Malusi Gigaba, minister van finansies, het Saterdagoggend die verrigtinge by die ANC se nasionale konferensie afgeskop as gasheer by 'n ontbytgeleentheid van die ANC se Progressiewe Sakeforum by Nasrec in Johannesburg.
Die vyfdagkonferensie word later vanoggend amptelik deur pres. Jacob Zuma geopen, wanneer hy die sowat 5 000 afgevaardigdes gaan toespreek.
Die hoogtepunt van die konferensie is egter Sondag, wanneer die regerende party se nuwe leierskap aangekondig word.
Die benoemingsproses vir die topses ampte begin egter reeds vandag. Daar is omstreeks 12:00 'n geslote sessie, waarna die benoemingsproses, waaroor die onafhanklike verkiesingskommissie 'n oog gaan hou, begin.
Daarna volg nog 'n geslote sessie.
