Wanneer mense ophou om gewigsverliesmiddels te neem, verdwyn die voordelige uitwerking van die middels op hul gewig en ander gesondheidsprobleme binne twee jaar, is in ’n ontleding van vroeëre navorsing bevind.
Navorsers het die data van 9 341 vetsugtige of oorgewig pasiënte hersien wat in 37 studies met 18 verskillende gewigsverliesmiddels behandel is. Hulle het bevind dat die pasiënte ’n gemiddeld van 0,4 kg per maand aangesit het nadat hulle die gebruik van die middels gestaak het. Projeksies dui daarop dat hulle “binne 1,7 jaar” weer dieselfde sal weeg as voor die behandeling.
Hartgesondheid-risikofaktore soos bloeddruk en cholesterolvlakke, waarvoor die middels voordelig was, sal volgens projeksies binne “gemiddeld 1,4 jaar” terugkeer nadat gebruik gestaak word, lui ’n verslag van die studie in die vaktydskrif The BMJ.
Sowat die helfte van die pasiënte het GLP-1-medikasie geneem, van wie 1 776 die nuwer, doeltreffender middel semaglutied ontvang het, wat as Ozempic en Wegovy verkoop word, of tirzepatied, wat as Mounjaro en Zepbound verkoop word.
Die gewigstoename was vinniger met semaglutied en tirzepatied – gemiddeld bykans 0,8 kg per maand.
“Maar omdat mense op semaglutied of tirzepatied in die eerste plek meer gewig verloor, keer hulle almal op ongeveer dieselfde tyd na die basislyn terug,” sê Dimitrios Koutoukidis, senior navorser aan die Universiteit van Oxford. “Dit is sowat 1,5 jaar met die nuwe middels, teenoor 1,7 jaar nadat enige van die ander middels gestaak is,” sê Koutoukidis.
Ongeag hoeveel gewig verloor is, was die maandelikse gewigstoename vinniger ná die gebruik van gewigsverliesmiddels teenoor gewigbestuursprogramme wat op gedrag gegrond is, het die navorsers bevind.
Die retrospektiewe studie kon nie bepaal of sommige pasiënte meer geneig was as ander om die gewig af te hou nie.
“Om te verstaan wie goed vaar en wie nie, is ’n bietjie van ’n ontwykende vraag in gewigsverliesnavorsing. Niemand het nog die antwoord hierop nie,” sê Koutoukidis.
