Twee Wes-Kaapse leerlinge is gekies om Suid-Afrika op die 2024 Izmir Internasionale Skou (IISEEF) in Turkye te verteenwoordig.
Thiedu du Preez van die Hoërskool Vredenburg en Aadil Dawood van die Bishops Diocesan College moes sedert Saterdag tot môre hul projekte by die skou aanbied.
Die IISEEF gee aan leerders die geleentheid om projekte in verskeie wetenskaplike kategorieë aan te bied, soos fisika en chemie, asook biologie, energie en ingenieurswese, wiskunde en rekenaarwetenskap, en musiek. Hierdie velde is van kritieke belang vir die Suid-Afrikaanse en Wes-Kaapse ekonomieë.
Thiedu se projek, getiteld Seal to Heal: Economical natural alternatives for wound healing, kyk na die gebruik van natuurlike produkte vir die verseëling van wonde en die verskaffing van beskerming teen infeksies. Dit kan 'n alternatief bied vir die chemiese oplossings wat tans gebruik word.
"Ná vier jaar se voorbereiding is ek opgewonde om die geleentheid te kry om my skool, my dorp en my land te verteenwoordig. Om my projek internasionaal te kan deel is 'n voorreg waarvoor ek so dankbaar is. Ek is baie opgewonde om na Turkye te reis en 'n nuwe wêreld te ervaar.
"Hierdie ervaring is nie net oor die kompetisie nie, maar oor die mense, die kulture en die inspirerende gesprekke wat ek sal hê. Ek sien ook uit daarna om Turkse kos te eet en die stad te verken," het Thiedu gesê.
Thiedu se wetenskaplike reis het in 2021 tydens die Covid-19-pandemie begin toe hy as gr. 8-leerling besluit het om aan die Eskom-ekspo vir jong wetenskaplikes deel te neem.
Wat begin het as 'n eenvoudige projek tydens inperking, het onverwags gelei tot sy eerste medalje en 'n passie vir wetenskap wat sedertdien gegroei het.
Thiedu het elke jaar aan die kompetisie deelgeneem en sy harde werk is beloon met goue medaljes en selfs die toekenning vir die mees innoverende projek.
Thiedu gee ook krediet aan die Eskom-ekspo, sy skool en sy wetenskaponderwysers wat hom oor die jare ondersteun het.
"Sonder hierdie ondersteuning sou ek nooit my liefde vir wetenskap ontwikkel het nie," erken hy.
Aadil sal sy projek met die titel Spectro-metrical analysis of urinary metabolic by-products forming as a result of exercise aanbied, wat die impak van oefening op die menslike liggaam op molekulêre vlak ontleed.
Dit het die potensiaal om nie-indringende urine-metabolietmonitering te gebruik om 'n atleet se fisiologie te assesseer.
"Ek is opgewonde om aan IISEEF in Turkye deel te neem, waar ek die kans sal kry om met eweknieë van regoor die wêreld te skakel, idees te deel en myself in 'n nuwe kultuur te verdiep.
"Ek is ongelooflik dankbaar vir hierdie geleentheid, want dit is 'n ongelooflike ervaring wat my blootstel aan vars perspektiewe en my dryfkrag aanwakker om betekenisvol tot die wetenskap by te dra," het hy gesê.
