Dit was Vrydag ’n fees van vlae, toeters en groot glimlagte by die Vrystaat-stadion toe Cheetah-ondersteuners hul span toewuif op pad Kimberley toe vir die Curriebeker-halfeindstryd teen Griekwas.
Ondersteuners het vroeg opgedaag om hul helde te sien en sterkte toe te wens voor die uitklopwedstryd. Jonk en oud het hul beste oranje uitrustings uitgehaal en die stadion het soos ’n see van span-ondersteuning gelyk.
Vir die 11-jarige Christiaan Pienaar, ’n leerling aan Grey Kollege, was dit ’n dag om te onthou.
“Dit was spesiaal om my helde te sien en sterkte toe te wens. Ek hoop Jandré Nel kan weer baie drieë druk. Ek dink ons gaan wen!”
Sy ma, Ronel Pienaar, wat ook die woordvoerder van die Vrystaat-Cheetahs is, sê dié byeenkoms is ’n eerste vir die unie.
“Die span speel môreaand laat in Kimberley en ons weet baie ondersteuners sou graag daar wou wees. Ons het gedink om iets te doen sodat hulle hul gunsteling-spelers kan sien, totsiens sê en sterkte toewens,” sê sy.
Braam Eckard, wat die Cheetahs al sedert 2000 ondersteun, sê hy is vol hoop.
“Dié span het karakter. Ek dink Prince Nkabinde gaan groot punte aanteken,” sê hy met ’n breë glimlag terwyl hy sy Cheetah-pet regskuif.
Tussen die opwinding deur het die Cheetahs ook hulde gebring aan Bevin Fortuin, wat vroeër die week oorlede is. Fortuin het tussen 2005 en 2009 in 79 wedstryde vir die Cheetahs uitgedraf. Hy was deel van die Curriebeker-wenspan van 2005 en die een wat die beker in 2006 met die Blou Bulle gedeel het.
Die unie het sy innige meegevoel met Fortuin se familie en vriende betuig en hom geloof vir die vreugde wat hy altyd na die veld en kleedkamer gebring het.
Met soveel positiewe energie en goeie wense in hul sak, is die Cheetahs op pad na Kimberley met die wete dat Bloemfontein agter hulle staan en hoop dat hulle môreaand ’n plek in die Curriebeker-eindstryd sal verseker.
