop.

China is ook daartoe verbind om 25 miljoen ton jaarliks vir die volgende drie jaar aan te koop as deel van ’n groter handelsooreenkoms met die VSA.

Bessent sê ander lande in Suidoos-Asië het ingestem om nog 19 miljoen ton Amerikaanse sojabone te koop. Hy het nie ’n tydsraamwerk vir daardie aankope gegee nie.

"Dus, ons groot sojaboonboere, wat die Chinese as politieke pionne gebruik het – dit is van die tafel af, en hulle behoort in die jare wat kom te floreer," het Bessent tydens ’n onderhoud met Fox Business Network gesê. – Reuters

’n Sojaboonplantasie in Nebraska in die VSA word bewerk. Foto: Getty Images

2025-10-30 13:04:09

Hamas oorhandig oorskot van nog 2 gyselaars

Hamas se gewapende vleuel sê dat hy Donderdag die oorskot van nog twee gyselaars oorhandig soos vereis onder die Amerikaans bemiddelde skietstilstandooreenkoms in die Gasastrook.

Die Al-Kassem-brigade “sal die oorskot van twee Israeliese gevangenes om 16:00 Gasa-tyd (14:00 GMT) oorhandig,” sê die groep op sy Telegram-kanaal.

Hamas het tot dusver die lyke van 15 van die 28 gyselaars terugbesorg wat die groep ingestem het om ingevolge die ooreenkoms met Israel terug te gee. – AFP

2025-10-30 13:07:23

Duitsland, Sirië versterk verhouding

Die Siriese president, Ahmed al-Sharaa, het Donderdag Johann Wadephul, Duitse minister van buitelandse sake, ontvang om bilaterale betrekkinge tussen die twee lande te versterk.

Dit is Wadephul se eerste reis na Sirië, hoewel sy voorganger, Annalena Baerbock, voorheen twee keer besoek afgelê het, mees onlangs in Maart om die Duitse ambassade in Damaskus te heropen.

Sharaa en Wadephul het tydens hul ontmoeting in Damaskus “maniere bespreek om samewerking op politieke, ekonomiese en humanitêre gebiede te verbeter”, lui ’n verklaring deur Sirië. Wadephul sal ook op sy Midde-Oosterse reis Libanon en Bahrein besoek. – AFP

2025-10-30 13:15:41

’n Appel ’n dag...

Lede van Kalifornië se nasionale wag sorteer appels in Los Angeles wat later in voedselhouers verpak moet word vir die verspreiding aan inwoners wat die voordele van ’n aanvullende voedingsbystandsprogram verloor weens die sluiting van die Amerikaanse regering. Foto: Getty Images

2025-10-30 13:27:51

Oekraïense soldate moet Russe in Pokrofsk ‘vind en uitroei’

Oekraïne verskerp sy pogings om Pokrofsk, ’n strategiese spilpunt, te verdedig, met die doel om belangrike verskaffings- en ontruimingsroetes te beveilig en Russiese infanterie wat die stad binnedring, uit te roei, sê Oleksandr Sirski, weermagbevelvoerder.

Sirski het Donderdag die gebied besoek om sy soldate te ontmoet. Hy ontken dat Oekraïense soldate in die stad vasgekeer is.

“Russiese soldate wil nie veg nie en beweeg rond in die stad. Ons doel is om hulle op te spoor en uit te roei,” het Sirski gesê. – Reuters

2025-10-30 14:02:49

Duits-Russiese man 6 jaar opgelê ná spioenasie, sabotasie

’n Hof in München het Donderdag ’n Duits-Russiese man tot ses jaar tronkstraf gevonnis op aanklagte van spioenasie vir Rusland en sabotasieplanne om Duitsland se ondersteuning van Oekraïne te ondermyn.

Die verdagte, geïdentifiseer as Dieter S., is daaraan skuldig bevind dat hy gehelp het met die beplanning van aanvalle op spoorlyne en militêre infrastruktuur in Duitsland, vermoedelik in opdrag van Russiese intelligensiedienste. – AFP

2025-10-30 14:28:02

Europese Sentrale Bank hou rentekoerse 3de keer onveranderd

Die Europese Sentrale Bank (ESB) het Donderdag vir ’n derde agtereenvolgende keer sy rentekoers onveranderd gehou te midde van inflasie wat onder beheer is, maar gewaarsku oor ’n “onsekere” ekonomiese vooruitsig te midde van handelsgeskille en geopolitieke spanning.

Ná ’n jaar lange reeks rentekoersverlagings het die ESB sy rentekoers sedert Julie onveranderd op 2% gehou, en soos wyd verwag, het die sentrale bank dit weer onveranderd gelaat vir die 20 lande wat die euro gebruik. – AFP

2025-10-30 14:47:33

Wyk, julle peste!

’n Werker spuit Donderdag insekdodende mis om die verspreiding van die dengue-virus in Pesjawar, Pakistan, te stuit. Foto: Reuters

2025-10-30 15:01:30

William, Kate wen saak teen tydskrif oor vakansiefoto’s

Brittanje se prins William en sy vrou, Kate, het ’n privaatheidsgeding gewen teen die Franse tydskrif Paris Match oor die publikasie van paparazzi-foto’s van hulle en hul kinders op ’n private vakansie in die Alpe in April.

’n Kennisgewing hieroor is Donderdag in die tydskrif gepubliseer. William en Kate se prokureurs het aan die hof gesê hulle verkies die publikasie van die kennisgewing bo enige vergoeding. – Reuters

Brittanje se prins William en sy vrou, Kate. Foto: AFP

2025-10-30 15:37:31

Poolse vegvliegtuie onderskep Russiese verkenningsvliegtuig

Poolse MiG-29-vegvliegtuie het Donderdag ’n Russiese verkenningsvliegtuig oor die Baltiese See onderskep in die tweede voorval die week, het die Poolse minister van verdediging gesê.

Volgens die Poolse weermag was die Russiese vliegtuig in internasionale lugruim sonder ’n ingediende vlugplan en met sy antwoordsender afgeskakel.

Lande op Navo se oostelike flank is sedert September op hoë gereedheidsgrondslag vir moontlike lugruimskendings toe drie Russiese militêre vliegtuie Estland se lugruim 12 minute geskend het, ’n paar dae nadat meer as 20 Russiese hommeltuie na berig word Pole se lugruim binnegedring het. – Reuters

2025-10-30 15:50:18

Gesoute werkers

Werkers verwyder Donderdag soutneerslae op ’n versierde muur by Babilon, Irak, ’n Unesco-wêrelderfenisgebied. Foto: Reuters

2025-10-30 16:01:37

VSA bied humanitêre hulp aan Kuba ná orkaan

Amerika is bereid om onmiddellike humanitêre hulp aan die mense van Kuba en naburige Karibiese lande te bied wat deur die orkaan Melissa geraak is, het Marco Rubio, Amerikaanse minister van buitelandse sake, Donderdag gesê.

