In 'n interessante verwikkeling gaan die Radisson Granger Bay-hotel net langs die Waterfront in Kaapstad sy restaurant en konferensiegeriewe op die ope mark verkoop om meer waarde uit dié geriewe te ontgin.
Volgens John Jack, hoof van die Galetti-handelseiendomsgroep wat die transaksie gaan hanteer, bied die hotel uitstekende konferensiegeriewe in die hartjie van die stad, maar word dit tans nie optimaal benut nie.
"Daar is 'n groot behoefte aan groot konferensiegeriewe wat 'n eenstop-diens aan huurders lewer," sê hy. "Veral noudat die metro ook al meer doen om Kaapstad te bemark as dié plek in die land om in sake te doen. Die Kiks is 'n wonderlike gerief om te hê, maar hy kan bloot net nie meer in al die behoeftes voorsien nie."
Die Radisson-hotel het moderne konferensiegeriewe wat 300 persone kan akkommodeer, wat beslis in dié behoefte kan voorsien.
Die hotel is sentraal geleë in een van die Atlantiese kusstrook se gesogste areas, net langs die Waterfront. Dit bied pragtige uitsigte en die hotel is smaakvol, modern en luuks uitgerus.
Volgens Jack kan 'n private eienaar wat spesialiseer in die restaurantwese en die aanbied van konferensie-geleenthede, groot potensiaal ontsluit in hierdie geriewe. "Danksy die aanliggende hotel het dit alreeds sy eie betrokke gehoor," sê hy.
Hy verwys na die Proud Mary-restaurant in Johannesburg se Rosebank-omgewing, wat as 'n suksesverhaal met 'n soortgelyke agtergrond beskou kan word.
"Die Proud Mary is tans uiters gewild as 'n restaurant. Dit is op die grondvloer geleë van die Voco-hotel in Rosebank, en sedert die restaurant sy eie eienaars, onafhanklik van die hotel, gekry het, floreer dit behoorlik. Ek glo dieselfde waarde kan met die Radisson Granger Bay-hotel se restaurant ontsluit word as spesialiste dit oorneem."
Dieselfde geld die konferensiegeriewe. "Ons glo dat as 'n spesialis in die gasvryheidsbedryf beheer van die konferensiegeriewe oorneem, hy die gerief na sy volle potensiaal sal kan benut. Die afgelope somer het Kaapstad een van sy besigste toeristeseisoene nog gehad, maar die gerief is nie optimaal benut nie.
"Die konferensiegeriewe is modern, dit kan 300 mense akkommodeer, en die personeel is ervare en kundig. Jy het reeds alles waarna jy soek hier. Dit moet net deur ervare, kundige mense bestuur word wat 'n allesomvattende, eenstop-diens kan aanbied."
Die Radisson-hotel is deel van die Tsogo Sun-hotelgroep, wat op die Johannesburgse aandelebeurs genoteer is. Die hotel is deel van die Radisson-groep se rooi hotelle, wat deel van sy luukser portefeulje uitmaak.
