Die Australiese major-wenner Hannah Green vra dat vroue in die Presidentebeker moet speel om dit mededingender te maak en sê die konsep is reeds in die kleedkamer bespreek.
Amerika het verlede week 'n tiende agtereenvolgende Presidentebeker in Kanada gewen, met die Internasionale span, wat uit spelers van buite Europa bestaan, wat sedert die toernooi op Royal Melbourne in 1998 nie 'n oorwinning kon behaal nie.
Green, sewende op die wêreldranglys en 'n tweemalige LPGA-wenner hierdie seisoen, sê gholf se maghebbers moet dit ernstig oorweeg om 'n gemengdegeslagtoernooi of een slegs vir vroue te skep.
"Oënskynlik het die Internasionale span in die laaste 10 toernooie gesukkel," sê sy.
"Ek dink dat die betrokkenheid van die vroue regtig mededingend sou wees, ek dink dit kan selfs 'n Solheimbeker (spantoernooi vir vroue) of 'n Ryderbeker (spantoernooi vir mans) oortref."
Vanjaar se Internasionale span, wat uit 12 lede bestaan het, het net een speler in die top-10 op die wêreldranglys gehad - Hideki Matsuyama van Japan. In teenstelling hiermee het die Amerikaners vier van die topses ter wêreld gehad.
Dit is 'n ander storie onder vroue, waar spelers van Asië, Australië of Nieu-Seeland agt van die wêreld se 10 topplekke beklee.
"Daar is onder die spelers soort van daaroor gepraat," sê Green oor die potensiaal vir 'n nuwe gemengdegeslagtoernooi.
Miskien kan iemand dit doen, dit sou regtig lekker wees.
"Maar ons weet nie of dit op die kaarte is nie, of iemand moontlik daaraan dink om dit 'n geleentheid te maak nie.
"Selfs al was dit net die vroue . . . dit sou baie mededingend wees as dit Asië-Stille Oseaan teen Europa was. Miskien kan iemand dit doen, dit sou regtig lekker wees."
Die Grant Thornton-uitnodigingstoernooi is tans gholf se enigste gemengdegeslag-spanbyeenkoms.
Die Solheimbeker, wat elke tweede jaar beslis word, is die vroue-ekwivalent van die mans se Ryderbeker, wat Europa teen Amerika te staan bring. - AFP