Rubio het in ’n verklaring gesê Amerika is gereed om onmiddellike hulp direk en deur plaaslike vennote te verleen.

Die orkaan Melissa het die lewe van minstens 20 mense in Haïti geëis en huise in Jamaika, Haïti en Kuba in puin gelê, paaie verspoel en bome ontwortel.

Die volle omvang van die skade is onbekend. – Reuters

'n Inwoner van El Cobre in die Kubaanse provinsie Santiago de Cuba stap Donderdag met sy hond verby omgewaaide bome en kragdrade en verwoeste huise ná die orkaan Melissa. Foto: AFP

2025-10-30 16:34:57

Verhongering staar 27 m. mense in DRK in die gesig, waarsku VN

Verhongering staar miljoene mense in die Demokratiese Republiek die Kongo (DRK) in die gesig namate buitelandse hulp opdroog, het die Verenigde Nasies (VN) Donderdag gesê, en gewaarsku dat die krisis die risiko inhou om tot wyer onstabiliteit in die streek te lei.

Byna 27 miljoen mense in die DRK sal teen vroeg volgende jaar “krisisvlakke van voedselonsekerheid of erger” ondervind, het die VN gesê. – AFP

2025-10-30 16:44:29

‘Geen diensplig vir my nie’

’n Streng ortodokse Joodse man met krukke kyk Donderdag uit oor ’n betoging in Jerusalem, Israel, deur ander streng ortodokse Jode teen militêre diensplig. Foto: AFP

2025-10-30 17:23:36

Gasa: VN-hulp vorder, maar finansiering, koördinering steeds uitdaging

Meer as 24 000 ton humanitêre hulp van die Verenigde Nasies (VN) het sedert die begin van die skietstilstand vroeër vandeesmaand die Gasastrook bereik, het ’n VN-amptenaar Donderdag gesê terwyl hy ’n oproep gedoen het dat nieregeringsorganisasies toegelaat moet word om te help met die verspreiding daarvan.

Hoewel die hoeveelheid hulp aansienlik meer is as voor die skietstilstand, sê die VN humanitêre werkers ervaar steeds tekorte aan finansiering, asook uitdagings met koördinering van die verspreiding van hulp met die Israeliese owerhede. – AFP

2025-10-30 17:28:34

Duitse minister bespreek terugkeer van vlugtelinge tydens besoek aan Sirië

Johann Wadephul, Duitse minister van buitelandse sake, het Donderdag die moontlike terugkeer van Siriese vlugtelinge met pres. Ahmed al-Sjaraa bespreek ten tyde van sy besoek aan Damaskus, hoofstad van Sirië.

Duitsland het ’n groot Siriese gemeenskap, met honderdduisende wat hulle daar gevestig het nadat hulle weens die burgeroorlog gevlug het.

Dis “in die verstaanbare belang van die Siriese regering om die voorwaardes te skep sodat soveel Siriërs as moontlik kan terugkeer”, sê Wadephul. Dis egter tans “slegs in ’n baie beperkte mate moontlik, omdat ’n groot deel van die infrastruktuur in dié land vernietig is”, voeg hy by. – AFP

2025-10-30 17:49:40

Trump laat nou net 7 500 vlugtelinge toe, ‘veral wit Afrikaners’

Pres. Donald Trump het die maksimum aantal vlugtelinge na Amerika in 2026 op 7 500 vasgestel. Dis die laagste maksimum tot nog toe, lui ’n dokument van die Withuis wat Donderdag gepubliseer is as deel van ’n breër poging om vlugtelingbeleid in Amerika en wêreldwyd te hervorm.

In ’n jaarlikse vlugtelingbepaling, gedateer 30 September, sê Trump toelatings sal hoofsaaklik Suid-Afrika se wit Afrikaner- etniese minderheid akkommodeer. Volgens Trump staar vervolging Afrikaners in die gesig op grond van hul ras. – Reuters

2025-10-30 18:01:04

Gereed vir lansering

Vlae wapper langs die pad naby die lanseerplatform vir die Long March-2F-vuurpyl, voor die Shenzhou-21-ruimtevlugsending na die Tiangong-ruimtestasie, by die Jiuquan-satellietlanseringsentrum naby Jiuquan in die Gansu-provinsie, China. Foto: Reuters

2025-10-30 18:11:44

Maansending: SpaceX stel vereenvoudigde plan aan Nasa voor

’n Vereenvoudigde plan is aan Nasa voorgestel om mense na die maan te stuur met die hulp van die Starship-vuurpyl, sê Elon Musk se SpaceX, terwyl hy ook druk op sy kontrakteurs uitoefen om vinniger te beweeg om China nog dié dekade te klop in ’n sending-resies na die maan.

“In reaksie op die jongste oproepe het ons ’n vereenvoudigde sending-argitektuur en bedryfsbegrip gedeel en dit formeel begin evalueer. Ons glo dat dit ons in staat sal stel om ’n vinniger terugkeer na die maan te maak terwyl dit terselfdertyd die veiligheid van die bemanning verseker,” sê SpaceX in ’n lang plasing op sy webwerf oor vordering met sy Starship-vuurpyl.

Die maatskappy het nou ’n eenvoudiger weergawe van sy vorige planne voorgestel, wat ontwerp is om die proses vinniger, goedkoper en veiliger vir bemanningslede te maak. – Reuters

2025-10-30 18:21:42

Britte wil dié bomme uit Gasastrook verwyder

Brittanje gaan £4 miljoen (sowat R90 miljoen) beskikbaar stel vir internasionale pogings om na raming 7 500 ton onontplofte bomme in die Gasastrook op te ruim, wat keer dat hulpmiddels die Palestyne bereik.

Die verwydering van die onontplofte bomme om meer hulp moontlik te maak, is “ ’n belangrike komponent” van die Amerikaans bemiddelde skietstilstandooreenkoms, sê die Britse departement van buitelandse sake.

Na raming is sowat 70 000 ton plofstof op die Gasastrook neergewerp sedert die aanval op Israel in Oktober 2023. Sowat 10% daarvan het nie ontplof nie. – AFP

2025-10-30 18:27:08

DRK se Goma-lughawe sal gou heropen vir humanitêre vlugte, sê Macron

Pres. Emmanuel Macron van Frankryk het Donderdag aangekondig dat die lughawe in Goma in die Demokratiese Republiek die Kongo (DRK) vir humanitêre vlugte sal heropen maande nadat dit gesluit is toe die M23-rebelle die stad ingeneem het.

