Terwyl die regspanne van Transnet en pensioentrekkers nog onderhandel oor 'n moontlike skikking in die pensioentrekkers se groepseis weens hul karige pensioen, het sowat 20 000 pensioentrekkers en hul eggenote al sedert 2013 gesterf.
Dit blyk uit syfers wat Pravin Gordhan, minister van openbare ondernemings, in 'n skriftelike antwoord op 'n parlementêre vraag van adv. Anton Alberts van die VF Plus verskaf het.
In Maart 2013 toe die pensioentrekkers se regspan amptelik met sy regsoptrede begin het, was daar sowat 75 000 pensioentrekkers en afhanklikes van die Transnet Vervoerpensioenfonds en die Transnet Tweedevastevoordeelfonds.
Daar is nou nog net 55 000 van hulle oor.
Intussen kry hulle steeds 'n verhoging van net 2% per jaar in hul pensioene teenoor inflasiesyfers van meer as dubbel soveel, weens swak beleggingsbesluite wat deur Transnet en die pensioenfondse in die vroeë 2000's geneem is, asook beloftes van die destydse topbestuur in die 1990's wat volgens die pensioentrekkers nooit nagekom is nie.
Sedert die pensioentrekkers teen 2013 besluit het om 'n groepseis teen Transnet en die pensioenfondse aanhangig te maak het 9 697 pensioentrekkers en 11 071 van hul eggenote en kinders al gesterf.
Dit kom neer op 'n gemiddelde van 156 pensioentrekkers en 178 eggenote en kinders per maand, oftewel sowat 333 per maand, volgens Gordhan se inligting.
