Nick Dunlap, wat die eerste speler geword het wat as 'n amateur- en 'n beroepspeler 'n toernooi in dieselfde seisoen kon wen, is as die PGA-reeks se Nuweling van die Jaar aangewys.
Die 20-jarige Amerikaner het Max Greyserman, Jake Knapp en Matthieu Pavon om die Arnold Palmer-toekenning uitgestof en 57% van die stemme van sy medespelers ontvang.
Dunlap het in Januarie in die American Express-toernooi in La Quinta, Kalifornië, geseëvier en sodoende die eerste amateur sedert Phil Mickelson in 1991 geword wat 'n PGA-toernooi wen.
Vier dae ná die oorwinning het Dunlap aangekondig dat hy die sport as 'n beroep gaan beoefen en het hy in Julie die Tahoe Mountain Club-toernooi gewen.
Dunlap het voortgegaan om vir die eerste keer vir die uitspeelrondes van die FedEx-beker te kwalifiseer waar hy na die tweede van drie gevorder het.
Hy het uiteindelik 49ste in die FedEx-beker geëindig en vir die PGA-reeks se vlagskiptoernooie in 2025 gekwalifiseer deur onder die top-50 te eindig.
"Nick het sy plek in die PGA-rekordboeke uitgekerf," sê Jay Monahan, kommissaris van die PGA-reeks.
"Om 2024 as 'n kollegiale gholfspeler te begin en dit met twee PGA-oorwinnings en onder die top-50 spelers in die FedEx-beker af te sluit, is werklik indrukwekkend." - Reuters