Macron sê die lughawe sal “binne die volgende paar weke” heropen, saam met veilige roetes vir die aflewering van hulp. Hy het ook aangekondig dat meer as €1,5 miljard (byna R30 miljard) in internasionale hulp vir Afrika se Groot Mere-streek, ’n gebied wat deur humanitêre krisisse geteister word, belowe is. – AFP

2025-10-30 18:35:12

Alle oë op verkiesing in Nederland

Rob Jetten, leier van die D66-party in Nederland, staan joernaliste te woord in Den Haag, Nederland. Foto: Getty Images

2025-10-30 19:04:46

Japan, Rusland het ná 80 jaar nog nie vredesverdrag

Enige gesprekke met Japan oor ’n vredesverdrag kan slegs begin sodra Japan afstand doen van sy “anti-Russiese” koers, het die Russiese ministerie van buitelandse sake Donderdag gesê.

Die ministerie het bygevoeg dat dit Japan se huidige beleid is wat bilaterale samewerking in ’n doodloopstraat gedryf het.

Rusland, toe nog deel van die Sowjetunie, en Japan het nooit ná die Tweede Wêreldoorlog ’n vredesverdrag onderteken wat hul vyandelikhede formeel beëindig nie. – Reuters

2025-10-30 19:20:09

Koning Charles stroop broer Andrew van titels, woning

Brittanje se koning Charles het met ’n formele proses begin om sy jonger broer Andrew van sy titels en eerbewyse te stroop en hom uit sy woning te sit, het die Buckingham-paleis Donderdag gesê.

Andrew is onder toenemende druk weens onder meer sy bande met die veroordeelde seksmisdadiger Jeffrey Epstein, wat in 2019 dood is.

Luidens ’n verklaring van die paleis is ’n formele kennisgewing aan Andrew oorhandig om die huurkontrak van sy herehuis, Royal Lodge, te beëindig. Hy sal na alternatiewe private verblyf verhuis. – Reuters

Prins Andrew en sy ouer broer, koning Charles van Brittanje. Foto: AFP

2025-10-30 19:46:17

Modderrivier

Voertuie staan Donderdag byna heeltemal met modder bedek nadat die orkaan Melissa Petit-Goâve, sowat 70 km suidwes van Port-au-Prince, Haïti, vroeër dié week getref het. Die orkaan het die lewe van minstens 20 mense in Haïti geëis en dele van Jamaika en Kuba in puin gelê. Foto: AFP

2025-10-30 20:04:32

VSA moet verseker sy kernwapens werk behoorlik – Vance

VP JD Vance van Amerika het Donderdag gesê toetsing van die Amerikaanse kernwapenarsenaal sal verseker dat dit werklik “behoorlik funksioneer”, maar het nie uitgewei oor watter soort toetse pres. Donald Trump beveel het nie.

Trump het vroeër Donderdag die Amerikaanse departement van verdediging opdrag gegee om kernwapens te toets op dieselfde vlak as wat China en Rusland dit doen.

“Dis ’n belangrike deel van nasionale veiligheid om seker te maak dat hierdie kernarsenaal wat ons het, werklik behoorlik funksioneer,” het Vance by die Withuis aan verslaggewers gesê. – AFP

2025-10-31 03:41:35

Dodetal styg weens vloede in Viëtnam

Die dodetal weens vloede in Sentraal-Viëtnam het tot 13 gestyg, met 11 ander wat steeds vermis word.

Vloedwaters wat deur rekordvlakke van reënval veroorsaak is, het die laaste paar dae ’n groot deel van Sentraal-Viëtnam verswelg.

Die vloede het ook meer as 116 000 huise en 5 000 hektaar gewasse onder water gelaat, en paaie en spoorweë beskadig.

Dit het tot kragonderbrekings in verskeie gebiede gelei wat van die buitewêreld afgesny is, het die regering se rampagentskap gesê. – Reuters

’n Vrou roei Donderdag op ’n boot in ’n oorstroomde straat in Hoi An, Viëtnam. Foto: AFP

2025-10-31 04:04:14

Orkaan Melissa: Dodetal styg tot 49

Die orkaan Melissa se bevestigde dodetal het Donderdag tot 49 gestyg, luidens amptelike verslae.

Dit kom nadat die orkaan verwoesting oor ’n groot deel van die noordelike Karibiese Eilande gesaai het en in felheid toegeneem het op pad na Bermuda.

Minstens 19 sterftes is in Jamaika bevestig, maar owerhede gaan voort met soek-en-reddingspogings.

Die sterftes sluit ook 30 mense in Haïti in, wat nie direk deur die orkaan getref is nie. Nog 20 mense word daar vermis. – Reuters

Die wrak van ’n voertuig Donderdag tussen puin in Black River, Jamaika. Foto: Reuters

2025-10-31 04:26:03

Twee gyselaars se identiteit bevestig ná Israel hul oorskot ontvang

Israel het Donderdag die oorskot van die gyselaars Amiram Kuper en Sahar Baruch geïdentifiseer nadat hul lyke vroeër die dag deur Hamas terugbesorg is.

Militante het 251 mense as gyselaars geneem tydens Hamas se aanval op Israel op 7 Oktober 2023.

Sahar Baruch (25) is twee maande daarna van die kibboets Beeri na die Gasastrook geneem en tydens ’n mislukte reddingsoperasie deur die weermag doodgemaak.

Amiram Kuper, wat 84 was ten tyde van sy ontvoering, is saam met sy vrou, Nourit Kuper, uit hul huis in die kibboets Nir Oz ontvoer.

Israel het sy dood in Junie 2024 aangekondig. – AFP

2025-10-31 04:29:49

Mexikaanse vloot red 28 tieners op boot in Stille Oseaan

Die vloot van Mexiko het Donderdag 28 tieners van ’n boot in die Stille Oseaan aan sy weskus gered.

Die kantoor van die prokureur-generaal van Sinaloa het gesê die boot het vanuit die suide van Mexiko, naby die grens met Guatemala, vertrek met 27 passasiers van tussen 14 en 17 jaar oud, en ’n 18-jarige.

Hul nasionaliteite is nie bekend gemaak nie.

Die grens tussen Mexiko en Guatemala is ’n belangrike kruispunt na Amerika vir migrante. – AFP

2025-10-31 05:02:16

Oorlewendes van atoombom kritiseer Trump se opdrag oor kernwapentoetse

’n Groep Japannese oorlewendes van atoombomme wat verlede jaar die Nobelvredesprys gewen het, het pres. Donald Trump se opdrag om kernwapentoetse te hervat, skerp gekritiseer.

Meer as 200 000 mense is dood toe Amerika in die Tweede Wêreldoorlog twee atoombomme op onderskeidelik Hirosjima en Nagasaki in Japan laat val het.

