Die laaste deel van gr. 12 bring ’n oorvloed van emosies, maar met die regte ingesteldheid en hulpmiddels kan leerlinge se eksamen-angs omskep in selfversekerde prestasie.
Met die aftel na die matriekeksamen sukkel baie leerlinge om te konsentreer en hul emosies te beheer, want dit is meer as net die hoogtepunt van 12 jaar se skoolwerk – dit is die eerste stap na ’n toekoms waarvoor jy so hard gewerk het.
Een ding wat matrieks moet onthou, is dat die sleutel tot sukses nie net lê in dit wat jy studeer nie, maar hoe jy jouself deur die proses bestuur.
Die span van die Suid-Afrikaanse Kollege vir Toegepaste Sielkunde (Sacap) deel in ’n persverklaring meer oor hoe jy die eksamentydperk kan aanpak.
“Prestasie en ingesteldheid gaan hand aan hand,” verduidelik JP Moller, ’n opvoedkundige sielkundige en opvoeder by Sacap. “Soos jy voorberei vir jou matriekeksamens, gaan jou gemoedstoestand net so belangrik wees soos die aksies wat jy neem.”
Deur hierdie perspektief te volg, verskuif leerlinge se fokus van suiwer akademiese voorbereiding na ’n meer holistiese benadering.
“Matriek kan voel asof jy ’n berg trotseer – daar is hope druk, aantekeninge, inhoud, sperdatums en onsekerhede oor hoe jy gaan presteer op die dag,” sê Moller.
“Maar daar is maniere om beheer te neem. Ons klim immers ’n berg een tree op ’n slag. Wat jy nodig het, is kragtige hulpmiddels, wetenskaplik-gesteunde strategieë en wenke om jou te help om jou studietyd en jou geestelike welstand te bestuur terwyl jy gefokus op jou doelwitte bly.”
Moderne studietegnieke vir die digitale geslag
In vandag se tyd het matriekleerlinge toegang tot studiemetodes waarvan vorige geslagte net kon droom.
Sacap bied volgende naweek ’n gratis webinaar aan waartydens hulle wenke en truuks vir studeer met matrieks sal deel.
Adam Willemse, ’n opvoeder by Sacap en voormalige hoërskoolonderwyser, gaan vir matrieks wys hoe om hul hersiening te skeduleer en prioritiseer.
“Ons gaan slim maniere ondersoek om jouself en jou studie te organiseer wat nie net vertroue versterk nie, maar jou ’n werklike fondament vir sukses gee,” sê Willemse.
“Wat my ook interesseer, is die metodes wat so goed werk vir Generasie Z, en ons gaan praat oor hoe om jou eie kennis-smaakmaker te word as jy studeer.
“Dit maak sin om reels, TEDx-praatjie en podsendings te gebruik om jouself te leer, maar dit vervang nie goeie ou ‘boude-in-stoel’ studeer nie. Tog hoef studeer nie vervelig te wees nie. Jy kan boeiende opsommings skep wat jou help om die werk te onthou,” sê hy.
Die ontwikkeling van jou innerlike afrigter
Die heel sterkste hulpmiddel in jou arsenaal is om te leer om jouself deur die uitdagings vorentoe af te rig – net soos atlete staatmaak op afrigters om hulle gefokus en gemotiveerd te hou, kan jy hierdie interne leidingsisteem ontwikkel.
“Om ’n afrigter-ingesteldheid aan te neem terwyl jy deur eksamenseisoen navigeer, is ’n effektiewe hulpmiddel om jou gemoedstoestand met jou gewenste prestasie te integreer,” sê Willemse. “Dit beteken om te fokus op die oorwinnings, selfs dié wat klein is, en vinnig van enige verliese te vergeet sodat jy op koers kan bly.”
Hierdie afrigter-ingesteldheid kan leerlinge transformeer om ’n verhouding met sowel sukses as mislukking te hê. In plaas van om te tob oor foute, leer jy om hulle as geleenthede te sien om jou strategieë te verfyn.
“Wanneer jy jouself afrig, kan jy stres as ’n onderwyser en motiveerder gebruik in plaas van om oorweldig te word,” sê Willemse. “ ’n Afrigter-ingesteldheid bemagtig jou om die uitdagings wat na jou gegooi word, te gebruik om jou ryk te bou, nie om jou af te breek nie.”
Die holistiese benadering tot eksamenvoorbereiding
Self-afrigting lei natuurlik tot ’n meer omvattende siening van eksamenvoorbereiding. Terwyl studieplanne en tydsbestuur belangrik is, speel jou algehele welstand ’n ewe belangrike rol in jou prestasie.
Volgens Sacap vereis piek-prestasie die volgende:
) Voeding: Voed jou brein met gesonde, gebalanseerde maaltye.
) Hidrasie: Handhaaf optimale kognitiewe funksie deur behoorlike waterinname.
) Fisieke aktiwiteit: Gebruik oefening om stres te bestuur en jou helderheid te versterk.
) Slaap: Verseker voldoende rus om jou geheue te verskerp.
) Geestelike gesondheid: Implementeer oefeninge om meer oplettend te wees en leer tegnieke om jou stres minder te maak.
) Balans: Maak tyd vir aktiwiteite wat vir jou vreugde en ontspanning bied.
Jy moet gereelde blaaskanse neem – dit is nie ’n luuksheid nie, dit is noodsaaklik vir die handhawing van fokus en om uitbranding te voorkom.
Behou jou perspektief
Soos die eksamendruk toeneem, is dit belangrik om perspektief te handhaaf oor hierdie belangrike maar tydelike fase van jou lewe.
“Die belangrike ding om te onthou is dat jy by hierdie oomblik in jou lewe aangekom het omdat jy gereed is vir hierdie uitdaging. Jou hele lewe vorentoe hang nie af van elke oomblik of van elke eksamen nie.
“Jy is nie alleen hierin nie, en as jy voel jy het hulp nodig om dit te hanteer, is dit belangrik om uit te reik na ’n vertroude volwassene of vriend. Dikwels vat dit net regtig eenvoudige ondersteuning om jou terug op die pad te kry om jou beste te doen,” sê Moller.
