Drie Wes-Kaapse boere pronk vanjaar as van die groot wenners van die jaarlikse Nasionale Meestersuiwelboer-pryse.
Die wenners van hierdie kompetisie, aangebied deur die Landbounavorsingsraad (LNR), is Woensdag 13 November tydens 'n geleentheid by Lanzerac in Stellenbosch bekend gemaak. Jaarliks ontvang die land se top-suiwelboere erkenning met wenners wat in verskeie kategorieë aangewys word.
Barry Schiever van Foundation Farm in KwaZulu-Natal is as Grootskaal-meestersuiwelboer van die Jaar aangewys.
Foundation Farm is in 1990 in Weenen met 20 geregistreerde koeie begin en vandag melk hulle sowat 2 000 koeie. Die twee melkerye op die plaas verskaf melk aan onder meer Nestlé, Douglasdale en Dairyland.
Vanjaar het Wes-Kaapse suiwelboere koning gekraai in drie van die vyf kategorieë: die Mediumskaal-meestersuiwelboer van die Jaar kom van Heidelberg, die kudde met die beste somatiese seltelling kom van Swellendam en die kudde met die beste tussenkalfperiode kom van Plettenbergbaai.
Die prysgeleentheid is deur Agri-Expo, namens die Nasionale Melkaantekening-en-verbeteringskema van die LNR, aangebied.
Vanjaar se wenners
Hier is al die wenners van die 2024 Nasionale Meestersuiwelboer-pryse:
- Grootskaal-meestersuiwelboer van die Jaar: Foundation Farm (Barry en Jane Schiever), Weenen, KZN;
- Mediumskaal-meestersuiwelboer van die Jaar: Tweekop Boerdery (Pieter Steenkamp en Dirk van Papendorp), Heidelberg, Wes-Kaap;
- Kleinskaal-meestersuiwelboer van die Jaar: Gugulomuzi Ngcobo, Donnybrook, KZN;
- Nasionale kudde met die beste somatiese seltelling: E (Etienne)Zeeman, Swellendam, Wes-Kaap, met 157 000 selle/ml;
- Nasionale kudde met die beste tussenkalfperiode: Packwood Farm (Heinrich Hurter), Plettenbergbaai, Wes-Kaap, met 'n tussenkalfperiode van slegs 391 dae.
