Suid-Afrika het 'n ronde op die redelik nuwe internasionale veldren-reeks, die World Rally Raid Championship, gekry.
Die internasionale reeks is in 2022 gestig en bring al die groot byeenkomste, soos die Dakar en die Rallye du Maroc, bymekaar in een seisoen. Talle van die grootste veldren-spanne neem aan die kort reeks deel.
Volgende jaar se kalender bevat slegs vyf byeenkomste: Dit begin met die Dakar-uithouren in Saoedi-Arabië vroeg in Januarie, waarna die Abu Dhabi Desert Challenge einde van Februarie volg.
Suid-Afrika kry die derde ronde, geskeduleer vir 18 tot 24 Mei, en sal as die South African Safari Rally bekend staan.
Die vierde ronde is die Rally Raid Portugal (22 tot 28 September), terwyl die Rallye du Maroc (10 tot 17 Oktober) die seisoen sal afsluit.
