WP stoomroller voort; OP bly ook op wenpad

Die Westelike Provinsie het Woensdag sy lang segetog in o. 18-Cravenweek-wedstryde voortgesit toe hy met 35-24 oor die Haaie in die Outeniquapark-stadion in George geseëvier het.

Albei spanne het alles in die stryd gewerp, maar die WP se vermoë om sy kanse klinies te benut, het eindelik die deurslag gegee.

Die Streeptruie se JC Mars (heelagter) het nogmaals na vore getree as 'n speler om dop te hou, met sy vermoë om gapings in die verdediging oop te kloof, wat van hom 'n groot gevaarman maak.

Twee van sy breekslae het juis op drieë vir Haashim Pead (skrumskakel) en Jameel de Jongh (linkervleuel) uitgeloop.

Yaqeen Ahmed (losskakel) het met sy taktiese spel sy span op die voorvoet gehou, terwyl Xola Nyali (flank) voorlangs uitgetroon het. Ahmed het boonop 15 punte met sy skopstewel bygedra.

Vir die Haaie het Phiwo Kubheka (loskopstut) sy kant gebring, terwyl Vuyo Gwiji (flank) en Chris Horak (losskakel) ook met hul vertonings tevrede kan voel.

De WP se laaste nederlaag in dié toernooi was in 2017 - teen die Vrystaat - en hy spog nou met 11 oorwinnings op 'n streep.

• Die Oostelike Provinsie is self steeds onoorwonne in vanjaar se toernooi nadat hy in 'n opwindende kragmeting die Boland met 40-26 uitoorlê het.

Die wenspan se twee flanke, De Wet Fourie en Ballo Hlekani, het hul goeie spelpeil voortgesit, terwyl Aiden de Villiers (losskakel) ook tevrede kan voel met sy spel.

Die Boland sal egter voel dat die eindtelling nie 'n getroue weerspieëling van die wedstryd is nie. Sy senterpaar, Carick Kustoor en James Daniels, het elk twee drieë gedruk, maar dit was helaas nie genoeg nie.

• Die Vrystaat het ná sy verrassende nederlaag teen die OP op die eerste dag van die toernooi sy frustrasies op die Westelike Provinsie-vyftiental uitgehaal.

Die Vrystaters het 'n drastiese verbetering getoon en agt drieë ingeryg om die Streeptruie se B-span met 54-14 af te slag.

Die lostrio van Jean-Henri Smith, Keegan Scholtz en JJ Theron het veral inklimspel gelewer, terwyl Stefan Venter (haker) ook gewoel het.

Agterlangs was Ian van der Merwe (losskakel), wat sewe doelskoppe oorgeklits het, baie meer gemaklik in sy voorkeurposisie nadat hy die laaste vesting teen OP moes beman. Hy het die toutjies getrek en sy skopwerk vanuit die hand was dodelik akkuraat.

• Die Suidwestelike Distrikte (SWD) het in 'n doodsnik-drama met 22-19 oor die Valke geseëvier.

Die Valke het so byna die tuisspan se partytjie ook bederf nadat hy op die eerste dag teen die WP vasgeval het, maar swak dissipline deur die besoekers het SWD terug in die stryd gebring nadat hy met 5-19 agter was.

'n Rooi kaart en twee geel kaarte in die tweede helfte het die Valke duur te staan gekom en toe hy met net 40 sekondes oor op die horlosie sy eie lynstaan op sy doellyn verloor, was daar perde.

Kurt Coetzee (plaasvervanger-binnesenter) het daaruit munt geslaan en SWD van verdere rooi gesigte gespaar.