MultiChoice was Donderdag een van die eerste diensverskaffers wat bevestig het sy pryse gaan nié op 1 Mei styg nie.
DStv en Showmax se tariewe bly nou soos dit met die jaarlikse styging op 1 April verander het.
Dít nadat die tesourie aangekondig het belasting op toegevoegde waarde (BTW) gaan nie meer van 15% tot 15,5% verhoog word nie.
"Ná bevestiging dat die voorgestelde BTW-verhoging geskrap word, sal DStv nie meer 'n bykomende prysstyging van Mei af instel nie."
Die dienste en produkte van bykans alle ondernemings sou op 1 Mei gestyg het. Banke, selfoonmaatskappye, versekeraars en munisipaliteite het die oor die laaste paar weke die nuwe tariewe per SMS of e-pos aan verbruikers aangekondig.
Vox was onder dié wat vinnig beweeg het om aan te kondig BTW op sy internetdienste bly onveranderd op 15%.
MultiChoice het voor April verhogings van tussen 2,1% en 6,5% in sy tariewe aangekondig, met DStv Premium wat R50 duurder geword het en Compact Plus R40.
