In die nuutste PowerBall-trekking wat Dinsdag plaasgevind het, het 'n Suid-Afrikaner die allemintige boerpot van R124 602 697,30 losgeslaan.
Die wenkaartjie is via die Absa-app gekoop en die wenner het R37,50 betaal, lui 'n verklaring wat by navraag aan Netwerk24 gestuur is. Die wenner het self die nommers gekies.
Behalwe vir die boerpotbedrag, was daar ook verskeie ander wenners in ander afdelings.
Sewe spelers het vyf nommers reggekry en stap sodoende met meer as R115 000 elk weg. Daar is ook 49 ander mense wat elk meer as R10 000 gewen het.
Die kleiner wenners het hul kaartjies deur 'n verskeidenheid platforms gekoop, insluitend kleinhandelaars.
Ithuba, wat die Lotto bedryf, verwag dat die boerpotwenner binnekort die geld sal opeis, aangesien bank-apps wenners outomaties in kennis stel.