Nihon Hidankio, Nobelpryswenner, het ’n protesbrief aan die Amerikaanse ambassade in Japan gestuur.

Die opdrag “is regstreeks in stryd met die pogings van nasies oor die wêreld heen wat streef na ’n vreedsame wêreld sonder kernwapens en is heeltemal onaanvaarbaar”, lui die brief. – AFP

2025-10-31 05:03:07

Australiese staatswetgewer kry meer as 5 jaar tronkstraf vir seksmisdade

’n Voormalige Australiese staatswetgewer is Vrydag meer as vyf jaar tronkstraf vir verkragting en seksuele aanranding opgelê.

Gareth Ward (44) van Nieu-Suid-Wallis is in Julie skuldig bevind aan die mishandeling van twee mans van tussen 18 en 24 jaar oud tussen 2013 en 2015.

Hy het desondanks geweier om te bedank, tot twee weke later toe lede van die staatsparlement op die punt was om te stem om hom uit te skop. – AFP

2025-10-31 05:50:16

5 aangekla in verband met dood van Robert De Niro se kleinseun, 2 ander

Vyf mense is aangekla in verband met die dood van die akteur Robert De Niro se kleinseun en twee ander mense wat in 2023 aan oordosisse gesterf het.

Die vyf staan tereg op aanklagte wat verband hou met die bedryf van ’n verspreidingsnetwerk van fentaniel en nagemaakte opioïede via sosiale media aan tieners en jong volwassenes in New York.

Die owerhede het na bewering ’n verband gevind tussen die netwerk en die sterftes van Leandro De Niro-Rodriguez, Akira Stein en ’n derde persoon wat nie geïdentifiseer is nie. – BBC

2025-10-31 06:26:42

Tekort aan kontant in Gasastrook beperk inwoners

’n Tekort aan kontant in die Gasastrook stel Palestyne nie in staat om die bietjie geld wat hulle het, te spandeer sonder om slagoffers te word van uitbuiters nie.

Banke het op 16 Oktober begin heropen. Israel het die oordrag van banknote saam met die meeste ander goedere geblokkeer nadat Hamas Israel op 7 Oktober 2023 aangeval het.

“Banke is oop, maar hulle doen meestal elektroniese sake, geen deposito’s, geen kontantonttrekkings nie,” het Mohammad Aboe Djajjab, ’n ekonoom in die Gasastrook, gesê. – Reuters

Manal al-Saidi betrag ’n beskadigde banknoot terwyl sy geld herstel op straat in die Noeseirat-vlugtelingkamp te midde van ’n kontantkrisis in die Gasastrook. Foto: Reuters

2025-10-31 06:36:04

11 oornag beseer in Russiese aanvalle op Oekraïne

Elf inwoners, onder wie vier kinders, is oornag in Russiese aanvalle op die stad Soemi in die noordooste van Oekraïne beseer.

Die Soemi-streek grens aan Rusland en word voortdurend met sowel hommeltuie as missiele aangeval.

Nooddienste het op Telegram gesê dat Rusland ’n residensiële gebou, woonhuise en ander infrastruktuur aangeval het. – Reuters

’n Brandbestryder op die terrein van die woonstelgebou wat in die hommeltuigaanval op Soemi, Oekraïne, getref is. Foto: Reuters

2025-10-31 07:28:46

China, Kanada voer eerste gesprekke sedert 2017

China en Kanada se leiers het Vrydag met hul eerste formele gesprekke sedert 2017 begin by ’n beraad van die Asies-Pasifiese Ekonomiese Samewerkingsgroep (Apec) in Suid-Korea, het Chinese staatsmedia berig.

Kanada se betrekkinge met China is van die swakste van enige Westerse land, maar albei lande is aan die ontvangkant van pres. Donald Trump se tariefaanslag. – AFP

2025-10-31 07:42:10

Prokureurs dien klag in oor minister se besoek aan Sarkozy in tronk

Bykans 30 prokureurs het ’n klag ingedien teen Gérald Darmanin, Franse minister van justisie, waarin hulle hom daarvan beskuldig dat hy oudpres. Nicolas Sarkozy (70) “implisiet” ondersteun.

Sarkozy dien vyf jaar tronkstraf uit nadat hy skuldig bevind is aan sameswering in ’n saak wat verband hou met miljoene euro’s wat hy in sy verkiesingveldtog van die oorlede Libiese leier kol. Moeammar Ghaddafi gekry het.

Sarkozy het Woensdag ’n tronkbesoek van Darmanin ontvang, ten spyte van ’n aanklaer wat gewaarsku het dat dit geregtelike onafhanklikheid kan ondermyn. – AFP

2025-10-31 08:26:49

Passasier probeer bedreigde ape na Indië smokkel

Doeanebeamptes in Indië het ’n passasier by Mumbai se lughawe in hegtenis geneem nadat hulle twee bedreigde gibbons (langarmape) in ’n ingeboekte sak ontdek het.

Een van die klein ape van Indonesië was dood terwyl die ander, in ’n video wat deur doeane uitgereik is, gesien is in die arms van ’n beampte.

Doeane het gesê die passasier, wat van Maleisië via Thailand gereis het, het die seldsame ape by ’n sindikaat wat natuurlewe smokkel, gekry vir aflewering in Indië. – AFP

Die oorlewende gibbon in die arms van ’n beampte. Foto: AFP/Verskaf

2025-10-31 08:36:26

RSF arresteer verskeie vegters wat ‘oortredings’ gepleeg het

Soedan se paramilitêre Blitsondersteuningsmag (RSF) sê hy het verskeie van sy vegters in hegtenis geneem wat daarvan beskuldig word dat hulle “oortredings gepleeg het ten tyde van die bevryding” van El-Fasjer.

Dit sluit in een vegter bekend as Abu Lulu, wat in verskeie video’s op sy TikTok-rekening verskyn het waar hy summiere teregstellings uitvoer.

Die Wêreldgesondheidsorganisasie (WGO) het Woensdag gesê hy is hewig ontsteld oor berigte dat meer as 460 mense in ’n hospitaal in El-Fasjer doodgeskiet is. – AFP

2025-10-31 08:58:03

Internet onderbreek wyl betogings glo in Tanzanië voortduur

Die internet in Tanzanië is Vrydag vir ’n derde dag geblokkeer namate berigte van verdere betogings na vore gekom het weens Woensdag se verkiesing.

Pres. Samia Suluhu Hassan, wie se regering daarvan beskuldig word dat hy ’n veldtog van onderdrukking voer, het probeer om haar posisie te verstewig.

Lede van die hoofopposisie is óf tronk toe gestuur óf verbied om deel te neem.

