Lindie-Alet van Staden is vroeër die maand by die Wes-Kaapse Prestige-landboupryse aangewys as die beste landbouwerker van 2024 - 'n waardige wenner volgens die departement van landbou.
Van Staden, tuin-en-olyfboordbestuurder van die wynlandgoed L'Ormarins buite Franschhoek, is deur dr. Ivan Meyer, die Wes-Kaapse minister van landbou, ekonomiese ontwikkeling en toerisme, geprys vir haar leierseienskappe en vaardighede. Luidens 'n verklaring deur die departement sal sy 'n "waardevolle bydrae lewer om die bekommernisse van landbouwerkers in die provinsie te opper".
Vanjaar is 1 233 inskrywings vir die kompetisie ontvang. Die kompetisie erken die deurslaggewende rol wat landbouwerkers speel om die ekonomie te laat groei en voedselsekerheid te bevorder. Van Staden sal nou ingehuldig word as lid van die Wes-Kaapse Prestige-landbouwerkersforum. Die forum is 'n liggaam wat die Wes-Kaapse ministerie van landbou adviseer oor sake wat die lewe van landbouwerkers beïnvloed.
Deelnemers het vir 11 kategorieë ingeskryf en die ander was die volgende landbouwerkers:
- Algemene werker: Racheline Wilschut van Langeberg;
- Drywer: Ernest Vilander;
- Besproeiingspesialis: Johannes Engelbrecht;
- Diereproduksie: Edward Saaiman;
- Tegniese operateur: Magdelena Smit;
- Maatskaplike ontwikkeling: Sophia de Bruin;
- Landbouverwerking: Christopher Dreyer;
- Administratiewe personeel: Gertruida Lourens;
- Voorman/-vrou: Lungelo Ntamone;
- Junior bestuur: Rozé Tailor;
- Middelbestuur: Anitta Maqashalala; en
- Beste potensiaal: Wilfred Fortuin.
