Dit is van deurslaggewende belang dat die regering spoedig optree om die oorblywende prosesse te voltooi om van die internasionale gryslys te kom van lande wat nie genoeg doen om geldwassery en terreurfinansiering te bekamp nie, meen Cosatu.
Die vakverbond het so gesê toe hy die regering geloof het vir sy vordering om aan die Verenigde Nasies se Finansiële Aksietaakmag (FATF) se gryslys-vereistes te voldoen.
Die nasionale tesourie het Vrydagaand gesê die FATF het aangekondig dat Suid-Afrika wesenlik al 22 aksiepunte voltooi het in die aksieplan wat aangeneem is toe die land in Februarie 2023 op die internasionale gryslys geplaas is.
"Die besluit, wat tydens die FATF-vergadering in Straatsburg, Frankryk, geneem is, wys daarop dat Suid-Afrika se vordering 'n assessering ter plaatse regverdig om te verifieer dat kritieke hervormings (teen geldwassery en om terreurfinansiering te bekamp) geïmplementeer is, en dat die nodige politieke verbintenis steeds gehandhaaf word om met vordering vol te hou," het die tesourie in sy verklaring gesê.
Dit prys ook die Valke, Staatsveiligheidsagentskap en die Nasionale Vervolgingsgesag (NVG) vir die volgehoue toename in ondersoeke en vervolgings van ernstige en komplekse geldwassery- en terreurfinansieringsaktiwiteite.
Die tesourie bring ook hulde aan wyle adv. Rodney de Kock van die NVG, "wat 'n leidende rol gespeel het in die voorbereiding van die grondslag vir Suid-Afrika om die aksiepunte te voltooi". De Kock is in Januarie oorlede.
Dit alles het dit volgens die tesourie moontlik gemaak vir Suid-Afrika om die verbeteringe van die laaste twee oorblywende aksiepunte in die huidige verslagsdoeningsiklus te verseker.
Volgens die tesourie is dit broodnodig vir Suid-Afrika om sy werkwyse te verbeter om geldwassery en die finansiering van terrorisme te bekamp, gegewe die nalatenskap van staatskaping wat wetstoepassingsagentskappe doelbewus verswak het.
'Beduidende stap vorentoe'
"Verbeteringe in hierdie domeine is van kritieke belang, nie net om van die gryslys af te kom nie, maar ook om die stryd teen misdaad en korrupsie te verskerp en by te dra tot die integriteit van die Suid-Afrikaanse finansiële stelsel.
"Om die FATF-gryslys te verlaat is 'n beduidende stap vorentoe namate Suid-Afrika voortgaan om sy toesig- en strafregstelsels te verbeter en te versterk.
"Die voltooiing van die aksieplan baan die weg vir die laaste stap voordat die FATF Suid-Afrika van die lys kan verwyder, wat 'n besoek ter plaatse aan Suid-Afrika deur die FATF se Afrika- gesamentlike groep (AGG) behels," lui die tesourie se verklaring.
Die AGG se besoek ter plaatse sal plaasvind voor die FATF se volgende volle vergadering in Oktober.
Matthew Parks, Cosatu se parlementêre koördineerder, sê verder dit is belangrik dat Suid-Afrika daadwerklik optree om aan die FATF-vereistes te voldoen.
"Dit vereis dat verseker word dat relevante staatsinstellings soos die Suid-Afrikaanse Inkomstediens, die NVG, die Spesiale Ondersoekeenheid, die regbank en die polisie die hulpbronne het, insluitend geskoolde personeel, om korrupsie, belastingontduiking, geldwassery en terreurfinansiering te kan takel.
"Onlangse hofsake in hierdie verband bied positiewe hoop vir regeringspogings om sulke misdade te takel.
"Die verwydering van Suid-Afrika van die gryslys sal kollektiewe pogings 'n hupstoot gee om die beleggings te lok wat broodnodige ekonomiese groei stimuleer, sleutelsektore ontsluit en werk skep, aangesien baie pensioen- en beleggingsfondse deur hul reëls verbied word om in lande op die gryslys te belê," sê Parks.
