Die Suid-Afrikaanse eiendomsmark toon bemoedigende tekens van herstel met eiendom wat volgens die 2024 Suid-Afrikaanse Belegger- en Bankverslag as die tweede gewildste bateklas in die land na vore tree. En die Wes-Kaap is die episentrum van hierdie belowende tendens.
"Dit is 'n beduidende ontwikkeling, aangesien dit groeiende vertroue in die stabiliteit en langtermyn-opbrengste wat eiendom bied, weerspieël," sê Claude McKirby, mede-hoof van Lew Geffen Sotheby's International Realty in Kaapstad se suidelike voorstede en Valsbaai, en voeg by dat die groeiende belangstelling in eiendomsbelegging ook dui op 'n breër eiendomsverskuiwing in hoe Suid-Afrikaners eiendom beskou.
Data van ooba onthul dat die nasionale vraag na beleggings- of koop-om-te-huur-eiendomme 13,9% van die totale aansoeke nasionaal in K4 2024 bereik het, vanaf 11,8% in K4 2023. Die Wes-Kaap se bydrae tot hierdie tendens is onmiskenbaar, met die streek wat verantwoordelik is vir 'n beduidende deel van beleggingseiendomstransaksies.
Die provinsie het na vore getree as 'n brandpunt vir beleggingskopers, met 34% van alle verbandaansoeke wat in die laaste kwartaal van 2024 deur ooba in die streek ontvang is vir beleggingseiendomme. Dís 'n noemenswaardige styging in vergeleke met 29% vir dieselfde tydperk die vorige jaar. Die Oos-Kaap het ook sterk groei in beleggingsvraag gedurende die laaste kwartaal van verlede jaar geregistreer, wat van 14% van alle aansoeke in K3 '24 tot 18% in K4 '24 gestyg het. "Hierdie verskuiwing word aangedryf deur die dubbele aantrekkingskrag van eiendom as beide 'n hoë-opbrengs-belegging en 'n betroubare beskerming teen finansiële verliese en verder aangevuur deur 'n sterk vraag na huureiendomme in die meeste gebiede," merk McKirby op.
Volgens Rhys Dyer, uitvoerende hoof van ooba Home Loans, koop 10% van eerstekeerkopers nou eiendom vir beleggingsdoeleindes wat 'n skrille kontras is met die 4% wat in 2014 aangeteken is.
McKirby glo dat die Wes-Kaap se oorheersing in die beleggingskopersmark 'n bewys is van beide die streek se blywende aantrekkingskrag en die groeiende erkenning van eiendom as 'n betroubare bateklas.
