Die Ugandese atleet Jacob Kiplimo het Saterdag geskiedenis gemaak toe hy vir die derde keer agtereenvolgens die Wêreldlandloop-kampioenskap gewen het.
Hy het met ’n laat eindpoging in Tallahassee, Florida, die 10 km-wedloop in 28 minute 18 sekondes gewen om seker te maak dat die Ethiopiër Berihu Aregawi weer tweede eindig. Aregawi se tyd was 28:36. Die Keniaan Daniel Ebenyo het met 28:45 die bronsmedalje gewen.
Kiplimo het met sy jongste prestasie bewys hy is een van die beste langafstandatlete van sy generasie.
Die Suid-Afrikaner Adriaan Wildschutt het met 29:32 13de geëindig.
Sy vertoning, asook dié van Sanele Masondo (33ste), Musawenkosi Mnisi (42ste), Bennett Seloyi (50ste), Jayde Rosslee (59ste) en Chris Mhlanga (94ste), het gesorg dat Suid-Afrika negende eindig in die spankompetisie.
In die vrouewedloop het die Keniaan Agnes Ngetich van die wegspring tot die einde oorheers om in 31:28 met meer as 42 sekondes te wen.
Joy Cheptoyek van Uganda het met 32:10 drie sekondes voor Ethiopië se Senayet Getachew geëindig.
Suid-Afrika se Glenrose Xaba het met 34:51 34ste klaargemaak en die vrouespan het ook negende geëindig. Die vrouespan was Xaba, Kyla Jacobs (43ste), Cacisile Sosibo (45ste), Karabo Mailula (50ste), Cian Oldknow (55ste) en Zanele Maisa (67ste).
Ethiopië het die spantitel in die mans- en vroueafdeling gewen.
Australië het die gemengde aflos gewen, met Frankryk tweede en Ethiopië derde.
3878
