Die VDT Prokureurs-gholfdag ten bate van die Beeld-Kinderfonds het vanjaar na raming R24 000 ingesamel.
Die gholfdag was op 3 November op die Woodhill-gholflandgoed in Pretoria en is vanjaar vir die 19de keer aangebied, sê Adrie van Staden, uitvoerende hoof van die Beeld-Kinderfonds.
Sy sê die dag was 'n reusesukses en gee die fonds 'n broodnodige finansiële inspuiting om kinders in nood te help.
Die Beeld-Kinderfonds samel geld in om projekte te ondersteun wat nie net tydelike verligting aan kinders gee wat swaarkry nie, maar ook die siklus van armoede in kinders se lewe probeer breek sodat hulle as volwassenes onafhanklik van staatstoelaes en welsynhulp kan wees.
Jy kan ook bydra en 'n verskil in 'n kind se lewe maak.
Betaal jou bydrae elektronies aan die Beeld-Kinderfonds in die Absa-tjekrekening, met rekeningnommer 2840157329 en takkode 632005 in. Gebruik jou selfoonnommer, naam en van as verwysing.
Kontantbetalings kan by 'n Absa-kitsbank gedoen word. Kies kaartlose transaksies en volg die maklike aanwysings.
Andersins, SMS die woord KINDERS na 41522 (R30 per SMS).
