'n Nuwe program om bestuurders van graan depots op te lei fokus daarop om die toekoms van mense in hierdie bedryf te bevorder.
Agbiz Grain het onlangs die bekendstelling van sy Graan Depot-bestuurder-program gevier. Hierdie program is 'n samewerking tussen Agbiz Grain, Senwes en Peritum Agri en is oor vier jaar ontwikkel om vaardighede en kundigheid in die landboubedryf te bevorder.
Op die geleentheid het die sprekers Emmie Pietersen, direkteur van die Peritum Agri Instituut; Heinrich Henning, operasionele bestuurder by Senwes; en Wessel Lemmer, algemene bestuurder van Agbiz Grain, hul insigte en opwinding oor hierdie program gedeel.
Waaroor gaan die program?
Die Graan Depot-bestuurderprogram is gerig op die behoeftes van ondernemings wat graan en oliesade hanteer, veral dié wat boere dien. Dit het ten doel om leerlinge met die vaardighede toe te rus om doeltreffend as graandepotbestuurders op te tree.
Die program lê klem daarop om operasionele doeltreffendheid, verantwoordelike hulpbronbenutting en die handhawing van die meganiese integriteit van groot graanhantering en -pakhuise te bereik. Ná voltooiing van die program sal die leerlinge operasionele teikens doeltreffend kan bestuur en bereik en personeel kan lei en bestuur sodat sakebedrywighede vlot verloop.
Verder gaan hulle operasionele hulpbronne verantwoordelik kan benut en doeltreffendheid in graanhantering en -pakhuise verseker terwyl gehaltestandaarde nagekom word. Hulle sal ook akkurate graan- en oliesaad-gradering kan uitvoer.
Die program staan bekend as "Occupational Certificate: Grain Depot Manager" en hierdie kwalifikasie is 'n beduidende stap om vaardighede in die graan- en oliesaadbedryf te verbeter.
- Besoek gerus die webtuiste by www.agbiz.co.za vir nog inligting.
