Nampo Kaap was die ideale plek waar produsente en kenners kon byeenkom om oplossings te ontdek wat regtig ’n verskil maak op die plaas.
Volgens die bedryfsliggaam Vinpro gee hul deelname aan hierdie ekspo aan produsente die geleentheid om eerstehands te beleef hoe hulle praktiese kennis en kundigheid in aksie omskep.
“Die waarde van ’n netwerk soos Vinpro lê daarin dat ons nie net inligting deel nie, maar aktief saam met produsente werk om oplossings vir vandag én môre te vind – of dit nou oor energie, water, meganisasie of wingerdbestuur gaan,” verklap Vinpro.
By Nampo Kaap het Vinpro vir produsente gewys hoe die dienste wat hulle aan lede bied, prakties toegepas word en watter verskil dit vir produsente maak. Hulle het gewys hoe hul tegniese kundigheid, netwerkgeleenthede en praktiese oplossings saambring om produsente se sukses te ondersteun.
Hulle het ook tydens die ekspo aan produsente die geleentheid gebied om gratis by Vinpro aan te sluit sodat hulle kan inskakel by ’n netwerk wat hul boerdery vorentoe kan neem.
As ’n organisasie sonder winsbejag verteenwoordig Vinpro byna 1 800 wyndruifprodusente regoor Suid-Afrika. Hulle werk saam met bedryfsorganisasies en strategiese vennote om seker te maak dat die stem van wyndruifprodusente sterk gehoor word, veral in kritieke beleids- en tegniese kwessies wat produsente direk raak.
Die voordele vir lede
Deur ’n lid van Vinpro te wees, verkry produsente onder meer toegang tot gespesialiseerde dienste en kennis wat hul boerdery vorentoe dryf. Dit sluit die volgende in:
- Wingerdboukunde en grondkunde: Deskundige raad oor wingerduitleg, bestuur en bemesting vir optimale produksie;
- Landbou-ekonomie: Lewensvatbaarheidstudies, gelykbreek-analises en produksieplanne om beter besluite te neem;
- Produksiebeplanning: Deelname aan die Vinpro Produksieplan-studiegroep wat produsente help om koste en opbrengste te vergelyk en strategies te bestuur;
- Wingerdplantmateriaal: Toegang tot topgehalte plantmateriaal deur Vititec, wat die grondslag lê vir volhoubare wingerde;
- WineMS-sagteware: ’n Volledige wingerd-tot-glas-bestuurstelsel beskikbaar teen spesiale lidkoerse; en
- Bedryfsnetwerke: Toegang tot produsentedae, streeksinligtingsdae, jongprodusentefokusgroepe en aanlyn tegniese opleiding.
Lede wat deel vorm van hul netwerk ontvang ook eksklusiewe publikasies en insigte – soos die Vinpro Tegniese Snapshot, maandelikse nuusbriewe en ’n gratis intekening op die WineLand-tydskrif.
Nuwe lede kry dadelik toegang tot ’n gemeenskap wat jou nie net ingelig hou nie, maar ook saam met jou werk aan die toekoms van die Suid-Afrikaanse wynbedryf.
Sodoende word jy ook deel van ’n verenigde stem wat beleid beïnvloed, praktiese oplossings dryf en produsente ondersteun om volhoubaar te groei.
Lidmaatskap van Vinpro bied die volgende:
- Praktiese, kostebesparende dienste wat direk op die plaas ’n verskil maak;
- Eksklusiewe tegniese kennis deur kundiges wat die bedryf van binne ken;
- Netwerke en geleenthede by sleutelbedryfsbyeenkomste soos Nampo Kaap; en
- n Sterker stem in die rigting en beleid wat die wynbedryf vorm.
“Sukses in die wynbedryf gaan nie net oor individuele prestasie nie. Dit gaan oor samewerking, die deel van kennis en die bou van ’n volhoubare toekoms vir almal. Nampo Kaap gee produsente ’n voorsmakie van die oplossings wat vandag reeds beskikbaar is, en die moontlikhede wat die toekoms inhou. Die ware waarde lê egter daarin om hierdie gesprekke en insigte deur die jaar saam met Vinpro voort te sit. As lid word jy nie net deel van ’n netwerk nie, jy help om die rigting van die bedryf te bepaal.”
Vinpro nooi produsente om vandag nog gratis by hulle aan te sluit en deel te word van ’n organisasie wat produsente se belange vooropstel en saam te bou aan ’n sterker, volhoubare wynbedryf.