Talle mense het Woensdag en Donderdag die strate van Dar es Salaam en ander stede ingevaar om teen die verkiesing te betoog. – AFP

2025-10-31 09:14:07

Israel oorhandig nog oorskot van Palestynse gevangenes

Israel het die lyke van nog 30 Palestynse gevangenes aan die Gasastrook terugbesorg as deel van ’n voortgesette uitruilooreenkoms ingevolge ’n skietstilstand met Hamas.

Die Nasser Mediese Kompleks in Chan Joenis het dit aan AFP bevestig.

Ingevolge die skietstilstand moet Israel die oorskot van 15 Palestyne terugbesorg vir elke oorlede Israeliese gyselaar wat deur Hamas terugbesorg word.

Vrydag se oordrag bring die getal Palestyne van wie oorskot aan die Gasastrook terugbesorg is, op 225 te staan. – AFP

2025-10-31 09:40:42

43 VN-werkers in Jemen verhoor weens Israeliese aanval

Altesaam 43 personeellede van die Verenigde Nasies (VN) wat deur die Hoethi’s in Jemen aangehou word, sal teregstaan op aanklagte dat hulle vermoedelik betrokke was by ’n Israeliese lugaanval waarin senior Hoethi-leiers in Augustus vermoor is.

Dit is volgens Abdulwahid Abu Ras, waarnemende minister van buitelandse sake van Jemen se Hoethi-regering.

Die VN het herhaaldelik beskuldigings verwerp dat VN-personeel of -operasies in Jemen by die aanvalle betrokke was. – Reuters

2025-10-31 09:55:15

23 houers met radioaktiewe stof al meer as ’n week aan Filippynse kus

Altesaam 23 houers radioaktiewe sink is al meer as ’n week langs die Filippynse kus en ’n oplossing vir die verwydering daarvan is vinnig nodig, sê ’n amptenaar.

Spore van die isotoop sesium-137 is in Indonesië in die houers bespeur, “wat dit verwerp en weer na die Filippyne teruggestuur het”, het ’n amptenaar in Djakarta Vrydag gesê.

Die houers staan sedert 20 Oktober in Manila-baai terwyl die owerhede met die maatskappy waar hulle sê die besending vandaan kom, stry. – AFP

2025-10-31 10:11:56

Sanae Takaitsji, nuutverkose premier van Japan, skud Vrydag blad met pres. Xi Jinping van China op ’n vergadering in Gyeongju, Suid-Korea. Albei leiers het Gyeongju besoek om die beraad van die Asies-Pasifiese Ekonomiese Samewerkingsgroep (Apec) by te woon. Dit is hul eerste persoonlike ontmoeting. Foto: AFP/ Die Jomioeri Sjimboen

2025-10-31 10:44:38

Ongeveer 700 volgens opposisie sedert Woensdag in Tanzanië dood

Ongeveer 700 mense is dood in drie dae van betogings weens Woensdag se verkiesing in Tanzanië, het die hoofopposisieparty Chadema Vrydag aan AFP gesê.

Mense het Vrydag in die ekonomiese hoofstad Dar es Salaam betoog, het John Kitoka, woordvoerder van die party, gesê.

“Terwyl ons praat, is die sterftesyfer in Dar (es Salaam) ongeveer 350 en in Mwanza meer as 200. Voeg by sterftes op ander plekke in die land dan is dit ongeveer 700,” sê hy.

’n Veiligheidsbron het aan AFP gesê hulle hoor van soortgelyke syfers. – AFP

’n Polisiebeampte probeer ’n man Woensdag keer wat volgens kiesbeamptes die stemproses in Stone Town, Tanzanië, wou beïnvloed. Foto: AFP

2025-10-31 11:24:34

WGO bekommerd oor sterftes, verspreiding van a-pokke

Die Wêreldgesondheidsorganisasie (WGO) het Vrydag gesê dat 17 lande in Afrika die afgelope ses weke die aanhoudende aktiewe oordrag van a-pokke ervaar het, met 2 862 bevestigde gevalle, insluitend 17 sterftes van 14 September tot 19 Oktober.

Volgens die WGO is a-pokke sedert die organisasie se laaste verslag die eerste keer in Maleisië, Namibië, Nederland, Portugal en Spanje aangeteken.

A-pokke is ’n virale infeksie wat deur noue kontak versprei en gewoonlik griepagtige simptome en ettergevulde letsels veroorsaak. Die simptome is gewoonlik lig, maar kan dodelik wees. – Reuters

2025-10-31 11:32:28

VSA, Brittanje onttrek ambassadepersoneel uit Mali

Amerika en Brittanje het besluit om nienoodsaaklike personeel uit hul ambassades in Mali te onttrek waar ’n brandstofblokkade deur djihadiste voortduur. Die Amerikaanse departement van buitelandse sake het Donderdag gelas dat die Amerikaanse ambassade se “nienoodsaaklike personeel en hul gesinslede Mali moet verlaat weens veiligheidsrisiko’s”.

Brittanje het ook beveel dat sy nienoodsaaklike ambassadepersoneel tydelik uit Bamako, die hoofstad, onttrek.

Sedert 2012 gaan dié land gebuk onder ’n toename in geweld deur ekstremistiese groepe, veral djihadiste wat gereeld aanvalle loods, insluitend blokkades en besettings van dele van die land. – AFP

2025-10-31 11:47:06

Lekkers vir Allerheiligeaand (Halloween)

Pres. Donald Trump en sy vrou, Melania, hou ’n geleentheid vir Allerheiligeaand (Halloween) by die Withuis in Washington waar hulle lekkers aan kinders uitdeel. Foto: AFP

2025-10-31 12:14:02

Opposisieleier na veiligheid begelei ná Kameroen se betwiste verkiesing

Die Kameroense opposisieleier Issa Tchiroma Bakary is Vrydag deur soldate, wat na bewering lojaal aan hom is, na ’n veilige plek begelei vir sy beskerming.

Dit dui op moontlike verdeeldheid binne die weermag ná ’n omstrede presidentsverkiesing op 12 Oktober, wat Tchiroma aanvoer hy gewen het.

Sedert die verkiesing het hy in sy huis in Garoua geskuil. Kameroen se Konstitusionele Raad het pres. Paul Biya (92) tot wenner verklaar.

Die uitslag het tot gewelddadige betogings in verskeie stede gelei, waar veiligheidsmagte daarvan beskuldig is dat hulle minstens 23 betogers doodgeskiet en meer as 500 mense in hegtenis geneem het.

Tchiroma het intussen sy ondersteuners versoek om vir drie dae tuis te bly om hul ontevredenheid te toon. – Reuters

2025-10-31 12:21:56

Singapoer-polisie gryp R2,1 miljard se bates van sakeman

Die polisie in Singapoer het meer as S$150 miljoen (sowat $115 miljoen of R2,1 miljard) se bates gekonfiskeer wat gekoppel word aan Chen Zhi, 'n Brits-Kambodjaanse sakeman wat daarvan beskuldig word dat hy dwangarbeidskampe in Kambodja bestuur as deel van grootskaalse bedrognetwerke.

