Die drukkeryfirma Novus Media het die tydskrif Rooi Rose by Habari Media gekoop.
Dié Afrikaanse vrouetydskrif, tans in sy 83ste jaargang, het in Mei 2020 byna gesneuwel toe die destydse eienaar, Caxton, sy hele tydskrifafdeling gesluit het.
Rooi Rose en ander Caxton-tydskrifte soos Garden and Home en Woman and Home, is deur Habari oorgekoop. Habari gee ook onder meer Getaway, Cape Town etc, Bona, Carmag en verskeie ander tydskrifte uit, asook bedryfspublikasies.
Luidens 'n verklaring deur Novus sal Rooi Rose voortgaan om onder die redakteurskap van Anlie Janse van Rensburg inhoud te lewer wat voldoen aan sy slagspreuk, "Stylvol, sinvol, propvol".
Novus Media het verlede jaar Soccer Laduma en KickOff van Media24 oorgekoop tesame met al Media24 se gemeentskapskoerante.
Rooi Rose se maandelikse sirkulasie is tans 24 729.
Novus gee ook Free4All, 'n skoolkoerant met 'n omset van 1,1 miljoen, uit.
