Sondagaand het die 78ste Bafta-toekenningsgeleentheid in Londen plaasgevind.
Ons weet nie of dit iets in die Engelse lug is nie, maar by die Britte se Oscar-aand het die modes op die rooitapyt nie teleurgestel nie.
Ja, daar was 'n paar uitrustings wat nie in die kol was nie, maar die oorhoofse indruk was stylvol en keurig.
Kyk net hier:
Zoe Saldanha se swart rok was klassiek en tydloos. Die ongewone kraag het haar rok interessant afgerond.
Selena Gomez het 'n Schiaparelli-skepping gedra. Die noupassende rok was 'n kombinasie van 'n effense halternek én skouerlose moue in swart fluweel.
Die wit Jacquemus-rok wat Pamela Anderson gedra het, was tydloos en het 'n treffende indruk geskep. Pamela lyk vars en klassiek.
Ariana Grande het stylvol in 'n Louis Vuitton-skepping gelyk. Die rok se bostuk was treffend in sy eenvoud en die gekartelde rok het die perfekte balans met volume en kleur geskep.
Die unieke motiewe op Demi Moore se halternekrok met 'n sleep het aandag getrek. Dit het soos gebrandgeskilderde glaspanele gelyk.
Timothée Chalamet het gemaklik in sy pak met 'n korter baadjie gelyk.
Saoirse Ronan se eenvoudige pepermentgroen aandrok met bypassende sjaal het haar gelaat prentjiemooi gekomplementeer.
Kyk net hoe netjies lyk die Britse akteur Leo Woodall in 'n swart aandpak.
Ons is gaande oor die geliefde Britse aktrise Celia Imrie se vierkantige halslyn en pofmoue. Sy lyk modern, maar tydloos.