Die beslaglegging kom nadat die Amerikaanse departement van justisie vroeër vandeesmaand Chen, stigter van die Prince Holding Group, aangekla het. Washington beskryf die groep as ’n dekmantel vir een van die grootste transnasionale misdaadorganisasies in Asië.

Verskeie eiendomme, bank- en sekuriteitsrekeninge en kontant is in beslag geneem. Daar is ook op ’n luukse jag en 11 motors beslag gelê. Chen word deur tot 40 jaar tronkstraf in die gesig gestaar indien hy skuldig bevind word. – AFP

2025-10-31 12:31:36

Samewerking tussen Amerika, China nodig, sê minister

Dong Jun, China se minister van verdediging, sê China en Amerika moet “vertroue” bou om vreedsaam saam te leef. Hy het egter gewaarsku dat Washington versigtig moet wees met sy “woorde en dade” oor Taiwan.

Dong het Vrydag met sy Amerikaanse ampsgenoot, Pete Hegseth, in Maleisië vergader ná ’n onlangse beraad tussen presidente Xi Jinping en Donald Trump in Suid-Korea.

Hegseth het die beraad as “goed en konstruktief” beskryf, maar het kommer uitgespreek oor China se optrede in die Suid-Chinese See en teenoor bondgenote. Hy sê die VSA wil nie konflik hê nie, maar sal sy belange verdedig. China eis Taiwan as sy grondgebied op. – AFP

2025-10-31 13:13:01

Waar’s Andrew?

Lede van die media vergader buite die hekke van Royal Lodge by die Windsor-landgoed in Engeland ná die aankondiging dat Andrew, die jonger broer van koning Charles, sy huurkontrak op die eiendom sal moet prysgee weens sy bande met die veroordeelde seksmisdadiger Jeffrey Epstein.

Foto: Getty Images

2025-10-31 13:20:26

Hoethi’s gaan VN-personeel in Jemen vervolg

Plaaslike personeel van die Verenigde Nasies (VN) in Jemen word binnekort voor die hof gedaag op grond van vermoedens van betrokkenheid by ’n Israeliese lugaanval in Augustus, waarin senior leiers van die Iran-ondersteunde Hoethi-rebellegroep in Sanaa dood is. Dié aanval was die eerste wat ministers van die Hoethi-regering getref het.

Alhoewel 36 VN-werknemers gearresteer is, is dit onduidelik hoeveel aangekla sal word. Die VN ontken alle bewerings van betrokkenheid. Volgens die waarnemende minister van buitelandse sake, Abdulwahid Abu Ras, geskied al die stappe onder toesig van die regbank.

Hy beweer ’n eenheid van die Wêreldvoedselprogram was direk betrokke by die aanval. Die Hoethi rebellegroep beheer steeds groot dele van Jemen sedert hul magsoorname in 2014, wat internasionale hulpverlening bemoeilik. – Reuters

2025-10-31 13:26:01

FBI weer glo terroriste-aanval af in Michigan

Kash Patel, direkteur van die Amerikaanse speurdiens, die FBI, het Vrydag gesê die agentskap het ’n "potensiële terroriste-aanval", wat in die noordelike deelstaat Michigan oor Halloween-naweek beplan is, in die wiele gery.

"Die FBI het vanoggend ’n potensiële terroriste-aanval gedwarsboom en verskeie verdagtes in Michigan in hegtenis geneem wat na bewering ’n gewelddadige aanval oor Halloween-naweek beplan het," het Patel in ’n plasing op X geskryf. Volgens Patel sal meer besonderhede oor die beweerde komplot later vrygestel word.

Die polisie in Dearborn, ’n stad wes van Detroit, het gesê die FBI het vroeg Vrydag operasies in Dearborn uitgevoer. "Ons wil ons inwoners verseker dat daar tans geen bedreiging vir die gemeenskap is nie," het die polisie gesê. – AFP

2025-10-31 13:37:11

Eerste gesprek tussen Takaichi, Xi beklemtoon streeksspanning

Sanae Takaichi, nuwe premier van Japan, het Vrydag gesê sy het “ernstige kommer” oor die Suid-Chinese See, Hongkong en Xinjiang uitgespreek tydens haar eerste, regstreekse ontmoeting met China se president, Xi Jinping, in Suid-Korea.

Xi het op sy beurt gehoop dat Takaichi se regering ’n “regte begrip” van China sal hê. Takaichi, ’n uitgesproke ondersteuner van Taiwan en gereelde besoeker aan die omstrede Yasukuni-heiligdom, het beklemtoon dat sy op ’n “strategiese en wedersyds voordelige verhouding” tussen Japan en China hoop. Sy het egter ook kwessies soos die Senkaku-eilande, uitvoerbeperkings op strategiese goedere en die vrylating van Japannese burgers aangehoor.

China verwerp bewerings oor menseregteskendings teen Uyghurs, terwyl sy aanspraak op die Suid-Chinese See internasionaal betwis word. Albei leiers stem saam dat stabiliteit in die streek ’n prioriteit bly. – AFP

2025-10-31 14:00:51

Die nuwe museum is dáái kant toe

Egiptenare Vrydag op hul balkon langs ’n banier wat die kop van koningin Nefertiti uitbeeld op ’n woonstelgebou langs die snelweg wat na die nuwe Groot Egiptiese Museum (GEM) by die bekende piramides van Giza lei. Dié museum se amptelike opening is Saterdag. Foto: Reuters

2025-10-31 14:14:43

Sentristiese D66-party wen Nederlandse verkiesing

Die Nederlandse sentristiese D66-party het die meeste stemme in Woensdag se algemene verkiesing gewen, het die nuusagentskap ANP Vrydag berig.

Dit plaas sy 38-jarige leier, Rob Jetten, op koers om die jongste premier tot dusver in Nederland te word.

“Dit is ’n historiese uitslag vir die D66. Terselfdertyd voel ek ’n groot verantwoordelikheid,” het Jetten aan verslaggewers gesê.

Jetten het Vrydag aan AFP gesê sy oorwinning oor die verregse Geert Wilders se PVV-party wys dat dit moontlik is om populistiese partye wat in Europa aan die opkom is, te klop.

“Ek dink ons het nou aan die res van Europa en die wêreld gewys dat dit moontlik is om die populistiese bewegings te klop as jy ’n positiewe boodskap het,” het Jetten gesê. – AFP

Rob Jetten (38), leier van die Nederlandse sentristiese D66-party. Foto: Reuters

2025-10-31 14:35:26

Oktober Taiwan se warmste maand nóg

Oktober was Taiwan se warmste maand sedert rekordhouding begin het, het die land se weeragentskap Vrydag gesê. Dit is die jongste in ’n reeks wêreldwye temperatuurrekords.

