Melania Trump (55), presidentsvrou van Amerika, het Maandag vanjaar se Kersversierings by die Withuis onthul.
Die versierings is in ’n kleiner ruimte nadat pres. Donald Trump (79) ’n deel van die geskiedkundige gebou vir ’n nuwe balsaal gesloop het.
Melania se tema is “Die huis is waar die hart is”, ondanks die feit dat sy betreklik min tyd in Washington DC deurbring en eerder New York en Florida verkies.
Die versierings sluit ’n yslike Lego-portret van pres. Trump in, ’n groot gemmerbrood-Withuis, duisende dekorskoenlappers en meer as 50 Kersbome.
“ ’n Huis is nie bloot ’n fisieke ruimte nie, dit is eerder die warmte en gemak wat ek binne-in het, ongeag my omgewing,” sê Melania luidens ’n verklaring wat deur die Withuis uitgereik is.
Die werklike fisieke ruimte wat vir vanjaar se Kersversierings by die Withuis beskikbaar is, is egter kleiner. Vorige jare was baie van die mees dramatiese uitstallings tradisioneel in die Oos-vleuel van die Withuis, waar die presidentsvrou se kantoor was en waar gaste vir seisoenale geleenthede by die Withuis aangekom het.
Die Oos-vleuel is nou egter in puin om plek te maak vir Donald se balsaal van $300 miljoen. Werkers het Maandag die laaste bakstene van die Oos-vleuel afgekap, het ’n AFP-fotograaf gesien.
Vanjaar se Kersversierings is dus almal in die hoofherehuis. Die middelpunt is ’n boom van 5,5 m in die Blou Kamer, ’n denneboom van die deelstaat Michigan wat goue sterre vertoon om die families van gevalle Amerikaanse weermaglede te gedenk.
Die versierings sluit aksente in rooi, wit en blou in om volgende jaar se 250ste herdenking van Amerikaanse onafhanklikheid aan te dui en balle vir Melania se “Be Best”-onderwysinisiatief.
Trump self het intussen getoon dat hy nie haastig is om binnekort sy laaste Kersfees in die Withuis te vier nie. Sy tweede termyn eindig in 2029.
“Ons het ’n bietjie meer as drie jaar oor en drie jaar vir Trump is ’n ewigheid,” het hy aan gaste by ’n Kerspartytjie gesê, in ’n video wat deur ’n amptenaar van die Withuis geplaas is.
