Die afslaer Park Village Auctions (PVA) kondig aan dat vier veilings, "na behore gelas deur die kurator bonis", gehou sal word van die bates uit die boedel van die gevonnisde bedrieër Hildegard Steenkamp.
Steenkamp was in Desember 2023 in die nuus toe die Johannesburgse kommersiële hof haar aan bedrog van meer as R530 miljoen skuldig bevind het en sy tot 50 jaar tronkstraf gevonnis is.
Op 8 Februarie vanjaar het die Nasionale Vervolgingsgesag (NVG) bevestig dat, soos berig, die staat bates uit Steenkamp se boedel sal opveil, en PVA se advertensie lui "NDOV v. Hildegard Antoinette Steenkamp & Ander, saaknommer: 2017/47936".
Vier residensiële eiendomme sal in Boksburg opgeveil word, elkeen saam met 'n verskeidenheid van meubels.
Die veilings begin Dinsdag 14 Mei om 11:00 met die verkoop van Killianlaan 21, Cinderella (webverwysing 1475).
Die dubbelverdiepinghuis spog met drie slaapkamers, drie badkamers, 'n dubbelmotorhuis en 'n tweeslaapkamerwoonstel en beslaan 'n grootte van 993 m².
Direk daarna kom Killianlaan 23, Cinderella (webverwysing 1499) onder die hamer.
Hierdie eiendom van 997 m² het 'n drieslaapkamerhuis met 'n swembad en buitegeboue wat voorheen as kantore gebruik is.
Volgende aan die beurt is Cilliersstraat 9, Cinderella (webverwysing 1500) op 'n erf van 1 035 m² met 'n dubbelverdieping-drieslaapkamerhuis en 'n vrystaande eenslaapkamerwoonstel, dubbelverdieping-buitegebou bestaande uit twee en-suite-gasteslaapkamers en 'n dubbel-tandemmotorhuis met parkering vir minstens vyf voertuie.
Daarna word die laaste eiendom opgeveil by Yellowwood Estate 7, Smutslaan 35, Libradene (webverwysing 1503).
Hierdie residensiële erf van 916 m² bied 'n luukse dubbelverdieping-woning met drie en suite-slaapkamers, baie leefruimte binne en 'n onthaalgedeelte buite, asook twee tandem-motorhuise en huisvesting vir 'n huiswerker.
Al vier veilings sal op die aangewese perseel gehou word, met aanlyn bieëry terselfdertyd beskikbaar.
- Vir meer inligting, besoek die onderskeie webverwysings op PVA se webwerf, parkvillageauctions.co.za.
