1. Sensasionele suède
As daar één nuwe tekstuur is wat jou winterkas nodig het, is dit suède. Baadjies, rompe, handsakke tot skoene - jy kan kies wat die beste by jou persoonlike styl pas.
2. Plattelandse sjiek
Dié trend weerspieël die kalmte van 'n naweek weg - al is jy in die stad. Byna soos 'n Britse adellike wat met jou honde in die buitelug gaan stap.
Wees op die uitkyk vir items in geruite stof, truie, leerbaadjies en lang jasse.
3. Wenner-wynrooi
Ons kan net nie genoeg kry van hierdie kleur wat ons laat dink aan 'n heerlike glas rooiwyn voor die kaggel nie.
Of jy dit treffend van kop tot toon dra of gebruik as die skilderdoek om 'n ander kleur tot sy reg te laat kom, dié koelrooi werk perfek.
4. Kollig op satyn
Satyn is lankal nie meer net vir die aand nie. Dié vloeiende materiaal laat jou alledaagse uitrustings glinster - van rokke en rompe tot pajamastyl-pakke.
Dra dit met fraiings, vere of kant vir 'n ekstra weelderige voorkoms.
5. Kraaglose baadjie
Met inspirasie van Coco Chanel se oorspronklike tweed-ontwerp, ontplof dié baadjie die winter in verskillende kleure en teksture. Dra dit op sy eie as 'n top of bo-oor 'n trui of bloes.
6. Luuks-sportief
Gemaklike broeke kraai steeds koning en wat is beter as 'n sportstyl-broek. Die geheim is om nie te lyk of jy gaan oefen of tyd langs die sportveld deurbring nie.
Die broek kry 'n luukse voorkoms saam met hakke, 'n hemp of snoesige trui, snyersbaadjie en bonkige of laag-op-laag juwele.
7. Sjokoladebruin
Die kleur laat jou binnetoe glimlag, soos jou eerste hap van 'n heerlike sjokolade-koek. Versterk die emosie in 'n uitrusting deur te speel met teksture soos breistof, kant, blinkers en fluweel.
8. Luiperdvel-patroon
Op die loopplanke het dit gewemel van die patroon, van Zimmermann tot Christian Dior! Bloese, rokke, jasse en bykomstighede, dis jou tyd om katjie van die baan te wees.
Model Meagan Shehab van Ice Models
Grimering en hare Hannah Kruyer-Maritz
Mode-assistent Jancke Potgieter
Katvoets
As jy hierdie winter oemf aan jou uitrustings wil gee, is dit vir seker met 'n luiperdvelpatroon-stewel of -skoen. Tydlose skoenstyle kry persoonlikheid met dié ikoniese patroon.
1. Punthakke, 'n reuse-trend vir die seisoen!
Van eenvoudig in swart, met 'n luiperdvelpatroon, strikdetail tot blinkers. Dié elegante skoen laat elke uitrusting luuks lyk. Swart punthakskoene van maasstof met blinkers (R599), Woolworths.
2. Die balletstyl-skoen seëvier steeds
Ná 20 jaar is die gemaklike, vroulike skoen net so gewild soos in die vroeë 2000's, en die tydskrif Vogue bestempel dit selfs as vanjaar se moet-hê-skoen. Beige-en-swart balletstyl-skoen van kunsleer (R329), H&M by Superbalist.
3. Stewels skiet vanjaar die hoogte in!
Ná jare waarin die enkelstewel oorheers het, is langer stewels weer 'n trend. Kies kniestewels of stewels tot by die bobeen.
Stylvol en vleiend saam met rokke en rompe. Bruin kniestewel van leer (R3 799), Aldo
4. Suède - die gonswoord van Winter 2025
Die luukse tekstuur is 'n moet vir 'n treffende winteruitrusting, by van jou gunsteling-jeans tot 'n vloeiende rok. Karamelkleurige enkelstewel van suède
(R1 799), Poetry.
5. Gemak is die wagwoord by die insteekskoen
Vir 'n aweregse voorkoms, dra die klassieke skoen saam met sokkies wat die aandag trek. Swart kunsleer-insteekskoen (R1 099), Forever New.
* Produkpryse is voorgestelde pryse en kan verskil van winkel tot winkel