Die hoofeiland het die hoogste gemiddelde temperatuur sedert 1950 ervaar, het die weeragentskap gesê.

Teen 30 Oktober was Taiwan se gemiddelde temperatuur vir die maand 27,381 °C. Die vorige rekord van 27,009 °C was in 2016. – AFP

2025-10-31 15:03:55

Bon voyage!

Mense wuif Vrydag op ’n afskeidseremonie vir die Chinese ruimtereisigers (van links) Zhang Hongzhang, Wu Fei en Zhang Lu voor hul Shenzhou-21-ruimtevlug na China se Tiangong-ruimtestasie. Die drie vertrek later Vrydag vanaf die Jiuquan-lanseersentrum in die Gobi-woestyn in Noordwes-China. Foto: AFP

2025-10-31 15:19:03

Pole onderskep nóg ’n Russiese verkenningsvliegtuig

Pole het Vrydag gesê sy vegvliegtuie het die derde keer die week ’n Russiese verkenningsvliegtuig oor die Baltiese See onderskep.

Die Russiese vliegtuig het nie Pole se lugruim geskend nie, het die Poolse weermag gesê.

Lande op Navo se oostelike flank is sedert September op hoë gereedheidsgrondslag vir moontlike lugruimskendings toe drie Russiese militêre vliegtuie Estland se lugruim geskend het, ’n paar dae nadat meer as 20 Russiese hommeltuie na berig word Pole se lugruim binnegedring het. – Reuters

2025-10-31 15:37:46

Senior offisiere in G-Bissau vas oor ‘staatsgreeppoging’

’n Groep senior offisiere van Guinee-Bissau se weermag is in hegtenis geneem op aanklagte van ’n poging tot ’n staatsgreep, het die weermag Vrydag gesê.

Die offisiere is Donderdag in hul huise in die hoofstad, Bissau, in hegtenis geneem.

“Dit was ... ’n nuwe poging om die grondwetlike orde te ondermyn, aan die vooraand van die aanvang van die verkiesingsveldtog,” het genl. Mamadu Ture, adjunk-stafhoof, op ’n perskonferensie gesê.

Volgens pres. Umaro Sissoco Embalo was daar al twee pogings om hom omver te werp, waarvan die mees onlangse in Desember 2023 was. – Reuters

2025-10-31 16:01:03

Pampoenkoors weer die grimmigheid af

’n Man stap Vrydag verby iemand in ’n kostuum ten tyde van die jaarlikse Derry Halloween-karnavalparade in Londonderry, Noord-Ierland, op Allerheiligeaand. Foto: Reuters

2025-10-31 16:16:06

Moslemlande vergader in Turkye oor Gasa-vredesplan

Turkye sal Maandag ’n vergadering van ministers van buitelandse sake van Moslemlande aanbied om ’n Amerikaanse vredesplan vir die Gasastrook en die volgende stappe te bespreek, het Hakan Fidan, die minister van buitelandse sake, Vrydag gesê.

Fidan het bygevoeg dat Turkye bekommerd is oor of die wapenstilstand sal voortduur.

Fidan het aan verslaggewers gesê dat die vergadering “ons vordering sal evalueer en bespreek wat ons saam in die volgende fase kan bereik”. – AFP

2025-10-31 16:35:59

VSA sal kernwapens toets as ander lande dit doen – Trump

Pres. Donald Trump het Vrydag gesê Amerika sal kernwapentoetse uitvoer as ander lande dit doen, maar het nie duidelikheid verskaf oor watter soort toetse nie.

“Ons gaan ’n paar toetse doen, ja, en ander lande doen dit. As hulle dit gaan doen, gaan ons dit doen,” het Trump aan joernaliste aan boord van Air Force One gesê.

Hy het nie direk geantwoord toe hy gevra is of Amerika ondergrondse kernwapentoetse gaan hervat nie. “Jy sal baie gou uitvind,” het Trump gesê.

Trump het Donderdag gesê hy het die Amerikaanse weermag opdrag gegee om die proses vir die toets van kernwapens onmiddellik te herbegin ná 'n onderbreking van 33 jaar, ’n stap wat oënskynlik ’n boodskap is aan mededingende kernmoondhede soos China en Rusland. – AFP, Reuters

2025-10-31 17:14:21

Geen aanvalle op Venezuela oorweeg, sê Trump

Pres. Donald Trump sê hy oorweeg nie aanvalle op Venezuela nie, terwyl vrese ontstaan dat Amerika se groter militêre teenwoordigheid in dié streek gemik is op regimeverandering in dié land.

Amerika het agt van sy vlootskepe na die Karibiese Eilande ontplooi, F-35-vegvliegtuie na Puerto Rico gestuur en ’n vliegdekskip-aanvalsgroep is op pad na die streek. Amerika dring egter daarop aan dat dit gedoen word om dwelmsmokkelary te bekamp.

"Nee," het Trump geantwoord toe ’n joernalis aan boord van Air Force One hom gevra het oor berigte dat hy sulke aanvalle oorweeg.

Amerika het vroeg in September aanvalle op beweerde dwelmsmokkelvaartuie in die Karibiese Eilande en die oostelike Stille Oseaan uitgevoer. – AFP

Pres. Donald Trump Foto: Getty Images

2025-10-31 17:21:31

Britse grenswagte wil staak weens betaling, werkomstandighede

Meer as 120 grenswagte wat Brittanje se waters patrolleer, gaan op 14 November staak weens swak betaling en werkomstandighede, sê ’n vakbond wat hulle verteenwoordig. 

Die meeste van Brittanje se sowat 10 000 grenswagte werk by lughawens en hawens oor die land heen asook in die buiteland. Dis onduidelik hoeveel die land se waters patrolleer.

Brittanje se vakbond vir openbare en kommersiële dienste sê die regering het ses jaar gelede met ’n hersiening begin om die behoefte aan standaardisering van betaling en rolle aan te pak, maar ondanks lang gesprekke is die bekommernisse van sy lede nog nie getakel nie. – Reuters

2025-10-31 17:37:31

Hommeltuigoorlog in Oekraïne kan lei tot groot humanitêre ramp, maan VN

Die oorlog in Oekraïne het ontaard in ’n tegnologiese hommeltuigoorlog waar burgers langs die front elke dag om oorlewing veg.

Die Verenigde Nasies (VN) het Vrydag gewaarsku dat ’n winterkrisis die land bedreig weens aanhoudende aanvalle op kraginfrastruktuur.

