Dit was onlangs die Paryse Modeweek en soos met enige ander belangrike mode- en skoonheidsgeleentheid het daar verskeie nuwe tendense voelers uitgesteek. Daar is opwindende haar- en grimeerneigings wat jy op die proef kan stel.
Versieringskuns vir jou oë
Die immergewilde katoog kan opsy staan, driedimensionele verfraaiing vir jou oë is nou in die kol.
Ongewone lipkombinasies
Die fokus is opnuut op lipomlyner. Gebruik lipomlyner om nie net jou lippe foutloos te laat lyk nie, maar probeer 'n speelse aanslag. By Vivienne Westwood se modevertoning het modelle 'n verskeidenheid lipstiffies en lipomlyner gedra. Dink aan bruin en pienk of pienk en rooi, daar is opwindende kleurkombinasies wat jy kan dra.
Oorgroot vlerke
In plaas van 'n subtiele gevlerkte oogvoorkoms, kombineer rokerige oogskadu met 'n oorgroot vlerk. By Chanel se modevertoning het dit die koppe laat draai.
Verfomfaaide krulle
'n Sorgelose krulvoorkoms wat herinner aan die bekende sewentigerjare is hoogmode. By die Chloé modevertoning is so 'n voorkoms op al die modelle geskep, krulle wat ingeleef lyk met mooi tekstuur.
