Die Olimpiese marathonatleet Gerda Steyn, die wenner in vroueafdeling van vanjaar se Comrades-wedloop tussen Pietermaritzburg en Durban, sal op 27 Augustus aan die Run Your City-wedloop in Pretoria deelneem.
Dit sal haar eerste wedloop sedert haar Comrades-oorwinning wees.
Sy het in die Comrades Frith van der Merwe se af-rekord ná 34 jaar van 5:54:43 tot 5:44:54 verbeter.
Luidens 'n verklaring deur die organiseerders sê die 33-jarige Steyn, wat ook die Twee Oseane-kampioen is, sy sien uit daarna om in Pretoria deel te neem.
Die wedloop begin en eindig by die Uniegebou.
Steyn, die SA marathon-rekordhouer, sê sy besef dit sal nie 'n maklike roete wees nie, maar sy hoop om mededingend te wees.
