Stuur jou SMS na 36260. SMS’e wat die skrywer se naam bevat, kry voorkeur.
Elke aand verduur ons 10 keer of meer ’n sekere advertensie. Kan kykNET nie vir hulle 15 minute afstaan om al 10 agtereenvolgens te beeldsend nie? Dan kan die kykers intussen gaan koffie maak? – Schalk, George
Die staat belas sigarette om mense te ontmoedig om te rook, maar laat toe dat onwettige sigarette spotgoedkoop verkoop word? – AB, Stilbaai
Ai, nog ’n naweek sonder Bokrugby en net tuinmaak om na uit te sien. – Benna
Milnerton-boeliesage: Waar is die EFF-leier en sy makkers? Geen optog? Geen “rassisme” om aan die groot klok te hang nie? Daarom is hulle stil! – Jacobus Visser
Hein Willemse se “Fort Hare brand weens misdaad” (23.10) verwys. Wees besorgd en baie bekommerd. Dis die volgende reeks SEB-trawante wat die sake- en politieke omgewing op landsburgers en belastingbetalers losgelaat word. – Harry Tietz
Marius Kritzinger maak beswaar teen die Engelstalige reklameflitse op Afrikaanse televisiekanale (23.10). Ewe hartseer is die verengelsing van die advertensie-invoegsels in die koerant. – Kassie, Kaapstad
Die opskrif “Strafregstelsel ‘is verouderd’ ” (22.10) is totaal misplaas en verskil hemelsbreed met die inhoud van die berig. Dit is die geïntegreerde sekuriteitstelsel van die howe wat verouderd is, nie die strafregstelsel nie. – T. Lourens, Somerset-Wes
