’n Man van Seawinds by Tafelsig is op heterdaad deur lede van Operasie Floreer (Operation Prosper) betrap met ’n plastieksakkie met vermoedelik heroïen-naalde in.
Die lede van die geïntegreerde mag wat aan Operasie Floreer deelneem, was op pad na twee huise in Cathedralsingel in Seawinds wat vermoedelik aan lede van die Fancy Boys-bende behoort, toe die man in ’n stop-en-deursoekingsoperasie vasgetrek is. ’n Bedrag kontant is ook by hom gevind. Die man is in hegtenis geneem en sal in die hof verskyn sodra hy aangekla is.
Sowat 90 weermaglede is saam met die polisie en wetstoepassingsbeamptes in Mitchells Plain ontplooi as deel van Operasie Floreer om die polisie te help om veral bendegeweld en verwante aktiwiteite op die Kaapse Vlakte te bekamp.
Eienaars van die wonings is ‘afgetip’
‘n Jong vrou van Seawinds by Tafelsig in Mitchells Plain het Woensdag vir die polisie by die huis van ’n vermeende leiersfiguur in die Fancy Boys-bende gesê die R3 100 wat in haar besit gevind is, is haar inkomste uit haar minibustaxi-onderneming. Die geld is aan haar lyf gevind.
Die vrou het nadat sy gevra is vir bewyse vir die taxi-onderneming gesê dit is nie op haar naam geregistreer nie. Soldate wat deel is van die ontplooiing het die toegangsroetes na Cathedralstraat afgesper. Inwoners wat gevra het om nie genoem te word nie, het gesê die eienaars van die wonings is “afgetip” dat die weermag in die omgewing is.
* Volg Netwerk24 vir meer oor die storie.
