Huis + tuin

Vir klein ruimtes

Vir klein ruimtes

Om jou kompakte woning atmosfeer te gee, of as geskenke soos vir Moedersdag: Hier is 'n

paar selfdoen-idees.

A

AANSTEEKBORD

Benodighede

'n Ou prenteraam; Plascon Velvaglo in die volgende kleure: Scalloped Potato vir buiteraam, High Grass vir binneraam en goue stokperdjieverf vir dun binneraampie; 'n stuk linne-materiaal, effe groter as raam, asook dun watteer sel; 'n verskeidenheid oorgetrekte knope van jou geliefkoosde lappies; hardebord so groot soos binnemaat van raam; gomstiffie.

Maak só

• Verf raam in 3 kleure.

• Trek binneraam op linnestof na.

• Plaas watteersel agter en ryg aanmekaar.

• Werk knope eweredig gespasieer deur al die lae vas.

• Plaas hardebord op watteersel, knip lg. weg en smeer gom aan rande van hardebord.

• Vou linne om en plak vas.

• Plaas binne-in raam en hou in posisie met knoplose spykers.

B

MOSAÏEKSPIEëLTJIE

Benodighede

'n Ronde spieël van sowat 20 cm in deursnee; mosaïekteëltjies in lig- en donkergroen, pers, blou, pienk, geel, oranje en rooi; mosaïektang; Flex-mosaïekgom; wit voegbry.

Maak só

• Merk met 'n permanente viltpen 'n ronde raam rondom die spieël van sowat 4 tot 5 cm en doen mosaïekwerk binne die spasie.

• Knip die gekleurde teëltjies eers in die helfte en dan weer in kleiner blaarvorms.

• Knip uit kwart-stukkies teëls rooi, oranje en geel blomkrone.

• Smeer 'n klein bietjie gom met 'n peusel stokkie aan elke stukkie teël en plak elke blommetjie, met blomkroontjie in die middel.

• Knip blare en stingeltjies uit donkergroen en plak tussen blomme.

• Knip liggroen teëls in kwarte en vul spasies tussenin om mosaïekraam te voltooi.

• Laat vir 24 uur.

• Maak voegbry aan volgens aanwysings op pakkie.

• Laat staan 'n rukkie en smeer tussen teëltjies.

• Laat vir sowat 20 minute en vee skoon met 'n klam spons.

C

HANDGEBORDUURDE LINNE

Benodighede

'n Gekoopte laken en kussingslope; DMC-stringkatoen in kleure wat by die slaapkamer pas; borduurnaald; verdwynpen.

Maak só

• Teken ‘n eenvoudige blomrankie en merk die posisies.

• Ons het die hele omvourand van die laken en die gestikte rand van elke kussingsloop borduur, maar 'n enkele blomtakkie sal net so mooi lyk.

• Gebruik eenvoudige borduursteke soos ketting-, satyn-, stam- en agtersteek, asook bouillonrosies.

• Borduur kettingsteke met 3 borduurdrade en die res met 2 drade.

• Spuit nat om verdwynpen te verwyder.

D

TEETAFEL MET KOEKSTAANDER

Benodighede

'n Glasskyf van sowat 25 cm in deursnee en 3 mm dik; glasklonte, verkrygbaar by stokperdjie- of kralewinkels; 'n ou glasbakkie; helder silikoongom.

Maak só

• Laat sny die glasskyf by glasverskaffers en laat hulle die skerp rand glad skuur met 'n skuurmasjien (nie nodig om die rand te politoer nie).

• Neem silikoongom en plak glasklonte styf teen mekaar rondom die rand van die skyf, asook om die buiterand van die glasbakkie en die voetstuk.

• Laat goed droog word.

• Keer glasbakkie om en plak voetstuk aan onderkant en in middel van glasskyf vas. (Die koekstaander het ons slegs R28 gekos.)

E

GASTE-HANDDOEKIES

Benodighede

Wit-en-room wafeldoek van sowat 45 x 120 cm; siergalon en 'n bont strokie katoenstof.

Maak só

• Stik some rondom elke handdoekie.

• Stik siergalon op rand van een vas.

• Stryk soompies in die katoenstrokie en stik sowat 3 cm vanaf die rand op ander handdoekie vas.

F

KLEIN FOTO-ALBUM

Benodighede

2 stukke karton, A5-grootte of soos verkies; dunnerige handgemaakte papier (ons het herwonne papier van Oasis-boekwinkel gebruik - werkverskaffers vir verstandelik gestremdes, 021 674 5570); enige tipe kleursel soos vir voedsel; persoonlike memento's van die familie; tuisrekenaar met drukker.

Maak só

• Kleur die papier na jou smaak (moenie te nat laat word nie).

• Laat droog word.

• Werk op jou tuisrekenaar en skandeer foto's swart en wit in (m.a.w. jy kan kleurfoto's na swart/wit verander).

• Druk dit uit op handgemaakte papier en skeur 'n eweredige buiterandjie rondom elke prentjie.

• Plak op 'n effe groter stukkie papier om 'n raampie te vorm.

• Trek die 2 kartonne oor vir 'n voor- en agterblad.

• Plak 2 of 3 velle aanmekaar tot 'n lang strook en vou 'n konsertina.

• Sny tot regte breedte en plak aan kartonne.

• Plak lint tussen voorblad en eerste konsertina.

• Voltooi album met foto's, gediggies en gesegdes.

Wenk: Scrapbooking is deesdae 'n gewilde manier om herinneringe te bewaar. Maak so 'n plakboek vir aandenkings of as geskenk soos hier beskryf, so groot of klein as wat jy verkies.

admin

SPELETJIES VANDAG

Spesiaal vir intekenare!CTA

Elke dag ’n nuwe blokraai, sudoku en woordblom asook ’n weeklikse vasvra élke Vrydag. 

SPEEL SAAM