Sê maar van die Britte wat jy wil, maar as jy 'n skouspel wil sien, laat dit aan hulle oor om dit te organiseer.
Dit was Donderdagaand weer duidelik toe die 22ste Statebondspele sedert 1930 voor 30 000 toeskouers in die Alexander-stadion in Birmingham, Engeland, amptelik geopen is.
Net soos die opening van die Olimpiese Spele tien jaar gelede in Londen, was dié openingseremonie in Birmingham in ideale Engelse somerweer skouspelagtig, dramaties en kleurryk.
Die 73-jarige prins Charles het sy 96-jarige ma, koningin Elizabeth II, hoof van die Statebondspele, verteenwoordig. Hy het namens haar 'n boodskap voorgelees.
Die prins, wat die Spele daarna oop verklaar het, het met sy aankoms by die stadion self sy Aston Martin-motor bestuur. Langs hom was sy vrou, Camilla.
Dit was dieselfde motor waarmee sy seun prins William en dié se vrou, Catherine, die hertogin van Cambridge, ná hul troue in 2011 by Buckingham-paleis in Londen weg is onderweg na hul wittebrood.
Nadat "God save the Queen" gesing is, het die Red Arrows van die Britse lugmag - in wie se stigting Suid-Afrika se genl. Jan Smuts destyds 'n sleutelrol gespeel het - oor die stadion gevlieg.
Die supergroep Duran Duran, wat sy oorsprong 44 jaar gelede in Birmingham gehad en veral in die 1980's baie gewild was, het ná die opening die musiek verskaf.
Die legendariese kitaarspeler Tony Iommi van Black Sabbath het ook opgetree.
Malala Yousafzai, die Nobelpryswenner vir vrede wat in 2012 op 15-jarige ouderdom deur die Taliban in Pakistan in die kop geskiet is, het 'n groot toejuiging ontvang toe sy 'n kort toespraak gelewer het. Sy het destyds in Birmingham mediese behandeling ontvang en het ook daar gestudeer.
Bongi Msomi, kaptein van die Protea-netbalspan, en die Paralimpiese swemmer Christian Sadie was die vlagdraers van die Suid-Afrikaanse span.
Die keuse van die span se kleredrag sal seker nie almal se goedkeuring wegdra nie, maar die glimlagte op die gesigte van die Suid-Afrikaners was groot.
Die Statebondspele is immers nie verniet bekend as die "Vriendelike Spele" nie soos prins Charles namens die koningin in die verwelkomingsboodskap gesê het.
Soos die ander spanne het die Suid-Afrikaners selfies van mekaar geneem en die atmosfeer ingeasem.
Lwandile Simelane, chef de mission (hoofspanbestuurder) van die Suid-Afrikaanse span, het uit die stadion laat weet: "Die atmosfeer is ongelooflik. Ons is almal vanaand trotse Suid-Afrikaners en dié skouspel (die openingseremonie) is moontlik 'n teken dat 'n baie suksesvolle Statebondspele voorlê."
Suid-Afrika het met die vorige Spele vier jaar gelede aan Australië se Goudkus 37 medaljes verower. Hiervan was 18 goud, 11 silwer en 13 brons.
Durban was aanvanklik aangewys om dié Spele aan te bied, maar finansiële probleme het veroorsaak dat die Statebondspele-komitee die Spele aan Birmingham toegeken het.
Uiteraard het die Engelse span die grootste toejuiging ontvang toe hy die stadion binnegestap het. Queen se "We Will Rock You" het gespeel.
Birmingham maak sy hart oop
Birmingham, 'n stad wat bekend is om sy multikulturele gemeenskap en sy baie kanale, het sy hart vir die meer as 5000 deelnemers uit 72 lande - waarvan die meeste eertydse Britse kolonies was - oopgemaak.
Dié geskiedkundige stad het ook 'n sleutelrol gespeel in eertydse industriële revolusie. Dit is duidelik in die openingseremonie uitgebeeld.
Birmingham is ook die tuiste van Aston Martin, Jaguar en Land Rover.
Sowat 40 000 vrywilligers doen by die Spele diens.
Daar sal in 26 sportsoorte deelgeneem word, Daar is ook verskeie medaljes vir Paralimpiese atlete op die spel.
Ná die Spele sal die kapasiteit van die Alexander-stadion tot 18 000 verklein word.
Die aksie begin Vrydag en die Spele duur tot 7 Augustus.