Hommeltuigaanvalle was reeds verantwoordelik vir bykans ’n derde van alle burgerlike sterftes vanjaar, terwyl meer as 57 000 mense reeds weens die aanvalle gevlug het, sê Matthias Schmale, humanitêre koördineerder van die VN.

Met beperkte toegang tot basiese goedere en die gevaar van wonings sonder water en krag weens beskadigde infrastruktuur is oorlewing meer uitdagend as ooit. Sonder genoegsame hulpbronne en herstelwerk dreig ‘n grootskaalse humanitêre ramp, waarsku die VN. – AFP

2025-10-31 18:06:29

VSA sal geen hoë amptenaar na klimaatberaad stuur, sê Withuis

Amerika sal geen hoëvlak-amptenare na die komende COP30-klimaatberaad in Brasilië stuur nie, sê ’n amptenaar van die Withuis.

Brasilië bied volgende week ’n hoëvlak-leiersberaad aan voordat die Verenigde Nasies (VN) se twee weke lange klimaatberaad in die stad Belém begin.

Die amptenaar sê pres.Donald Trump het reeds sy administrasie se standpunt oor multilaterale klimaat-optrede duidelik gestel in sy toespraak op verlede maand se beraad van die VN se Algemene Vergadering. Hy het klimaatsverandering toe die wêreld se "grootste bedrogspul" genoem en lande berispe vir die opstel van klimaatbeleidsmaatreëls wat “hul lande ’n fortuin uit die sak jaag”. – Reuters

2025-10-31 18:15:01

So reg uit die kraal van antieke Indië

Kunstenaars, geklee as karakters uit die Hindoe- mitologiese epiese boek Mahabharata, tree op by die nasionale galery van moderne kuns in Bengaluru, Indië. Foto: AFP

2025-10-31 18:19:12

Franse wetgewers verwerp welvaartbelasting-voorstel in begrotingsdebat

Frankryk se laerhuis het Vrydag welvaartbelasting verwerp wat deur die linkses voorgestel is, wat gedreig het om die regering omver te werp as ’n heffing op die superrykes nie in die begroting is nie.

Frankryk is onder druk om teen einde vanjaar ’n bestedingswetsontwerp goed te keur om sy begrotingstekort en stygende skuld te takel, maar ’n politieke dooiepunt het die pogings belemmer. ’n Linkse blok, onder wie die Sosialistiese, die Kommunistiese en die Groen-party, het ’n minimum van 2% belasting op welvaart van meer as 100 miljoen euro (byna R2 miljard) voorgestel.

Wetgewers in die Nasionale Vergadering het die voorstel Vrydagaand egter verwerp, met 228 wat daarteen gestem het teenoor 172 ten gunste daarvan. – AFP

2025-10-31 18:27:17

Amerika gaan weer kerntoetse doen

Die hervatting van kerntoetse is ’n "baie verantwoordelike manier" om kernafskrikking te handhaaf, het Pete Hegseth, Amerikaanse minister van verdediging, Vrydag gesê.

Hegseth voeg by dat die Pentagon met die departement van energie sal saamwerk. "Ons sal dit vinnig aanpak."

Geen kernmoondheid, buiten Noord-Korea in 2017, het in meer as 25 jaar plofbare kerntoetse uitgevoer nie. Dis onduidelik of Amerika kernplofbare toetse of kernkragmissiele gaan toets. – Reuters

2025-10-31 18:32:47

Orkaan-redding

Reddingswerkers en soldate help ’n vrou wat haar huis moes ontruim nadat die Cautorivier oorstroom het weens die orkaan Melissa in Rio Cauto in die Granma-provinsie, Kuba.

Foto: Reuters

2025-10-31 19:05:45

Geen oormatige geweld teen betogers gebruik – Tanzanië

Geen oormatige geweld is teen betogers gebruik nie, het Mahmoud Thabit Kombo, Tanzanië se minister van buitelandse sake, Vrydag in ’n onderhoud met Al-Jazeera gesê. Hy het bewerings deur die opposisie ontken dat sowat 700 mense sedert Woensdag se verkiesing dood is.

“Daar is tot nou geen syfer van enige betogers wat dood is nie," het Kombo gesê.

Intussen het António Guterres, sekreraris-generaal van die Verenigde Nasies, gesê hy is diep besorgd oor berigte van dodelike geweld in die land ná vandeesweek se verkiesing.

Ook Brittanje, Kanada en Noorweë het in ’n gesamentlike verklaring hul kommer uitgespreek. – AFP

2025-10-31 19:30:09

Regter keer opskorting van voedselhulp in VSA

’n Regter van die streekhof in Rhode Island het Vrydag pres. Donald Trump se administrasie verhinder om voedselhulp vir miljoene Amerikaners op te skort te midde van die voortslepende regeringsluiting. Regter John McConnell jr. het beveel dat noodfondse gebruik moet word om daarvoor te betaal.

Die administrasie het gesê daar is weens die regeringsluiting nie genoeg geld om die voordele aan 42 miljoen mense in die lae-inkomstegroep te betaal nie, aangesien dit $8,5 miljard tot $9 miljard per maand kos. – Reuters

2025-10-31 19:45:25

…5 …4 … 3 … 2 …1!

’n Chinese 2F-vuurpyl wat die Shenzhou 21-ruimtetuig en ’n bemanning van drie ruimtevaarders dra, word Vrydag vanaf die Jiuquan-lanseersentrum in die Gobi-woestyn in Noordwes-China gelanseer. Benewens ’n nuwe bemanning vir China se Tiangong-ruimtestasie, onder wie die land se jongste ruimtevaarder nog, is daar ook vier laboratoriummuise aan boord. Foto: AFP

2025-10-31 20:04:43

Christene in Nigerië staan voor 'eksistensiële bedreiging' – Trump

Pres. Donald Trump het Vrydag gesê Christene in Nigerië word deur ’n eksistensiële bedreiging in die gesig gestaar en hy plaas die land op die departement van buitelandse sake se lys van lande wat fyn dopgehou word.

"Duisende Christene word doodgemaak. Radikale Islamiste is verantwoordelik vir hierdie massaslagtings," het Trump in ’n plasing op Truth Social geskryf.

Hy het gesê hy plaas Nigerië op ’n lys lande waaroor "besondere besorgdheid" heers en wat volgens Amerika by skendings van godsdiensvryheid betrokke is.

Luidens die webwerf van die departement van buitelandse sake sluit die lys lande soos China, Mianmar, Noord-Korea, Rusland en Pakistan in. – Reuters

2025-10-31 20:23:10

‘Dagsê, dagsê, mense’

Pous Leo Vrydag tydens ’n ontmoeting met opvoeders op die St. Pietersplein in die Vatikaanstad. Foto: Reuters