Willem Louw, Pretoria, skryf:
Pres. Cyril Ramaphosa se aanstelling van Roelf Meyer as Suid-Afrika se ambassadeur in Amerika is ’n voorbeeld van positiewe diplomatieke pragmatisme.
In ’n tyd waarin ons verhouding met Amerika onder druk is weens uiteenlopende sienings oor globale konflikte en handel, dui die keuse van ’n ervare onderhandelaar op ’n gesofistikeerde skuif na “brugbou” eerder as “brugverbranding.”
Die oortuigende aspek van hierdie aanstelling is die historiese sinergie tussen Ramaphosa en Meyer. As hoofonderhandelaars vir onderskeidelik die ANC en NP in die 1990’s het hulle die delikate oorgang van apartheid na demokrasie bestuur.
Deur Meyer aan te stel stuur Ramaphosa nie net ’n diplomaat nie, hy stuur ’n vertroude eweknie wat die “Suid-Afrikaanse wonderwerk” van kompromie verstaan. Hierdie vennootskap, wat eers die nasie van moontlike burgeroorlog gered het, word nou benut om ’n kritieke bilaterale verhouding te herstel.
Meyer se agtergrond as ’n ervare bemiddelaar in internasionale konflikte maak hom besonder geskik vir die huidige geopolitieke klimaat in Washington.
Sy In Transformation Initiative het hom dekades se ervaring in stil diplomasie en konflikoplossing besorg.
Dié vaardighede is noodsaaklik om die komplekse Amerikaanse administrasie te navigeer, veral oor sensitiewe kwessies soos Agoa en Suid-Afrika se buitelandse beleid (en dalk ook die Afrikaner).
Verder toon die aanstelling van ’n figuur wat oor die politieke spektrum gerespekteer word, ’n verbintenis tot ’n nie-partydige, nasionale belange-gedrewe buitelandse beleid.
Meyer se vermoë om met rolspelers aan beide kante van die politieke spektrum in Amerika te skakel, gee aan Suid-Afrika ’n hoëvlak-toegangspunt wat ’n loopbaanburokraat moontlik sou ontbreek.
Uiteindelik is hierdie stap deur Ramaphosa ’n positiewe beweging om Suid-Afrika se globale aansien te herkalibreer.
Dit vervang jare van diplomatieke leemte met ’n swaargewig intellektuele teenwoordigheid, en verseker dat Suid-Afrika se stem nie net in Washington gehoor word nie, maar ook oorgedra word met die momentum van ’n grondlegger van die Suid-Afrikaanse demokrasie.
Laat hoor van jou:Stuur jou brief na dbmening@dieburger.com. Briewe moet vergesel wees van die skrywer se naam, adres en telefoonnommer. Briewe korter as 350 woorde sal voorkeur kry. Die Burger behou hom die reg voor om briewe te redigeer en verkort. Publikasie van briewe word nie gewaarborg nie en berus by die brieweredakteur. Geen kommunikasie sal hieroor gevoer word nie.
