Die voormalige uitvoerende hoofde van Transnet wat by 'n omstrede lokomotieftender van R93 miljoen betrek word, is Maandag in hegtenis geneem.
Brian Molefe en Siyabonga Gama het hulle by 'n polisiekantoor in Brackensdown in Alberton, Gauteng, oorgegee, het Henry Mamothame, woordvoerder van die Nasionale Vervolgingsgesag (NVG) se ondersoekdirektoraat teen korrupsie, aan Netwerk24 bevestig.
Hulle sal na verwagting Maandag in die landdroshof in Palm Ridge verskyn.
Die voormalige finansiële hoofde Anoj Singh en Garry Pita, asook Phetolo Ramosebudi, oudtesourier van die Transnet-groep, het reeds op aanklagte van bedrog, geldwassery en korrupsie verskyn.
Hulle was in Februarie saam in die hof en is op borgtog vrygelaat.
Molefe en Gama is LP's in die MK-party (MKP).
• Die berig is sedert aanvanklike publikasie bygewerk met kommentaar van die NVG.
