Die internasionaal bekende Suid-Afrikaanse sangeres Tyla, wat roem verwerf het met haar treffer "Water", kom in Desember vanjaar na Suid-Afrika met haar wêreldtoer.
Dit sal haar eerste konserttoer in Suid-Afrika wees en volg ná haar enorme sukses in Amerika en Europa, waar sy vinnig bekendheid verwerf het as een van die opwindendste jong sterre uit Afrika.
Die toer begin op 5 Desember in Kaapstad se Grand Arena, GrandWest, en daarna volg 'n konsert in Pretoria in die SunBet-arena op 7 Desember. Die konserte is deel van 'n groter toer in Afrika en nog datums vir konserte in Afrika sal later aangekondig word.
Aanhangers kan uitsien na van haar grootste treffers soos die gewilde "Water" en "Jump", asook ander snitte van haar debuutalbum, TYLA, wat wêreldwyd baie goed gevaar het op musiekplatforms soos Apple Music en Spotify.
Kaartjies vir die konserte sal vanaf 10 Oktober beskikbaar wees op Ticketmaster, en sal na verwagting vinnig uitverkoop.
Tyla het op sosiale media haar opgewondenheid gedeel om op te tree voor haar aanhangers in Suid-Afrika, wat nou bekend staan as haar "Tygers". Sy wil graag haar internasionale sukses met aanhangers in haar vaderland deel.
Met haar unieke styl wat pop, R&B en Amapiano meng, beloof hierdie tuiskoms-toer om vir groot opwinding op die musiekkalender te sorg.
