Onlangs vertel 'n leraarsvriend van 'n gemeentelike uitreik na Lesotho. Die plaaslike geloofsgemeenskap waar hulle tuisgegaan het, is baie arm. Hulle gebruik kartonbokse as houers vir klere en kombuisware.
Hy sien toe een houer raak met die woorde "manipulation box" daarop. Toe verneem hy dit is 'n boks waarin mense al die items by hulle moet plaas terwyl hulle saamkuier. Alles wat hulle aandag aftrek om spontaan met mekaar te gesels, word dan in daardie houer gebêre.
Dalk moet ons elkeen 'n soortgelyke "manipulation box" in ons huis hê. Spoedig sal dit vol selfone, TV-skerms en skootrekenaars wees.
Daar's net te veel afleidings in ons lewe. Ons bid vinnig, eet haastig en kuier oppervlakkig. Ons is gedurig op ander plekke in ons kop en in ons hart. Blykbaar gebeur die eintlike lewe elders as daar waar ons en ons geliefdes saamkuier.
Fout! Kom ons besluit elke kuier en elke interaksie is spesiaal. Kom ons kyk mekaar in die oë en stel opreg belang in mekaar se doen en late. Dan leef ons op regte maniere in die oomblik. Dan verander ons kuiers en saamwees in Goddelike momente waar Hy altyd welkom is.
Uit die Woord
"Wat sal dit 'n mens dan baat as hy die hele wêreld as wins bekom, maar sy lewe verloor?" - Matteus 16:26
