Hou jou asem vars

Bekommernis dat jou asem dalk onaangenaam ruik, is iets waarmee die meeste mense hulle kan vereenselwig, veral voor belangrike gebeurtenisse soos 'n afspraak of 'n belangrike vergadering.

Februarie is nasionale vars-asem-maand, 'n ideale tyd om "vars" insigte oor hierdie onderwerp te kry.

Wat veroorsaak slegte asem?

Die Suid-Afrikaanse Tandheelkundige Vereniging (Sada) en die Mondhigiëniste-vereniging van Suid-Afrika stem saam met die navorsing - mondprobleme is die primêre sondaar wanneer dit kom by slegte asem, oftewel halitose. Ander algemene oorsake sluit in skerp kos en drankies (soos knoffel), rook van tabak en verskeie mediese toestande, insluitend sinusontsteking, respiratoriese siektes en gastro-intestinale probleme.

Navorsing gepubliseer in die Journal of Clinical Oral Investigation het mikrobiese wanbalanse in die mond en ingewande as 'n ander oorsaak geïdentifiseer. Daar is getoon dat probiotika korttermynverligting bied. Nog 'n onlangse ontdekking is dat 'n genetiese mutasie die skuld kan wees vir aanhoudende "gekookte kool"-asem.

Die droë mond-verband

Daar is 'n sterk verband met droogheid, want die bakterieë wat slegte asem veroorsaak, floreer in 'n droë omgewing. Dit is hoekom jy dalk 'n skerp, onaangename oggend-asem ervaar en dit is "normaal".

"Die liggaam produseer amper geen speeksel terwyl jy slaap nie," verduidelik Dirna Grobbelaar, Ivohealth se raadgewer oor mondhi­giëne. "Speeksel is die natuur se manier om die mond uit te spoel. Wanneer daar minder speeksel is, smul die bakterieë aan dooie selle wat in die proses onwelriekende verbindings vrystel."

Dit word vererger deur deur die mond asem te haal, wat die mond nog droër maak. As drinkwater nie 'n dors-sensasie verlig nie, kan jy 'n chroniese toestand hê wat "droë mond" genoem word, in mediese terme bekend as xerostomia. Droë mond is 'n algemene newe-effek van meer as 400 medikasies. Dit is ook gekoppel aan hormonale veranderinge (soos menopouse) en outo-immuun toestande, insluitend diabetes en Sjogren se sindroom. Dit kan verlig word deur 'n speekselvervanger te gebruik.

Vars asem-oplossings

In teenstelling met die algemene opvatting, is suig van pepermente nie 'n blywende oplossing vir halitose nie. 'n Doeltreffende daaglikse mondsorg-roetine sal baie meer impak hê. Dit behels om korrek te borsel, vir ten minste twee minute twee keer per dag, asook daaglikse interdentale skoonmaak.

Bakterieë hou daarvan om weg te kruip waar jou tandeborsel nie kan bykom nie, so gebruik vlos of 'n ander interdentale hulpmiddel om plaak te verwyder. Grobbelaar beveel aan dat jy die maklikste manier moet vind om tussen jou tande skoon te maak.

Nog 'n wegkruipplek vir bakterieë is die agterkant van die tong. Skraap dit daagliks liggies. Spoel jou mond met 'n alkoholvrye mondspoelmiddel as 'n goeie laaste stap.

Grobbelaar beveel aan om 'n afspraak by jou tandarts of mond­higiënis te maak as jou asem vir langer as twee weke sleg ruik.