'n Bobbejaanmannetjie het sosiale media aan die gons nadat inwoners van Northcliff in Johannesburg dié kees in hul strate gewaar het.
Cora Bailey, eienaar van die plaaslike dierebeskermingsorganisasie CLAW, oftewel Community-Led Animal Welfare, sê sy en haar span volg die bobbejaan nou al geruime tyd en hoop om hom so gou moontlik te vang en na 'n veiliger tuiste te verskuif.
Hy is vir die eerste keer in die Magaliesberg-omgewing naby die Wieg van die Mensdom gewaar en sedertdien het hy sy weg tot in die Johannesburgse voorstede gevind.
"Dit is nie 'n vreemde verskynsel nie," sê Bailey.
"Bobbejaanmannetjies verlaat dikwels hul trop wanneer hulle 'n sekere stadium van volwassenheid bereik en dan is hulle op hulself aangewese totdat hulle moontlik by 'n volgende trop kan aansluit."
Dit is moontlik wat met dié mannetjie gebeur het.
Bailey en haar span doen 'n beroep op die plaaslike gemeenskap om hulle te help om die bobbejaanmannetjie se bewegings te monitor.
"CLAW het twee WhatsApp-groepe waarop ons foto's en video's van die bobbejaan deel en hom volg. Ons vra inwoners van Northcliff en omliggende gebiede om by hierdie groepe aan te sluit en ons te help om die bobbejaan op te spoor."
Bailey sê hoewel mense op hul hoede moet wees en seker maak dat hulle en hul troeteldiere veilig is, moet hulle ook besef dat die bobbejaan "manalleen" is en tien teen een banger is vir die wêreld waarin hy hom tans bevind as wat 'n mens dalk besef.
CLAW spits hom toe op die welstand van diere in minder gegoede woonbuurte.
"Deur ons werk het ons deur die jare goed bevriend geraak met die plaaslike Dierebeskermingsvereniging en Johannesburg Wildlife. As ons die bobbejaan gevang kan kry, kan ons hom veilig oorhandig aan Johannesburg Wildlife wat sal sorg dat hy veilig verskuif word."
