Die Britse joernalis, vervaardiger en eksvrou van 'n oudpremier van Pakistan, Jemima Goldsmith (50), is beseer nadat sy op Leeukop in Kaapstad geval het.
In 'n plasing Sondag op Instagram het Goldsmith laat blyk dat sy 'n been op die berg gebreek het. Sy skryf dat sy met vriende en familie op die berg gaan stap het toe sy "tuimel" en "strompel".
In een van die foto's sit sy in 'n rolstoel. In 'n ander staan sy met krukke. Daar is ook 'n video waar sy in 'n hospitaalbed in 'n gang gestoot word.
https://www.instagram.com/p/DEXScXLoyvN/?img_index=7&igsh=MWF3d2s5ZGx0cnY2ag==
Goldsmith is in 2004 ná nege jaar van Imran Khan, 'n krieketspeler wat 'n prominente politikus in Pakistan geword het, geskei. Khan was Pakistan se premier van 2018 tot 2022.
Haar ma, lady Annabel Goldsmith (90), het in die 1960's en 1970's met haar Londense nagklub Annabel's naam gemaak.
Goldsmith het in Oktober verlede jaar op X beweer dat Khan (72) geen kontak met die buitewêreld het nie. Hy word glo afsonderlik en in donkerte aangehou.
'n Mosie van wantroue in Khan het in 2022 geslaag. Hy word by meer as 150 hofsake betrek.
Goldsmith en Khan het twee seuns, Sulaiman en Kasim, wat in Londen woon. Khan was destyds met Diana, ontslape prinses van Wallis, bevriend.
- quinton.lourens@media24.com
