Een van die belangrikste vaardighede om op hoërskool te ontwikkel, is om te leer hoe om doeltreffend te studeer.
Vir baie hoërskoolleerlinge is die fokus feitlik uitsluitlik daarop om goed te vaar in hul volgende eksamen deur hul werk op watter manier ook al te probeer bemeester.
"Alhoewel dit natuurlik belangrik is om in eksamens optimaal te probeer presteer, is die meer fundamentele vaardigheid om te bemeester die vermoë om doeltreffend te studeer terwyl die werklading nog relatief beperk is," sê dr. Linda Meyer, besturende direkteur van IIE Rosebank Kollege.
Hoërskool moet beskou word as 'n trapklip wat studente voorberei vir die uitdagings van hoër onderwys en uiteindelik 'n suksesvolle loopbaan.
"Hoërskool is 'n fase gevul met gevorderde vakke, verhoogde onafhanklikheid en persoonlike aanspreeklikheid. Dit is die tyd om sterk studiegewoontes te vestig, nie net vir hoërskoolsukses nie, maar as grondslag vir toekomstige akademiese pogings, veral op universiteit."
Meyer verduidelik dat hoërskool beskou moet word as 'n trapklip wat studente voorberei vir die uitdagings van hoër onderwys en uiteindelik 'n suksesvolle loopbaan.
Dit is die tyd om daardie vaardighede en gewoontes te ontwikkel wat jy vir die res van jou lewe kan saamdra, sê sy. "Die verskuiwing van 'n gestruktureerde hoërskoolomgewing na die meer onafhanklike en selfgerigte universiteitswêreld kan 'n spelwisselaar wees. Dit is waar die studiegewoontes wat jy op hoërskool ontwikkel het ter sprake kom, wat jou help om aan die hoër verwagtinge en verhoogde leereise van die universiteitslewe te voldoen."
Meyer sê verder dat daar verskeie fondamente is wat doeltreffende studiegewoontes ondersteun, en ouers en onderwysers behoort studente te help om dit te ontwikkel.
Introspeksie en aanpasbaarheid
Om 'n mens se leervoorkeure en -behoeftes te verstaan, is die hoeksteen van doeltreffende studiegewoontes.
Hoërskoolleerlinge moet self-evaluering toepas of ondersteuning soek om hul leerstyl te identifiseer, hetsy ouditief, visueel of kinesteties. Om studiemetodes by hierdie persoonlike neigings aan te pas, kan begrip en behoud aansienlik verhoog. Dit is ook die moeite werd om vroeg in jou hoërskoolloopbaan 'n goeie studiemetode-werksessie by te woon.
Bemeester tydsbestuur
Doeltreffende tydsbestuur is deurslaggewend in 'n hoërskoolomgewing en verder. Dit behels die prioritisering van akademiese take, die stel van haalbare doelwitte en die opstel van 'n gebalanseerde skedule wat vir studies én persoonlike tyd voorsiening maak.
Die dissipline om tyd doeltreffend op hoërskool te bestuur, baan die weg vir sukses in die universiteitsomgewing.
Betrokkenheid en interaksie
Aktiewe betrokkenheid by studiemateriaal deur opsomming, vraagstelling en portuuronderrig verhoog begrip en geheue. Leerlinge moet aangemoedig word om betrokke te raak by interaktiewe en dinamiese studiepraktyke.
Samewerkende leer
Samewerking met eweknieë stel veelvuldige perspektiewe en probleemoplossingsbenaderings bekend, wat die opvoedkundige ervaring verryk.
Roetine-oorsig
Konsekwente, daaglikse hersiening en oefening versterk leer en voorkom die behoefte om die inligting op die laaste minuut in te probeer prop.
Die vestiging van die gewoonte om gereeld hersiening te doen, help met die langtermynbehoud van inligting - 'n praktyk wat van onskatbare waarde in universiteitstudies is.
"Die toepassing van doeltreffende studiegewoontes behels 'n verbintenis tot geleidelike verandering en buigsaamheid. Hoërskoolleerlinge kan begin deur spesifieke doelwitte vir elke studiesessie te stel of met verskeie leerstrategieë te eksperimenteer om te kyk wat die beste werk.
"Deurlopende selfrefleksie oor die doeltreffendheid van hierdie strategieë is van kritieke belang vir voortdurende verbetering," sê Meyer.
"Goeie studiegewoontes wat op hoërskool gevestig is, doen meer as om net studente voor te berei vir akademiese sukses op universiteit."
