Die Proteas het Dinsdag ’n draai in Bloemfontein gemaak met die septer wat hulle in die Wêreld-toetskampioenskap verower het, en die Rosestad het hulle met ope arms verwelkom.
Van die oomblik dat hul toerbus die stad met blêrende luidsprekers ingery het, was daar ’n byna tasbare gevoel van opwinding terwyl mense die span langs die strate toegejuig het.
Netwerk24 was saam in die bus en kan getuig: Bloemfontein het opgetrek vir sy kriekethelde.
By die Tsoseletso High School het honderde jong leerlinge tougestaan om saam met die Proteas te kolf of boul.
“Die ontvangs hier was die beste wat ek nog in my lewe ervaar het,” het die veelsydige Corbin Bosch aan Netwerk24 gesê. “Dit is veral spesiaal om te sien hoe hartlik mense ons vier maande ná ons oorwinning steeds ontvang.”
Vir die snelbouler Lungi Ngidi was die besoek ’n emosionele herinnering aan sy eie kinderdae.
“Toe ek ’n seuntjie was, kon ek my helde gereeld op Kingsmead sien speel – dit het my geïnspireer om te word wie ek vandag is. Ek hoop ons besoek vandag kan vir die leerlinge dieselfde vonk gee.”
Een van daardie jong dromers is Busisiwe Itumele (10), wat met blink oë vertel het dat dit haar droom is om eendag die Protea-vrouespan te verteenwoordig. “Ek het dit so geniet om saam met hulle te speel – ek gaan nou harder oefen!”
Aiden Markram, die held van die Proteas in die eindstryd teen Australië op Lords in Engeland met sy honderdtal in die tweede beurt, het teen die kinders gekolf en geboul – iets wat die kleintjies ontsettend geniet het.
Xander Snyders, president van die Vrystaatse Krieketunie, het in sy verwelkomingstoespraak gesê dit is ’n ongelooflike voorreg om die nasionale span in Bloemfontein te hê.
“Dit is oorweldigend om ons helde vandag hier te hê. Krieket is almal se sport, en deur hier by ’n skool te wees, wys julle dit.”
Die Proteas is laatmiddag na die King Shaka-lughawe in Durban en Woensdag wag ’n busparade van Umhlanga na Kingsmead, gevolg deur ’n braaidag saam met ondersteuners.
