"I didn't have time to write a short letter, so I wrote a long one instead." Hierdie woorde word aan Mark Twain toegedig. Of hy dit gesê het of nie - ná 937 weke se Goeie nuus verstaan ek hoe moeilik dit is om kort en bondig te skryf. Sedert Desember 2006 moes ek leer om my woorde elke dag te tel. Algaande het ek geleer: Minder is meer. Minder woorde dwing tot meer deurdagtheid. Minder woorde laat meer oop spasies tot nadenke aan lesers se kant. By Jesus het ek die belangrikste les tot nog toe geleer: Korter, goeie woorde is genesend. Minder woorde het groter aanraak-krag. Dit sluit die koninkryk van God beeldryk oop. Jesus het immers sy grootste wyshede in kriptiese vorm weergegee. Hy het hemel en aarde beweeg met eenlyners soos: "Geseënd is die nederiges, want aan hulle behoort die koninkryk van die hemele."
Mag jou goeie woorde ook minder word, maar meer.
Mag jou woorde minder selfsugtig wees, maar meermale met hemelse sout besprinkel wees. Mag jou korter gebedswoorde die Here se hart raak.
"Julle woorde moet altyd van goeie smaak getuig, met sout besprinkel, sodat julle kan weet hoe om 'n ieder en 'n elk te antwoord." - Kolossense 4:6
